سەردێر

فازڵ میرانی: ئه‌گه‌ر داهاته‌کانی کوردستان به‌ڕێکوپێکی کۆبکرێنه‌وه‌ پێویستمان به‌ پاره‌ی به‌غدادیش نابێت

خەڵک-

فازڵ میرانی، سکرتێری مەکتەبی سیاسی پارتی دیموکراتی کوردستان، لە وتووێژکی ڕووبەڕوودا لەگەڵ رادیۆی (دەنگی ئەمەریکا)دا، وەڵامی چەندین پرسیار دەداتەوە سەبارەت بە کێشەکانی نێوان یەکێتی و پارتی و پرسی پێکهێنانی حکومەت لە بەغداد.

لە بارەی دانیشتنی مەسعود بازرزانی، سەرۆکی پارتی دیموکراتی کوردستان لەگەڵ بافڵ تاڵەبانی، هاوسەرۆکی یەکێتیی نیشتمانیی کوردستان، میرانی دەڵێت “وەکو سەرۆک حزب کاک مەسعود لەگەڵ کاک بافڵ پێدەچێت کۆنەبێتەوە، بەو پێیەی کاک بافڵ بە فەرمی سەرۆکی یەکێتی نیشتمانی کوردستان نییە و هاوسەرۆکە، هەروەها کاک مەسعود کوڕی مەلا مستەفاییە و چەند ساڵە سەرۆکی پارتی دیموکراتی کوردستانە و پارتیش هەندێک ئەتەکییەتی حیزباییەتی هەیە، بەڵام وەکو برازاییەکی خۆی و کوڕی مام جەلال، داننان شتێکه‌ و دانیشتنی کاک مه‌سعود لەگەڵ بافڵ تاڵەبانی شتێکی تره‌”.

وتیشی “قوباد تاڵەبانی، ئه‌ندامی سەرکردایەتی یان مه‌کته‌ب سیاسی یه‌کێتییه‌، بافڵ هیچیش نه‌بێت هه‌ر له‌گه‌ڵی داده‌نیشن و قوبادیش هیچ نه‌بێت هه‌ر له‌گه‌ڵی داده‌نیشن، چونکه‌ پێگه‌ی ئه‌وان له‌ کورسیه‌کانیان گه‌وره‌تره‌، له‌سه‌ر ئه‌و پێگه‌یه‌ مامه‌ڵه‌ بکه‌ن باشتره‌ له‌وه‌ی له‌سه‌ر سیفه‌ته‌که‌ی خۆیان بێت، له‌به‌رئه‌وه‌ی کوڕی مام جه‌لالن”.

هەروەها باس لە بابەتی کێشەکانی سلێمانی و موچەی فەرمانبەرانی ئەو شارە دەکات، وەڵامی ئەو پرسیارەش دەداتەوە، ئایا پارتی سزای سلێمانی دەدات؟

-پرسیار: دۆخی عێراق و هەرێمی کوردستان ئێستا چۆنە؟بۆچی نە لایەنە کوردییەکان نە لایەنە عێراقییەکان کۆنابنەوە؟ئەگەر بڵێیت کە هەفتەی رابردوو کۆبوونەوەتان بوو لەگەڵ هاوپەیمانی سێ قۆڵی ئەوەی کە خۆتان هەتان بوو، بەڵام دوخەکە هیچ گۆڕانکاری نەبووە، تەنها کۆبونەوە مەبەستم کۆبوونەوەی گۆڕانکاری لە عێراق و هەرێمی کوردستان ئێستا دۆخەکە چۆنە؟

فازڵ میرانی: پێشەکی بەخێربێن، دەستخۆشی لە دەنگی ئەمەریکا دەکەم، بە ڕاستی دۆخی عێراق و دۆخی هەرێمی کوردستان کەوتۆتە دۆخێکی دەستشکاندن، ئەو دوو کوتلەیەی لە عێراق هەیە چوارچێوەی هەماهەنگی و هاوپەیمانی ، کوردستانیش ئێمە و یەکێتین، ڕێزمان بۆیان هەیە، بەڵام ئەوانە کاریگەرییەکی زۆر خراپیان نابێت لەسەر هەرێمی کوردستان، ئەوەی ئێمە و یەکێتی تا ئێستا جارێ دەست بادانە، سوپاس بۆ خوا دەستشکاندن نەبووە، بەس بە ئومێدی ئەوە ئینشائەڵڵا دەسبادانەکە سست تر بێتەوەو بەرەو دەستشکاندن نەروات”.

 

-پرسیار: ئێوە و یەکێتی لە کوێی ئەو دەستشکاندنەوەدان؟
فازڵ میرانی: ئێمە و یەکێتی دەستشکاندنەکە لە کوێ دەست پێ ئەکات، خوانەخواستە ئەگەر شەڕ ببێت، کە ئەویش جەنابی سەرۆک بارزانی تەحلیلی کردووە، بە قسەی خۆی ئەمە چەند ساڵە، لەسەر قسەی خۆی راست دەوەستێت من دڵنیام، هی دووەمیش ئەوەی من دەیبینم پێشمەرگەکانی هەردوولاش حەزییان لە شەڕ نییە“.

 

-پرسیار: واتە پێشمەرگەکان شەڕتان بۆ ناکەن یا حەزیان لێی نییە شەڕ بکەن؟

فازڵ میرانی: نەخێر حەزیان لێی نییە، ئەوانیش دەزانن زیانە و هۆشیاری قەومی لە ناوی پێشمەرگە هەیە، هۆشیارییەکی زۆرە چ ئەوانەی خۆیان پەیدایان کردەوە چ ئەوانەی فێرکراون لەو ماوەی کە لە ناو یەکێتی و پارتیدا تەنزیماتی حزبایەتییان کردووە، شۆڕشیان کردووە ماندوو بونە، ئەو هەستەش لای ئەوان هەیە، هەستێکی زاتییە وە هەستێکی موکتەسەبە”.

 

-پرسیار: کاک فازڵ ئەوەی کە لە نێوان ئێوە و یەکێتی دا دەبینرێت لەسەر ئاستی پەرلەمانتار لەسەر ئاستی تەنانەت سەرکرداییەتیشتان، دەوترێت زۆر جار لە دەستشکاندنیش لایداوە، گەشتۆتە ئاستی ملشکاندن، لە پشتەوە دان لە یەکتر، هەلدانەوەی مەلەفی یەکتر تا کار گەشتە ئەوەی هێرش بکرێتە سەر کەسی یەکەمی حیزبەکان لەهەردوولا، ئایا پێتان وایە ئێوە و یەکێتی گەیشتونەتە دەستشکاندن و ملشکاندن وەکو ئەوەی خەڵکی دەیڵێت؟

فازڵ میرانی: وەڵاهی بەداخەوە ئەوانەی ئەو کارە دەکەن لە سۆشیاڵ میدیا بەرپرسیارێتییەکی وەهایان نییە، نە سیاسەتی پارتی نە سیاسەتی یەکێتی ئەوەیە کە هێرش بکەنە سەر کەساییەتی مەسئولی یەکەمەکان نە سەرکردایەتی حیزبەکان “

 

دەنگی ئەمەریکا: بەڵام لە میدیا فەرمییەکانی ئێوە بە تایبەت خودی بافڵ تاڵەبانی بە ئامانج گیراوە لەگەڵ قوباد تاڵەبانی؟
فازڵ میرانی: بەهەرحاڵ ئەو ئیعلامەش بە ڕای من ئاڕاستەکراو نییە، ئەگەر تەماشا بکەی ڕاگەیەنراوی کۆتایی کۆنگرەی سەرکرداییەتی ئێمە، ئەو زمانە زبرەی کە لەگاڵ یەکتر مخاتەبە دەکەین رەفزمان کردووە، دەرگای دیالۆگ هەیە تا ئێمە مەجالی دانوستاندن هەبێت هەروەکو لە پێشەکیش ئێمە دوای هەڵبژاردنەکان سەردانی هەموو حزبەکان بەندە خۆم چووم، بەشێک لەو حیزبانە خوا خێریان بنوسێ دەرگایان لێ نەکردینەوە، قسمێکیش بینیمان برادەرانی یەکێتی کە لامان مەبەست بوو و تا ڕادەیەک لێکتێگەیشتنێکی باشیشمان هەبوو، مەسەلەی سەرۆکایەتی کۆماری عێراق هات، ئەوەی کە ئەوەندە ناهێنێت، من دەڵێم جارەکەی تریش بە تۆم وتەوە، ئەوە وەزعەکەیە ئەگەرنا ئێمە و یەکێتی لێکتێگەیشتنێکی باشمان هەیە لە دوای هەڵبژاردنەکان “.

 

-پرسیار: ئەگەر خەلکێک لە ئێوە بپرسێت ئایا ئەگەر پارتی دیموکراتی کوردستان و تەنانەت یەکێتی، بەڵام بەشەکەی خۆتان جواب بەیتەوە گەیشتونەتە ئەو ئاستەی راگەیاندنە فەرمییەکانتان لە دەرەوەی تەوجیهی ئێوە بتوانن هێرش بکەنەسەر، دەتوانن با بڵێیین هەڵمەتێک بەرامبەر حیزبەکان دەست پێ بکەن؟

فازڵ میرانی: وەڵاهی لێت ناشارمەوە بە داخەوە لە کوردستاندا، ئێستا شێوەیەک لە بێ ئلتیزامی دروست بووە لە ناو حیزبەکانیشدا، واتە هەتا خۆشمان حیزبێکی ساحێب دیسپلێن بوین تا ئیستاش مەرکەزییەت و مەرجەعییەتی ئێمە بەقوەتترە لە هەموو حیزبەکان جار بە جار لە ناو ئێمەش خەڵکێک هەیە (فەڵتێک) دەکات و بە قسەی (رەحمەتی مام جەلال) کۆمەڵگای کوردستان وای لێهاتووە، بە داخەوە و ئەمەش ئاماژەیەکی سلبیە بە دیدی من، خەڵکێک دەڵێت ئەمە پێشکەوتنی بیرکردنەوەیە، ئەمە پێشکەوتنی جڤاکییە ئەمە ئازادی رادەربڕینە، ئازادی رادەربرین لەناو خودی حیزبەکاندا دەبێت، بەڵام لەدەرەوەی حیزبەکان، مەسەلەیەکیش هەیە، دەڵێ ئەگەر تۆ بتەوێ گەورە بی خەڵکێک بە گچکە مەبینە”.

 

-پرسیار: لە دوای کۆبونەوەی ئەنجومەنی سەرکردایەتی ئێوە باس لەوە کرا ئێوە و یەکێتی کۆدەبنەوە، ئەوە بە کوێ گەیشت ئایا کۆ دەبنەوە؟

فازڵ میرانی: بەم نزیکانە کۆ دەبینەوە، هەمیشە من دەڵێم بەدیلی کۆبوونەوە و کۆنەبونەوە چییە؟ بەدیلی رێکنەکەوتن چییە؟ بەدیلی پێکەوە کارکردنی ئێمە و یەکێتی؟ نە بەدیلک لای خۆمان دەبینم نە برادەرانیش تا ئێستا بەدیلێکیان نیشان نەداوم قەناعەتی پێ بکەم، بەدیلی ئەوەی پێکەوە بیکەین چییە؟

 

-پرسیار: کۆبوونەکە لەسەر چ ئاستێک دەبێت باسکرا کە لەسەر ئاستی هەریەکە لە کاک مەسعود و کاک بافڵ و کاک قوباد دەبێت؟

فازڵ میرانی: من ئەگەر واقیع بین بم، وەکو سەرۆک حزب کاک مەسعود لەگەڵ کاک بافڵ ئیحتیمالە دانەنیشێت، بەڵام وەکو مام و برازا دادەنیشێت، بەس پێش ئەوە پێم باشە کۆبوونەوەی هەردوو مەکتەب سیاسی بکرێت. “

 

-پرسیار: بۆچی وەکو حیزبەکان کاک مەسعود ئیحتیمالە ئامادە نەبێت لەگەڵ کاک بافڵ دانیشێت؟

فازڵ میرانی: جیاوازی زۆرە، جارێ، یەکەم، بە فەرمی کاک بافڵ نەبووە بە سەرۆکی یەکێتی نیشتمانی، دووەم، کاک مەسعود کوڕی مەلا مستەفاییە و چەند ساڵە سەرۆکی پارتییە، پارتی دیموکراتی کوردستان، هەندێک ئەتەکییەتی حیزباییەتی هەیە، بەڵام وەکو شاندێکی وەکو برازاییەکی خۆی و کوڕی مام جەلال”.

 

-پرسیار:: کۆنەبونەوەی کاک مەسعود و کاک بافڵ، دەگاتە ئەوەی ئێوە بتوانن کێشەکانی پارتی و یەکێتی چارەسەر بکەن لەسەر ئاستی مەکتەب سیاسییەکان؟

فازڵ میرانی: سەرەڕای مەرکەزیەتێک کە لە ناو هەردوو حیزبدا هەیە، ئەوەی ئێمە مەرجەعییەتی کۆنە و لەگەڵی راهاتویین و بڕواشمان پێییەتی و لە ناویدا گەورە بویی،ن لەگەڵ ئەو مەرکەزییەتەی ئێستای یەکێتی بڕێک جیاوازی هەیە، بەڵام دیسان من دەڵێم ئەو شتەی هەردوو مەکتەب سیاسی ئەو شاندەی پێکەوە دادەنیشن هەر رێکەوتنێک بکەن لە لایەن مەرکەزییەتی یەکێتی و مەرجەعییەتی ئێمەوە رێزی لێدەگیرێت”.

 

-پرسیار: کاک فازڵ بگەڕێمەوە بۆ قسەیەکی خۆت، لە وەڵامی پێشووتر ئاماژەت بەوە کرد کە کاک مەسعود وەکو سەرۆک حزب لەگەڵ کاک بافڵ دانانیشێت، دەمەوێت ڕاشکاوانە لێت بپرسم رێگەم بدەیت، ئێوە تۆمەتبار دەکران کە دەستان هەبووە لە ڕووداوەکانی 8ی تەموز لە ناو یەکێتیدا، بەڵام ئێستاش داننانێن بەوەی بافڵ تاڵەبانی سەرۆک یا سکرتێری گشتی یەکێتییە کە لە ئەنجامی ڕووداوەکانی 8 ی تەموزە ؟

فازڵ میرانی: جارێ یەکەم، ئێمە دەستمان نەبووە لە ڕووداوەکانی 8ی تەموزدا، پێکهاتەی یەکێتی حیزبێکی فرە مینبەرە، واتە یەکێتی لە رووی پێکهاتەوە وەکو بەرەیەک پێکهاتووە، سەکۆی ئازادی ئەوان پێی دەڵێن، ئەو سەکۆی ئازادییە هەمیشە بیروڕای جیاوازی لێ پەیدا بووە، ڕەوتی لێ پەیدا بوو، گۆڕانی لێ پەیدا بوو، (بەرهەم ساڵح)ی لێ چووە دەرەوە، بەرهەم گەڕایەوە ناو یەکێتی، ئەمەی لە ناو یەکێتیدا هەیە لە ناو پارتیدا نییە، ئەمە یەک، دووەمیش، من دەڵێم بە فەرمی هێشتا کاک بافڵ سەرۆکی یەکێتی نیشتیمانی کوردستان نییە بە قەراری موعتەبەر،هاوسەرۆکە هێشتا، سەرکردایەتی یەکێتی ئێستا جێگرەوەی کۆنگرەیان نییە بەڵێ دەسەڵاتیان وەرگرتووە بەس ئەمە کێشەی یەکێتییە من حەز ناکەم بچمە ناوی”.

 

-پرسیار: تۆ سکرتێری مه‌کته‌بی سیاسی پارتی دیموکراتی کوردستانی ئه‌گه‌ر نامه‌یه‌ک به‌ناوی مه‌کته‌ب سیاسی و ئاراسته‌ی یه‌کێتی بکه‌یت و ئاراسته‌ی خودی کاک بافڵ بکه‌یت ده‌نوسیت هاوسه‌رۆک یاخود ده‌نوسیت سکرتێری گشتی یه‌کێتی؟

فازڵ میرانی: من هیچ کامیان نانوسم به‌ڵکو ده‌نوسم بۆ مه‌کته‌بی سیاسی یه‌کێتی نیشتیمانی کوردستان، چونکه‌ من موخاته‌به‌ی سه‌رۆک و هاوسه‌رۆک ناکه‌م، من موخاته‌به‌ی هاوته‌ریبی خۆم ده‌که‌م که‌ مه‌کته‌بی سیاسی یه‌کێتییە”.

-ئەی ئه‌گه‌ر کاک مه‌سعود بینوسێت؟
ئه‌گه‌ر کاک مه‌سعود هه‌ر ناونیشانێک بنوسێت من له‌جیاتی ئه‌و قسه‌ ناکه‌م. “

“بافڵ هیچیش نه‌بێت هه‌ر له‌گه‌ڵی داده‌نیشن و قوبادیش هیچ نه‌بێت هه‌ر له‌گه‌ڵی داده‌نیشن چونکە کوڕی مام جەلالن“.

 

-پرسیار: واته‌ هه‌تا کۆنگره‌ دان نه‌نێت به‌ بوونی کاک بافڵ به‌ سکرتێری گشتی، ئێوه‌ داننانێن به‌وه‌؟
فازڵ میرانی: داننان شتێکه‌ و دانیشتنی کاک مه‌سعود له‌گه‌ڵی( لەگەڵ بافڵ تاڵەبانی شتێکی تره‌، کاک قوباد ئه‌ندامی سەرکردایەتی یا مه‌کته‌ب سیاسی یه‌کێتیه‌، کامیانە؟، بەڵام بافڵ هیچیش نه‌بێت هه‌ر له‌گه‌ڵی داده‌نیشن و قوبادیش هیچ نه‌بێت هه‌ر له‌گه‌ڵی داده‌نیشن، چونکه‌ پێگه‌ی ئه‌وان له‌ کورسیه‌کانیان گه‌وره‌تره‌، له‌سه‌ر ئه‌و پێگه‌یه‌ مامه‌ڵه‌ بکه‌ن باشتره‌ له‌وه‌ی له‌سه‌ر سیفه‌ته‌که‌ی خۆیان بێت، له‌به‌رئه‌وه‌ی کوڕی مام جه‌لالن. “

 

-پرسیار:-ئێستا کاک بافڵ هاوسه‌رۆکه‌ یان سکرتێره‌؟

فازڵ میرانی: هه‌تا ئێستا کاک بافڵ هاوسه‌رۆکه‌، ئه‌مه‌ ڕای پارتی و ڕای خۆیه‌تی، خۆیشی ده‌ڵێت من هاوسه‌رۆکم، یه‌کێتی هێشتا ئه‌وه‌ی ساف نه‌کردووه‌ که‌ ئایا کاک بافڵ سه‌رۆک یان هاوسه‌رۆکه‌ یاخود سکرتێری گشتییه‌؟ ده‌بێت ئه‌مه‌ چێک بکاته‌وه‌ یان کۆنگره‌یه‌کی تازه‌ بکرێت یان پلنیۆم بکرێت یاخود ده‌بێت کۆمیته‌ی سه‌رکردایه‌تی چونکه‌ په‌یڕه‌و و پرۆگرامی یه‌کێتی به‌پێچه‌وانه‌ی حزبه‌کان وخۆشیان کۆنگره‌ دانپێدانانی نه‌کردووه‌، له‌دوای کۆنگره‌ په‌یڕه‌و و پرۆگرام بواری ده‌ستکاری تێدا هه‌یه‌ وه‌کو ئێمه‌ نییه،‌ چونکه‌ ئێمه‌ له‌ کۆنگره‌ شتێک په‌یڕه‌وی کرا ناتوانیین ده‌ستکاری بکه‌ین ئێستا ئێمه‌ به‌سه‌رۆکی خۆشمانه‌وه،‌ ناتوانین کابرایه‌ک له‌ده‌ره‌وه‌ بهێنین و بیکه‌ینه‌ ئه‌ندامی سه‌رکردایه‌تی که‌چی یه‌کێتی نیشتیمانی کاک عه‌دنان و کاک عادلی هێنا و یه‌کسه‌ر کردیانه‌ ئه‌ندامی مه‌کته‌بی سیاسی ئیشیشیان پێده‌کات، کاک دکتۆر نه‌جمه‌دینی هێنا ئه‌و مرونه‌ته‌ی-نه‌رمیه‌ی له‌ناو یه‌کێتی دا هه‌یه‌ له‌په‌یڕه‌و پرۆگرامدا له‌ناو پارتیدا نییه‌. “

 

-پرسیار:له‌سه‌ر بابه‌تی پۆستی سه‌رۆک کۆمار بۆچوونی پارتی چۆنه؟‌ له‌دوا کۆبوونه‌وەتان‌ به‌تایبه‌تی کاک مه‌سعود و ئه‌نجوومه‌نی سه‌رکردایه‌تی ڕایان چی بووه‌ ئایا هه‌ر پێداگرن ئه‌و پۆسته‌ بۆ ئێوه‌ بێت؟

فازڵ میرانی: هه‌تا ئێستا ئێمه‌ پێداگرین، به‌ڵام هه‌موو شتێک قابیلی گۆڕانە، من ده‌ڵێم به‌رژه‌وه‌ندی کورد له‌سه‌روو هه‌موو به‌رژه‌وه‌ندیه‌کاندایه‌ به‌ڕای من له‌سه‌روو سه‌رۆک کۆماریشه‌وه‌یه‌”.

 

-پرسیار: له‌دوای ئه‌م دۆخه‌ی له‌ سلێمانیدا دروستبووه‌، له‌ته‌واونه‌کردنی مووچه‌ی فه‌رمانبه‌ران، من داوای وتووێژێکم بۆ دەنگی ئەمەریکا لە کاک بافڵ تاڵەبانی کرد، بەڵام کاک بافڵ ئاماژه‌ی به‌وه‌ کرد،‌ ئێستا ئه‌و سه‌رقاڵی هه‌ندێک کاروباره‌، به‌تایبه‌تی ئه‌و سیاسه‌ته‌ قێزه‌ونه‌(به‌ وته‌ی ئه‌و) که‌ پارتی دیموکراتی کوردستان به‌رامبه‌ر به‌ سلێمانی په‌یڕه‌وی ده‌کات و سزای سلێمانی ده‌دات، په‌رله‌مانتاران و به‌رپرسان و خودی کاک بافڵ پێیانوایه‌ پارتی له‌ڕێگه‌ی حکومه‌تی هه‌رێمه‌وه‌ سزای سلێمانی ده‌دات؟

فازڵ میرانی: حکومه‌تێک هه‌یه‌ له‌ دنیادا حه‌ز بکات مووچه‌ به‌هاوڵاتیان و کارمه‌ندانی خۆی نه‌دات؟ پێشتریش به‌ کاک نیچیروانیش هه‌مان شتیان ده‌وت که‌ حکومه‌ت پاره‌ی هه‌یه‌ و نایدات به‌ کارمه‌نده‌کانی خۆی، کاتی خۆیشی وتم مه‌عقوله‌ نه‌وه‌ی مه‌لا مسته‌فا سه‌رۆکی حکومه‌تی هه‌رێمی کوردستان بێت له‌جیاتی مانگانه‌ی کارمه‌نده‌کانی خۆی خه‌رج بکات و بڵێن حکومه‌تێکی ڕێکوپێکه،‌ خۆی بچێت پاره‌ کۆبکاته‌وه‌ له‌شوێنێک و نه‌یدات به‌ کارمه‌نده‌کانی! سلێمانی له‌کوێیه‌ ئایا له‌ مه‌ریخه‌ و میلله‌تێکی ئیسلام نین و کوردنین و کارمه‌ندی حکومه‌تی هه‌رێم نین؟! ئه‌وه‌ ڕای خۆمه‌ ئه‌گه‌ر داهاته‌کانی کوردستان به‌ڕێکوپێکی کۆبکرێنه‌وه‌ ئێمه‌ موحتاج- پێویستمان به‌ پاره‌ی به‌غدادیش نابێت”.

-پرسیار: به‌ڵام بۆچی کۆناکرێته‌وه‌؟

فازڵ میرانی: ئەو پرسیارە لە من مەکە، له‌خودی بافڵ و کاک مه‌سرور ببپرسه‌، ئه‌وان حکومه‌تن من حکومه‌ت نیم، به‌ڵام من دڵنیام و له‌ به‌ڕیۆه‌به‌ری کاره‌بای سلێمانیم بیستووه‌ پێش سێ مانگ، گوێم لێبوو له‌ ڕووداو لێدوانێکیدا وتی داهاتی ئێمه‌ له‌ کاره‌با ئه‌م مانگه‌ 70 ملیار دینار بووه،‌ ئه‌ی خێره‌ باشماخ و کاره‌با و داهاته‌کانی تر ئه‌م سێ مانگه‌ که‌متربوون؟! له‌زه‌مانی کۆرنا داهاتی ئێمه‌ هی هه‌ردوولامان باشتر بووه‌ خێره‌ ئێستا نییه‌تی، هیچ نه‌بێت 10-15% ئه‌و کارمه‌ندانه‌ی سلێمانی پارتین 15-20% سه‌ربه‌خۆن هه‌موویان کوردن. “

 

-پرسیار: به‌ڵام قسه‌یه‌ک هه‌یه‌ ئه‌گه‌ر به‌نیگه‌رانی وه‌رینه‌گرن، ئێوه‌ پارتی دیموکراتی کوردستان یه‌که‌م هێزن چ له‌سه‌ر ئاستی عێراق و چ له‌سه‌ر ئاستی هه‌رێمی کوردستان، ده‌سه‌ڵاتی یه‌که‌م لای ئێوه‌یه‌ و سه‌رۆکی حکومه‌ت لای ئێوه‌یه‌ واته‌ ئه‌مه‌ خاڵی لاوازی ئێوه‌ نییه‌ که‌ بڵێن ده‌سه‌ڵاتمان نییه‌ به‌سه‌ر ئه‌و شوێنانه‌؟

فازڵ میرانی: به‌ڵێ خاڵی لاوازه‌ ئه‌گه‌ر لایه‌نی به‌رامبه‌ر که‌ یه‌کێتییه‌ تەفضيلی حکومه‌ت بوونی هه‌رێمی کوردستان له‌سه‌ر یه‌کێتی بوون بکات، پارتی دیموکراتی کوردستانیش حکومه‌ت بوونی هه‌رێمی کوردستان په‌سه‌ند بکات له‌سه‌ر پارتی بکات ئه‌مه‌ یه‌که‌م، دووه‌مییان ئێستاش ده‌ڵێم، پارتی و یه‌کێتی ده‌ست له‌ داهاته‌کانی هه‌رێمی کوردستان هه‌ڵبگرن من ده‌توانم ته‌ئمینی بودجه‌ی هه‌رێمی کوردستان بکه‌م به‌مووچه‌ی مانگانه‌ی ته‌واویش، ئه‌گه‌ر کاری له‌پێشینه‌ی ئێمه‌ مووچه‌ بێت، ئه‌گه‌ر وابکه‌ن داهات به‌ده‌ستی وه‌زاره‌تی دارایی بێت. “

فازڵ میرانی وتیشی“ وه‌زیری دارایی گۆڕانه‌ بۆچی قسه‌ناکات؟! ئه‌ی گۆڕان داوای گۆڕانکاری نه‌ده‌کرد؟! فه‌رموون ئه‌وه‌ وه‌زاره‌تی دارایمان داوه‌ به‌ گۆڕان براده‌رانی یه‌کێتی لێمان قه‌ڵسبوون وتیان بۆچی وه‌زاره‌تێکی گرنگتان داوه‌ به‌ گۆڕان، با وه‌زیری گۆڕان بێت له‌ په‌رله‌مان وه‌ڵامی خۆی بداته‌وه‌ ئه‌و به‌رپرسه‌ لێی، ئه‌بێت یان له‌گه‌ڵ دۆخه‌که‌ خۆیان بگونجێنن و قسه‌ نه‌که‌ن یان بێن قسه‌ بکه‌ن و به‌خه‌ڵک بڵێن فڵان که‌س به‌رپرسه‌ و فڵان یه‌که‌ی مه‌رزی به‌رپرسه‌ داهات نانێرێته‌وه‌ ئیتر ئیبراهیم خه‌لیله‌ یان باشماخه‌ ده‌بێت بڵێت داهاتی ئه‌م سنووره‌ نایه‌ت. “

 

-پرسیار: ده‌ڵێن ئێستا گۆڕان و یه‌کێتی تاوتوێی ئه‌وه‌ ده‌که‌ن له‌ حکومه‌تی هه‌رێمی کوردستان بکشێننه‌وه‌ وه‌کو حزبی یه‌که‌م و پێکهێنه‌ری حکومه‌ت هه‌ڵوێستان چی ده‌بێت؟

فازڵ میرانی: ئه‌گه‌ر هه‌ڵبژاردنی هه‌رێمی کوردستان ببێت، به‌ بڕوای من ئه‌زموونێکی تاڵتر به‌کاردێنن و براده‌رانی تر چه‌ندجار له‌ حکومه‌ت کشانه‌وه‌، یه‌کگرتوو له‌ حکومه‌ت کشانه‌وه‌ بۆئه‌وه‌ی کورسی بهێنن، کۆمه‌ڵ له‌ حکومه‌ت کشانه‌وه‌ بۆئه‌وه‌ی کورسی بهێنن ئه‌گه‌ر له‌به‌ر هه‌ڵبژاردنه‌ ده‌ڵێن، باخۆیان ماندوو نه‌که‌ن له‌حکومه‌ت کشانه‌وه‌ ڕابردوو ناسڕێته‌وه‌، واته‌ ئێستا ئه‌گه‌ر یه‌کێتی یان گۆڕان له‌ حکومه‌ت بکشێنه‌وه‌ ئه‌وه‌ی له‌ڕابردوو به‌رپرسبوون لێی، به‌رپرسیارێتیه‌که‌یان ناسڕێته‌وه‌ و هه‌رده‌مێنێت که‌واته‌ ئه‌م چه‌ند مانگه‌ی هه‌یه‌ هه‌تا دوای هه‌ڵبژاردن به‌رپرسن نابن. “

 

 

-پرسیار: ئێوه‌ ده‌توانن به‌ته‌نها هەرێم به‌ڕێوه‌به‌رن، واتە ده‌توانن ئیداره‌ی سلێمانی بکه‌ن؟

فازڵ میرانی: نه‌خێر به‌وشێوه‌یه‌ یه‌کێتی هاوکارمان نه‌بێت ئێمه‌ ناتوانین ئیداره‌ی سلێمانی بکه‌ین، ئه‌وه‌ ڕاسته‌قینه‌یه‌که‌ هه‌موو کوردان و خه‌ڵکی سلێمانیش ده‌زانێت یه‌کێتی ده‌ستبه‌رداری سلێمانی بێت حکومه‌ت سلێمانی به‌ڕێوه‌ ده‌بات به‌ڵام یه‌کێتی مه‌عقوله‌ ده‌ستبه‌رداری سلێمانی ببێت! “

 

-پرسیار: ئێوه‌ له‌گه‌ڵ هاوپه‌یمانیه‌ سێقۆڵیه‌که‌ گه‌یشتنه‌ کوێ، باس له‌وه‌ده‌کرێت درزی تێده‌که‌وێت به‌تایبه‌تی بابه‌تی سه‌در که‌ متمانه‌ی له‌سه‌ر نییه‌ یاخود سونه‌کان ئێستا کۆمه‌ڵێک خه‌ڵکیان هێناوه‌ له‌به‌رامبه‌ر حه‌لبوسیدا قسه‌ی به‌ڕێزتان چیه‌؟

فازڵ میرانی: واته‌ چی متمانه‌؟ متمانه‌ له‌نێوان ژن و مێردا هه‌یه،‌ به‌ڕه‌حمه‌ت بێت کاک نه‌وشیروان وای ده‌وت“ ئه‌گه‌رنا له‌نێوان حزبه‌کاندا به‌رژه‌وه‌ندی هاوبه‌ش هه‌یه‌، ئه‌وانه‌ی ئێمه‌ پێشتر له‌گه‌ڵی ڕێککه‌وتووین بۆ متمانه‌مان پێی هه‌بوو! سه‌ربازیان هێنا عه‌بادی ویستی بێته‌وه‌ و هه‌موو سنوره‌کان بگرێته‌وه‌ فیدڕاڵیه‌که‌ نه‌هێڵێت. “

 

-پرسیار: ده‌تانه‌وێت چی له‌ سه‌در و سونه‌کان سەوز و شین بکه‌ن وه‌کو کورد ده‌ڵێت؟

فازڵ میرانی: (بە پێکەنینەوە) پێمان بکرێت زه‌ردیان بکه‌ین باشتره‌ له‌جیاتی ڕه‌ش و سه‌وزیان بکه‌ین، به‌ڵام ئه‌مه‌ عێراقه‌، عێراقیه‌کان به‌داخه‌وه‌ خۆیان خستۆته‌ ناو سندوقێک کلیله‌که‌یان داوه‌ به‌ده‌ستی خه‌ڵکی و ناتوانن له‌ناو سندوقه‌که‌ بێنه‌ ده‌ره‌و،ه‌ ئینجا ئه‌و خه‌ڵکه‌ تورکیایه‌ یان ئێرانه‌، سعودیه‌، خه‌لیجه‌ ئه‌مه‌ حاڵی عێراقه‌ که‌ ده‌وڵه‌تێکه‌ له‌ سه‌روه‌ری وه‌همیدا ده‌ژی و له‌سه‌قامگیری مەنقوص- ناته‌واودا ده‌ژی، ئیراده‌یه‌کی عێراقی نییه‌ حوکمی عێراق بکات، ئه‌مه‌ واقیعێکه‌ و ئێمه‌ی کوردیش له‌مێژووه‌ هه‌تا ئێستا بووین به‌ به‌شێک له‌و عێراقه‌. “

 

-پرسیار: به‌ندین ڕێکانی ئاماژه‌ی به‌وه‌ کرد که‌ کاک مه‌سعود پرۆژه‌یه‌کی هه‌یه‌ بۆ عێراق بۆئه‌وه‌ی عێراق له‌م چه‌قبه‌ستویه‌ ڕزگار بکات، ئه‌و پرۆژه‌یه‌ به‌کوێ گه‌یشت؟

فازڵ میرانی: ئه‌وه‌ به‌ندین ده‌زانێت من نازانم پرسیار له‌ به‌ندین بکه‌ن. “

-پرسیار: به‌رای تۆ عێراق له‌م چه‌قبه‌ستوییه‌ ڕزگاری ده‌بێت؟

فازڵ میرانی: ئاسان نییه‌. “

“که‌س ناوێرێت هه‌ڵبژاردن بکاته‌وه‌ چونکه‌ ئه‌مجاره‌ خه‌ڵکه‌که‌ ناچنه‌وه‌ بۆ هه‌ڵبژاردن“

 

-پرسیار: هه‌ڵبژاردن دوباره‌ ده‌کرێته‌وه‌؟

فازڵ میرانی: ئه‌ویش ئاسان نییه‌، که‌س ناوێرێت هه‌ڵبژاردن بکاته‌وه‌ چونکه‌ ئه‌مجاره‌ خه‌ڵکه‌که‌ ناچنه‌وه‌ بۆ هه‌ڵبژاردن، خه‌ڵکی عێراق و خه‌ڵکی هه‌رێمی کوردستانیش بێزار بوون له‌ هه‌ڵبژاردن ، بۆ هه‌رێمی کوردستانیش ئه‌گه‌ر دۆخه‌که‌ وه‌کو عێراق بێت، ئێستای ئه‌م عێراقه‌ وه‌کو عێراقی پێش هه‌ڵبژاردن نییه‌، عێراق و هه‌رێمی کوردستان دوای ئه‌و هه‌ڵبژاردنه‌ ئاماده‌ نابێت بۆ هه‌ڵبژاردنێکی تر ئه‌مه‌ واقیعێکه‌، مرۆڤ ده‌بێت به‌چاوی خه‌ڵک ته‌ماشای خۆی بکات، به‌چاوی خۆی ته‌ماشای خۆی نه‌کات. “

“ئه‌گه‌ر ئێستا هەڵبژاردن لە هەرێمی کوردستان بکرێت، خه‌ڵک ده‌چێت به‌ڵام ئه‌گه‌ر دوو ساڵی تر بکرێت له‌وانه‌یه‌ خه‌ڵک نه‌ڕوات “

 

-پرسیار: له‌گه‌ڵ ئه‌وه‌ی ڕۆژی هه‌ڵبژاردن له‌لایه‌ن سه‌رۆکی هه‌رێمی کوردستانه‌وه‌ دیاریکراوه‌ بۆ 1ی ئۆکتۆبه‌ری ئه‌مساڵ، پێتانوایه‌ خه‌ڵک ناچێته‌ هه‌ڵبژاردن لە هەرێمی کوردستانیش وەک خۆت دەڵێی لە عێراق بەمجۆرەیە؟

فازڵ میرانی: ئه‌گه‌ر ئێستا هەڵبژاردن لە هەرێمی کوردستان بکرێت، خه‌ڵک ده‌چێت به‌ڵام ئه‌گه‌ر دوو ساڵی تر بکرێت له‌وانه‌یه‌ خه‌ڵک نه‌ڕوات. “

-پرسیار: بۆچی ئێستا بکرێت خەڵک دەچێت بۆ هەڵبژاردن، چۆن متمانه‌تان به‌خۆتان هه‌یه‌ که‌ خه‌ڵک بڕوات ده‌نگتان پێبدات، چیتان بۆ خه‌ڵک کردووه‌، ئه‌ی هه‌ست ناکه‌ن خه‌ڵک لێتان بێزاره‌ ؟

فازڵ میرانی: خه‌ڵکێک لێمان بێزاره‌ به‌ڵام خه‌ڵکێکی ثابت –نه‌گۆڕیشمان هه‌یه‌ له‌دوای ڕیفراندۆم خه‌ڵکێک هه‌یه‌ وتیان پارتی (فت) ته‌واوبوو، له‌دوای 1975 وتیان پارتی ته‌واو له‌دوای ئه‌م هه‌ڵبژاردنه‌ش هه‌میشه‌ پارتی کێرڤی به‌ره‌و سه‌ره‌وه‌ ڕۆیشتووه،‌ چونکه‌ ئێمه‌ سیاسه‌تێکی نه‌گۆڕمان هه‌یه‌ و واز له‌ ثوابت- نه‌گۆڕه‌کانی نه‌ته‌وایه‌تی کورد و کوردستان ناهێنیین، خراپترین دۆخ که‌ تووشی بووین له‌دوای ڕیفراندۆم بووه‌ له‌به‌رئه‌وه‌ ئێمه‌ خه‌ڵکێکی نه‌گۆڕمان هه‌یه‌ له‌جه‌ماوه‌ری حزبه‌که‌، خه‌ڵکێکی نه‌ته‌وه‌په‌رست و نیشتیمانپه‌روه‌ریش له‌ده‌ره‌وه‌ی ڕێکخستنی حزب زیاتر بڕواین به‌ئێمه‌ هه‌یه‌، ئیتر خه‌ڵکی تر له‌ ئێمه‌ خراپتربێت یان ئێمه‌ له‌ خه‌ڵکی تر باشتر بین ئه‌وه‌ ده‌گه‌ڕێته‌وه‌ بۆ ئه‌و خه‌ڵکه‌ی که‌ ده‌نگمان پێده‌دات. “

 

دەنگی ئەمەریکا:ئێوه‌ پێتانوایه‌ عێراق له‌ئێستادا چاره‌سه‌ری بۆ هه‌رێمی کوردستان و هه‌م بۆ عێراق چییه‌ بۆئه‌وه‌ی به‌ره‌و پێکهێنانی حکومه‌ت بچن یاخود ئاسۆکه‌ لێڵه‌ و ناتوانن پێشبینی بکه‌ن؟

فازڵ میرانی: به‌دیدی من حکومه‌تی عێراق دره‌نگ یان زوو پێکده‌هێنرێت، چونکه‌ ئه‌م دوو بلۆکی شیعه‌ ئێران واناکات شیعه‌ له‌یه‌کتری جیاببنه‌وه‌، به‌رای من شیعه‌ 10 خوله‌ک ئیشی به‌ سه‌رۆک کۆمار هه‌یه‌،ئه‌و 10 خوله‌که‌ی که‌ سه‌رۆک کۆمار سوێند ده‌خوات و سه‌رۆک وه‌زیران ڕێکده‌خات له‌وه‌ به‌دواوه‌ شیعه‌ و سونه‌ ئیشیان به‌ سه‌رۆک کۆمار نییه‌، کوردیش ئیشی پێیان نییه،‌ چونکه‌ هیچی پێناکرێت. “

 

-پرسیار: که‌واته ‌ئه‌م شه‌ڕه‌ی ئێوه‌ و یه‌کێتی له‌سه‌ر چییه‌؟

فازڵ میرانی: وه‌کو وتم ئه‌وه‌نده‌ ناهێنێت که‌ ئێمه‌ له‌سه‌ری شه‌ڕبکه‌ین. “

 

-پرسیار: له‌ به‌یاننامه‌که‌تاندا وه‌کو کۆبوونه‌وه‌ی ئه‌نجومه‌نی سه‌رکردایه‌تی پارتی جۆرێک له‌ نه‌ریمیتان نواندبوو له‌ به‌رامبه‌ر ئێران، به‌تایبه‌تی پاش بابه‌تی فرۆشتنی گازی سروشتی به‌ده‌ره‌وه‌ ئایا وه‌کو حیزبه‌که‌تان بڕیارتانداوه‌ له‌سه‌ر ئه‌و مامه‌ڵه‌یه‌تان به‌رده‌وام بن به‌تایبه‌ت له‌ئێستادا باس له‌وه‌ ده‌کرێت که‌ عێراق و به‌شێک له‌ وڵاتان ببنه‌ جێگره‌وه‌ی گازی سروشتی ڕوسیا بۆ وڵاتانی ئه‌وروپا، وه‌ پارتیش له‌گه‌ڵ ئه‌م سیاسه‌ته‌دایه‌ به‌ڵام یه‌کێتی و ئێران له‌گه‌ڵی نییه‌؟

فازڵ میرانی: مرۆڤ که‌ برسی بێت نانی گه‌نمی ده‌ست نه‌که‌وێت مه‌جبوره‌ نانی جۆ بخوات، واته‌ ئێمه‌ له‌و وڵاتانه‌ی که‌ کوردستانیان دابه‌شکردووه،‌ پارتی به‌ته‌نها ناتوانێت به‌ره‌نگاریان ببێته‌وه‌ چونکه‌ هه‌موویان دۆستی ئێرانن، به‌رژه‌وه‌ندی ئێمه‌ له‌ هه‌مووی زۆرتره‌ خێره‌ ئێمه‌ دژایه‌تی ئێران بکه‌ین! دۆستایه‌تی ئێمه‌ له‌گه‌ڵ ئێران له‌وان قوڵتربووه‌، سوپاسی ئێران ده‌که‌ین له‌ دۆخێکی زۆر زۆر ته‌نگانه‌دا یارمه‌تی پارتیان داوه‌ ،ئێمه‌ له‌دوای ئه‌وه‌ی جه‌نازه‌ی بارزانی نه‌مریان هێنا ئه‌و چاکه‌یه‌ی ئێرانمان هه‌رگیز له‌بیرناچێته‌وه‌. “

 

دەنگی ئەمەریکا: له‌سه‌ر فرۆشتنی گازی سروشتی ئێوه‌ بڕیارتانداوه‌ پاشه‌کشه‌ بکه‌ن؟

فازڵ میرانی: گازی سروشتی له‌ده‌ستی ئێمه‌دا نییه‌، گاز له‌ده‌ستی کاک بافڵه‌ ئه‌ی ئه‌وه‌ نییه‌ هه‌ڕه‌شه‌ ده‌کات ده‌ڵێت من گاز قه‌پات ده‌که‌م، من ده‌ڵێم سیاسه‌ت به‌ عینادی ناکرێت، سێ شت هه‌ن له‌ سیاسه‌تدا زۆر خراپه‌ میزاج، فیعل و ره‌دفیعل ، ئه‌وه‌ی تر ده‌رگا داخستنە، به‌داخه‌وه‌ جاری وا هه‌یه‌ کورد هه‌رسێکی به‌کارده‌هێنێت بۆیه‌ سیاسه‌ته‌که‌ به‌ڕاست نایه‌ته‌ به‌رچاوی ئێمه‌. “

 

-پرسیار: واته‌ ئه‌گه‌ر یه‌کێتی ڕازی بێت پارتی ئاماده‌یه‌ وه‌کو حکومه‌تی هه‌رێمی کوردستان که‌ پێکهێنه‌ری سه‌ره‌کین گاز بفرۆشن له‌ڕێگه‌ی تورکیاوه‌ بۆ وڵاتانی ئه‌وروپا؟

فازڵ میرانی: هه‌رچی له‌ هه‌رێمی کوردستان به‌رهه‌م بهێنرێت بازاڕی بۆی هه‌بێت ئه‌ی چۆن ئه‌ی به‌چی بژین؟! ئه‌ی نابێت ئه‌و نه‌وت و گازه‌ی هه‌مانه‌ بیفرۆشین ! “