سەردێر

دایك و باوك وەك گەورەترین تاوانبار

ژوان ئەحمەد
لە هەموو كێشە و كارەسات و تاوانەكان، پەنجەی تۆمەت بە هەموو لایەكدا ئاراستە ئەكرێت، بەڵام تا ئێستا بە دەگمەن دەبینرێت، پەنجەی تۆمەت ئاراستەی تاوانبارە سەرەكیەكەی تاوان و كارەساتەكانی ناو كۆمەڵی كوردی بكرێت.
ڕاستە سیستمی سیاسی تاوانی لەسەر شانە لە كۆی كایەكان، بەڵام بە مەبەست بێ یان بەبێ مەبەست، گشت لادان و تاوانەكان خزمەت بەس یستمەكە دەكەن و خەڵك بۆ كاتێك سەرقاڵ دەكەن تا كێشەكانی دیكەیان لەبیر بچێتەوە، بەڵام:
– ئەوە حكومەت نیە كە مۆبایل دەداتە دەست مناڵەكەت!
– ئەوە حكومەت نیە كە لە مۆبایلی مناڵەكەتدا تیكتۆك و سناپ چات و جۆرەها سەكۆی سۆشیال میدیای بۆ دابەزاندوە و بەبێ چاودێری سەیریان دەكات و بەهای لێ وەردەگرێت.
– حكومەت چی بكات لە بیركردنەوەی تۆ كە پێت وایە مناڵ پەروەردە كردن ئەوەیە شتی بۆ بكڕیت و پێداویستی بۆ دابین بكەیت،، هەڵەی خۆتە كە بەخێوكردن و پەروەردە كردن لێك جوێ ناكەیتەوە.
– حكومەت بە زۆر تۆی دانەنیشاندوە تا سەیری كوردماكس و نێت تی ڤی و سۆرانی مام ئیسماعیل و شاهۆ ئەمینی روداو بكەیت، ئەوە خۆتیت بەدیاریانە گەزێك دەم پان ئەكەیتەوە و ژەهرەكە بە لیكی تۆوە ئەڕژێتە گەروی مناڵەكەتەوە.
پاشان بە ویژدانت، حكومەت یان مامۆستا و خوێندنگە پێی وتی برۆ بەدیار بەزمی بەزمەوە ببورێرەوە؟
كێ پێی وتی برۆ سەیری مامە ڤاندام بكە؟
كێ پێی وتی فۆڵۆی زهرەكەی سلێمانی و ئاسنكەی هەولێر و نازانم چی بكە لە ئینستا و سناپ؟
ئاخر چ ماڵ خراپێك ناچاری كردوی سێ ساڵ بەدیار لێم ببورەوە دانیشی و دەرسی لادان بە كچەكەت بڵێیتەوە؟
– ئەوە خۆتیت كە مناڵەكەت تەنیا بۆ ئەوەی ژیر بێت، بۆ ئەوەی دەنگە دەنگ نەكات، بۆ ئەوەی لە جوڵە بكەوێ، ئایپاد و ئایفۆن و جۆرەها شتی تری بۆ ئەكڕیت و دەیدەیتە دەستی.
– ئەوە خۆتیت سەعات 2 ی شەو مۆبایلەكەت دانەناوە و بویتەتە خراپترین مامۆستای مناڵەكانت و ئەوانی لاساییت دەكەنەوە.
– حكومەت بە زۆر پێی نەوتوی مناڵە 12 ساڵانەكەت بدە بەشوو. ئەوە خۆتیت كۆیلەی ئەقڵێكی ژەنگ گرتوی.
– حكومەت پێی نەوتوی كوڕەكەت وا پەروەردە بكە كە دایكی و خوشكەكەی و هاوڕێ و هاوسەری داهاتوی موڵكی ئەون و ئەگەر بۆچونی جیاوازیان هەبێ ئەبێ بیكوژی.. ئەگەر ویستی جیاببێتەوە ئەبێ فەلاقەی بكەیت.
– – ئەوە خۆتیت دەمانچەكەت خستۆتە برە پشتێنەكەت و لەبەردەم كوڕ‌كەت شانازی پێوە ئەكەیت، جا ئەتەوێ كورەكەت گەورە بوو ببێ بە ئنیشتاین؟ نەخێر هەر لە ژن و كچ و خوشكەكەی ئەبێ بە فرانكۆ نیرۆ و بە راست و چەپ تەقە ئەكات ، چون ئەقڵی نیە و تەنیا بە ناوگەڵی و پەلە پیتكەی تفەنگەكەی چارەسەری لایە
بۆیە تاوانباری سەرەكی گشت نەهامەتیەكان دایك و باوكن، بۆی مەگەڕێن نە مەلایە و نەمیدیایە و نە حكومەت.
تۆ ئەقڵت هەیە، مناڵەكەت و خۆت رابێنە:
مەچۆرە تیكتۆكی مامە ڤاندام و ئەوانی تر، سەیری كەناڵە كوردیەكان مەكە و بەدیاری شاهۆ و سۆرانە و ئەڤینەوە دامەنیشە، ئەوجا حكومەت ئەگەر بە رەحەتیش بیكاتە مێشكی مناڵەكەتەوە، فێری لادان نابێ.