سەردێر

وه‌رن ته‌گبیری ئه‌م بارودۆخه‌ سیاسی و ئابوریه‌ بكه‌ن

 

عه‌بدولواحید محه‌مه‌د
له‌ راستیدا ئه‌م ده‌ڤه‌ره‌ بۆته‌ گۆڕه‌پانی ململانێ و یه‌كلاكردنه‌وه‌ی به‌رژه‌وه‌ندیه‌كان، هه‌رچی یاریكه‌ری سه‌ربازی وسیاسی و ئابوری هه‌یه‌ سه‌ریان تێناوه‌، هه‌وڵی ئه‌وه‌ ده‌ده‌ن ئه‌نجامه‌كه‌ به‌لای خۆیاندا بشكێننه‌وه‌، باكیشیان به‌وه‌ نیه‌ هاونیشتیمانیان له‌م كێشمه‌كێشه‌دا چیان به‌سه‌ر دێ و چۆن له‌بن پێوخستیان ده‌پلیشێنه‌وه‌، ئه‌وه‌نده‌ش بێویژدانن نه‌ حساب بۆ مێژوو ، نه‌بۆ مرۆڤایه‌تی، نه‌ بۆ مافه‌ نه‌ته‌وه‌یی و نیشتیمانیه‌كان ده‌كه‌ن، نه‌ به‌لاشیه‌وه‌ ده‌چن، بۆ به‌د‌به‌ختیش ، هه‌رچی سه‌رچاوه‌ی وزه‌یه‌ له‌ جیهاندا كه‌ خوا داویه‌تی له‌م ده‌ڤه‌ره‌دا هه‌یه‌ ، جوگرافیه‌كه‌شی ئه‌وه‌نده‌ هه‌ستیاره‌ كێ زاڵبێت ئیتر له‌ باقی داڕسانه‌كانیتر خاوه‌نی وتاری یه‌كلاكه‌ره‌وه‌ ده‌بێت، له‌ داكه‌وتدا((واقیعدا)) بارودۆخه‌كه‌ ئه‌وه‌نده‌ گه‌رم بووه‌ خه‌ریكه‌ قوڵپ ده‌دات، ئه‌وه‌تا توركیا به‌ هه‌موو ئه‌سبابی به‌رده‌ستیه‌وه‌ هه‌وڵه‌ ته‌ماعكاریه‌كانی خستۆته‌گه‌ڕ و هیچ سنورێكیشی تێدا نه‌هێشتۆته‌وه‌، رۆژانه‌ ده‌بینین و ده‌بیستین كوردستانی رۆژئاوای روبه‌ڕوی چ مه‌نجه‌نیقێك كردۆته‌وه‌، بۆ ناوچه‌ سنوریه‌كانی كوردستانی باشوریش ته‌ون و به‌سته‌كێكی داخستوه‌ ده‌یه‌وێت پێیه‌وه‌ مۆنۆپۆڵی بكات، له‌ولاشه‌وه‌ ئێران به‌ چه‌ندین جۆر و شێواز كار بۆ ئه‌وه‌ ده‌كات عێراق بكاته‌ سوپه‌ری خۆی و شه‌ڕه‌كه‌ لێره‌ بكه‌ن له‌ جیاتی ئه‌وه‌ی له‌ ناو ماڵی خۆیان بیكه‌ن، ورده‌كاری زۆر له‌و باره‌یه‌وه‌ هه‌یه‌ له‌ داهاتودا ئاماژه‌ی پێده‌ده‌ین، ئه‌مه‌ریكاش وه‌كو یاریكه‌رێكی سه‌ره‌كی بۆ ده‌ست به‌سه‌رداگرتنی وزه‌ و سه‌رچاوه‌ سروشتیه‌كان و قوتدانی ده‌ڤه‌ره‌كه‌ و به‌هێزكردنی پایه‌كانی، به‌رده‌وام ئیمكانیاتی ماددی و به‌شه‌ری زۆری به‌كارهێناوه‌ و به‌رده‌وامیشه‌ ، روسه‌كانیش به‌ ته‌نگ ئه‌وه‌ن نمایشی یه‌كێتی سۆڤیه‌تی جاران بكه‌ن و پارێزه‌ری ئه‌و رژێمانه‌ بن كه‌ پێیان وایه‌ رۆڵ و به‌رژه‌وه‌ندیه‌كانیان ده‌پارێزن و مسۆگه‌ری ده‌كه‌ن،سه‌رباری ئه‌وانه‌ ئه‌وروپاییه‌كانیش وجودێكی كاریگه‌ریان هه‌یه‌ و به‌رده‌وام په‌یام به‌ هاوڵاتیانی ئه‌م ده‌ڤه‌رانه‌ و ئیداره‌كانیان ده‌ده‌ن كه‌ خۆیان باشتر رێكبخه‌ن و خاوه‌نی بڕیاری خۆیان بن و نه‌بنه‌ ده‌سكه‌لای هێزه‌ هه‌رێمیه‌كان، تا ئێره‌ بارودۆخی ئه‌م ده‌ڤه‌ره‌یه‌ به‌ هه‌رێمی كوردستانیشه‌وه‌، ئه‌وه‌ی من مه‌به‌ستمه‌ له‌ خستنه‌ڕوی ئه‌و داكه‌وته‌ (واقیعه‌) ئه‌وه‌یه‌، به‌ واجبی ده‌زانم به‌ هێزه‌ سیاسیه‌كانی كوردستان بڵێم ، پێتان وایه‌، له‌ ناو ئه‌و هه‌موو ئاڵۆزی و فڕكان فڕكانی ئه‌و هێزانه‌ به‌ سه‌لامه‌تی ده‌رده‌چن هه‌روه‌ها ئه‌وه‌شیان پێ بڵێم به‌و كاڵا سیاسی و ئه‌و جۆره‌ مامه‌ڵه‌كردنه‌ له‌ لایه‌ك له‌گه‌ڵ یه‌كتر له‌ لایه‌كیتر له‌گه‌ڵ ئه‌وان، به‌بێ زه‌ره‌ر و زیان لێیه‌وه‌ ده‌رباز ده‌بن، دڵنیام نه‌خێر، ئه‌وه‌ی جێگه‌ی سه‌رنجه‌ سه‌ری زمان و بنی زمانی به‌رپرسه‌كان ئاماژه‌ دانه‌ به‌و مه‌ترسیانه‌ ئیتر هه‌ریه‌كه‌ و به‌ جۆرێك لێكی ده‌داته‌وه‌ یان باشتره‌ بڵێین ده‌یهۆنێته‌وه‌ ، له‌گه‌ڵ ئه‌وه‌شدا هێشتا زۆر كه‌میان به‌لای راستیه‌كان وه‌كو ئه‌وه‌ی پێویسته‌ نه‌چون، له‌به‌ر خاتری ئه‌م و ئه‌و چاویان نوقاندووه‌ و گوێه‌كانیشان كه‌ڕكردووه‌، ئه‌مه‌ له‌ كاتێكدا بزانن یان نه‌زانن، ئه‌وه‌ له‌سه‌ر حسابی ئه‌م میلله‌ته‌ به‌ش مه‌ینه‌ته‌ و داهاتوه‌ نیشتیمانی و نه‌ته‌وه‌ییه‌كانه‌، لێره‌دا ده‌مه‌وێت په‌یامێك بده‌م و پێیان بڵێم، كاتێكی زۆر رۆیشت و كه‌متان كرد، ده‌ڤه‌ره‌كه‌ له‌به‌رده‌م گۆڕانكاری گه‌وره‌دایه‌، وازبێنن له‌ بوغرایی و خۆ به‌ گه‌وره‌ زانین، چیتر باسی زۆر و بۆری كورسی په‌رله‌مان و هێزوباز و غه‌له‌به‌ی سیاسی مه‌كه‌ن، وه‌رن ته‌گبیری ئه‌م بارودۆخه‌ ئابوری و سیاسیه‌ بكه‌ن،شه‌ڕ و ماڵوێرانی له‌ 2014ه‌وه‌ به‌رده‌رگای گرتوین و ئێستاش به‌ مۆدێل و به‌ شێوازی جیاواز به‌رده‌وامه‌، ئه‌وه‌تا به‌غدا كه‌ڵبه‌كانمان لێده‌سون توركیاش خۆیان ده‌ڵێن له‌ كوێ كورد هه‌بێت ئێمه‌ له‌وێ ده‌جه‌نگین، ئێرانیش له‌به‌ر بارودۆخه‌كه‌ی هه‌ندێك له‌ ئه‌وراقه‌كانی سڕكردووه‌ ده‌نا خله‌ له‌ بله‌ كه‌متر نیه‌ ئه‌وانیش بۆ كوردستان هه‌ر وه‌ی، ئه‌وروپاش له‌سه‌ر زاری به‌رپرسه‌كانه‌وه‌ به‌رده‌وام ئه‌وه‌یان وتوه‌ عێراقێكی یه‌كگرتو و له‌ چوارچێوه‌كه‌یدا كوردستانێكی به‌هێز، له‌ بیریشمانه‌ تره‌مپه‌سۆر وتی كورد به‌ پاره‌ی ئێمه‌ شه‌ڕیان كردووه‌، دواجار بۆ دوو باڵه‌خانه‌ی دیاری شانی قوڵ كرد و كوردستانی رۆژئاوای ئازیزی گورگان خواردی كرد، هێشتا زه‌مه‌ن به‌ به‌ریه‌وه‌ ماوه‌ و كاتیه‌تی پێكه‌وه‌ دانیشن و ته‌گبیری حاڵی ئه‌م میلله‌ته‌ بكه‌ن، بڕوام وایه‌ كه‌سی گه‌وره‌نیه‌ له‌ ئاست كوردایه‌تی كه‌سیش بچوك نیه‌ له‌به‌رامبه‌ر ئه‌ركه‌كان، هه‌موو پێكه‌وه‌ به‌هێزن و حسابتان بۆ ده‌كه‌ن، به‌ پێچه‌وانه‌ چاوه‌ڕێی خێر و سه‌ده‌قه‌ مه‌كه‌ن، جیڤاراش ده‌ڵێت((دڵسۆز كه‌سێكه‌ بۆ ته‌نگانه‌ بێت، نه‌ك له‌ ته‌نگانه‌ بۆت بێگانه‌ بێت))