سەردێر

زیادبوونی باج بازاڕی پەكخستووە و بێكاری زیادكردووە

خەڵك-

زۆربوونی باج و ڕسومات هەرێمی كوردستان بەشێوەیەكی نادادپەروەری و هەڕەمەكی، كاریگەری لەسەر داهات و كاروكاسبی دروست كردووە و هەندێك دوكان و كارگە و كۆمپانیاكانیان داخستووە بەهۆی ئەوەی سەرجەم داهاتەكەیان بەشی باج و رسوماتی حكومەت ناكات، ئەمەش بووەتە هۆی زۆربوونی بێكاری لە هەرێمی كوردستان و داخستنی دوكان و كارگەكان و پەككەوتنی بازاڕ.

سەعدوڵڵا حەمەدئەمین شارەزای ئابووری بە (خەڵك)ی ڕاگەیاند، بەردەوامبوونی ئەم جۆرە سیاسەتەی ئابووری لە هەرێم دەبێتەهۆی ئەوەی بە بەردەوامی كارگەكان دابخرێن، بەتایبەت كارگە بچوك و مامناوەندەكان، دواتر دەبێتەهۆی زۆربوونی بێكاری و دواتر دەبێتەهۆی گرانبوونی نرخی شمەك و كاڵا.

وتیشی”ئەو بازرگانانەی كە باج دەدەن، ڕێژەی باجەكە دەخەنەسەر شمەك و كاڵا و دواتر گران دەبێت و باجەكەی هاووڵاتیان دەیدەن”.

ڕوونیشیكردەوە، كاتێك حكومەت مووچەی دەبڕی دۆخی هاووڵاتیان باشتر بوو تاكو ئێستا، چونكە كاتێك داهات زیاد دەبێت ئەگەر لەبەرانبەردا نرخی شمەك زیاتر بەرز بووەوە، ئەوكات هاووڵاتی زیان دەكات وەكو ئێستای مووچەخۆرانی هەرێم، بەتایبەت ئەوانەی مووچەكەیان دیاریكراوە، چونكە بەرزی نرخی شمەك وایلێهاتووە داهاتە نەختینەییەكەی كەم بووەتەوە.
ئاشكراشیكرد، بەپێی وتەی پەڕلەمانتاران تەنها داهاتی نەوت بەسە بۆ مووچە، ئەو باج و ڕسوماتە زیادەیە، لە ڕووی ئابوورییەوە بیانووی حكومەتی هەرێم بۆ وەرگرتنی باج بۆ مووچە بەراورد بە حكومەتەكانیتر نایپێكێت و بەشێكە لە گەندەڵی، ئەگەر ئەم دۆخەش بەردەوام بێت گەنجان كار بۆ ئەوە دەكەن ڕوو لە دەرەوەی وڵات بكەن، چونكە پێیانوایە ئەو بارە نالەبارەی ئەوانی تێدان و بەردەوام بوون تیایدا دۆخیان بەرەو خراپتر دەبات.