سەردێر

حاكم قادر؛ پێویستە ڕێگە بەهاوردەكردنی دەرمانی خراپ و بێ كوالێتی نەدرێت

خەڵك –
ئەندامێكی ئەنجومەنی باڵای سیاسی و بەرژەوەندی یەكێتی ڕایدەگەیەنێت، كە پێوستە گرنگی زیاتر بە سەندیكا و ڕێكخراوەكانی كۆمەڵگەی مەدەنی بدرێت و ئازادی زیاتریان بۆ فەراهەم بكرێت ، دەشڵێت،” نابێت ڕێگە بە هاوردەكردنی دەرمانی خراپ و بێ كوالێتی بدرێت، چونكە ڕاستەوخۆ پەیوەندی بە ژیان و تەندروستی هاووڵاتیانەوە هەیە”.

حاكم قادر حەمەجان، ئەندامی ئەنجومەنی باڵای سیاسی و بەرژەوەندی یەكێتی، سەردانی سەندیكای پزیشكانی كوردستانی كرد و تاوتوێی چەندین پرسی گرنگیان كرد، كە ڕاستەوخۆ پەیوەندیان بە ژیان و تەندروستی هاووڵاتیانەوە هەیە و ڕۆڵی سەندیكاكەی پزیشكانی بەرز نرخاند.
لەو دیدارەدا حاكم قادر داوایكرد، گرنگی زیاتر بە سەندیكا و ڕێكخراوەكانی كۆمەڵگەی مەدەنی بدرێت و ئازادی زیاتریان بۆ فەراهەم بكرێت، سەندیكا و ڕێكخراوەكانیش لە كاتی خۆیدا كۆنگرە ببەستن و ڕێگە نەدرێ هیچ حزب و لایەنێكی سیاسی دەست لە كاروباریان وەربدەن و بۆ بەرژەوەندی خۆیان قۆرخییان بكەن.

جەختیشیكردەوە، پێویستە سەندیكای پزیشكان و دامودەزگا پەیوەندیدارەكانی حكومەتی هەرێم و هەموو لایەك، ڕێگە بە هاوردەكردنی دەرمانی خراپ و بێ كوالێتی بۆ ناو هەرێمی كوردستان نەدەن، كە هەندێ جار دەرمان بە بێ پشكنین لە كوالێتی كۆنتڕۆڵ لە لایەن ژمارەیەك كۆمپانیای مشەخۆرەوە هاوردە دەكرێت كە ئەو كارە زۆر مەترسی دارە، چونكە ڕاستەوخۆ پەیوەندی بە ژیان و تەندروستی هاوڵاتیانەوە هەیە.

سەبارەت بە زیادكردنی باجیش لەسەر پزیشك و نۆرینگەكان و چاودێری نەكردنی نرخی داو و دەرمان لە دەرمانخانەكان، حاكم قادر ڕونیكردەوە، زیادكردنی باج لەسەر پزیشكان و نۆرینگەكان دەبێتە بارگرانییەكی تر بۆ سەر هاوڵاتیان چونكە لە كۆتایدا هەر نەخۆشەكان و هاوڵاتیان دەبێت ئەو باجە بدەن.





هەلبژاردە

گرنگترینەکان