سەردێر

ئەگەر وەها نەبووایە

ئازاد جۆڵا

ڕاپەڕین بە گرینگترین و پڕبەهاترین و مەزنترین دەسکەوتی مێژوویی گەلەکەمان دادەندرێت لەبەر ئەم هۆیانە

٭ ئەم ئازادی و خۆبەڕێوەبەریەی ئێستا ئەنجامی ئەوێ ڕۆژێ ی ڕاپەڕین بوو .

٭ یەک دەنگی و یەک هەڵوێستی سەرجەم هێزو لایەنەکان هۆکارێکی گرینگ بوو کە ئەوکات لە چوارچێوەی بەرەی کوردستانیدا ڕێکخرابوو .

٭ تا ئەوپەڕی متمانە لەنێوان خەڵک و شۆڕش بەهێزو پڕبوو لە فیداکاری و خۆنەویستی .

٭ ڕزگاری نەتەوەو نیشتمان ئامانج بوو، بەرژەوەندی گشتی لەسەروی هەموو شتێکەوە بوو.

٭ ڕاپەڕین ڕەتکردنەوەی توندڕەوترین دیکتاتۆر و هەڵمژینی هەناسەی ئازادی گەل بوو .

٭ ناساندنی پرسی کورد و کێشە ڕەواکانی بەجیهانی دەرەوەو و بەهێزبوونی پەیوەندی سیاسی و دیبلۆماسی سەرکردایەتی کورد بە دونیای دەرەوە .

٭ ڕاپەڕین بوو بەهۆی پێکهێنان و دروستکردنی دامەزراوە یاسایی و فەرمییەکانی ئەمڕۆ و دواتریش چەسپاندنی بەشێکی باش لە مافەکانی گەلەکەمان لە دەستووری هەمیشەیی عێراقی تازەدا، ئەمانەو دەیان دەستکەوتوو سەروەری تر هەر بەهۆی ڕاپەڕینەوە بەرهەم هات بەڵام بێ گومان ئەگەر هەڵە زۆر و بەردەوامەکانی سەرکردایەتی سیاسی کورد نەبایە، ئەگەر بەرژەوەندی کەسی و حزبی پێش بەرژەوەندی گەل و وڵات نەخرایە، ئەگەر شەڕی کورد کوژی و تاڵانی و وێرانکاری نەبایە، ئەگەر هێندە کاریگەری وڵاتانی داگیرکەر بەسەر هەرێم و حزبەکانەوە نەبایە، ئەگەر لەپێناوی باڵادەستی دەسەڵات و خۆسەپێنی سیاسی پەنامان بۆ داگیرکەر نەبردایە، ئەگەر لەڕووی سیاسیەوە باوەڕمان بە دیموکراسی و دەستاوەستی دەسەڵات هەبایە، ئەگەر پارێزەری مافی مرۆڤ و باوەڕی تەواومان بە ئازادی ڕادەربڕین هەبایە، ئەگەر خاوەنی حکومەتێکی مەدەنی و شەفاف و خزمەتگوزار بوینایە ، ئەگەر تووشی لێکترازان و چەقبەستوویی سیاسی و نێوخۆ نەباینایە، ئەوا بێ گومان ئەمڕۆ دەستکەوتەکان گەلێک زیاتر و ئەزموونەکەمان پارێزراو ترو شەهیدانیش لەگۆڕدا ڕووحیان شادتر دەبوو .