سەردێر

هەڤاڵ ئەبوبەكر: هەوڵدەدەین بەنزینی هەرزان لە بەنزینخانەكان دابەش بكرێت

خەڵك-

پارێزگاری سلێمانی ڕایدەگەیەنێت، تا ئەوكاتەی سوتەمەنی لەدەستی پارێزگاكان بوو، لە چوار ساڵی ڕابردوودا كواڵیەتیەكەیمان پاراستووە و نرخەكەشی بەردەوام ڕوو لەداشكاندن بووە.

هەڤاڵ ئەبوبەكر پارێزگاری سلێمانی بە دەنگی ئەمریكای ڕاگەیاند، حكومەتی خۆجێی سلێمانی مافی دابینكردنی سووتەمەنی نییە، ئەوكاتەی دەسەڵاتەكان لای ئێمە بوون تا 9-2-2021 لە چوار ساڵی ڕابردوودا كواڵیەتیەكەیمان پاراستووە و نرخەكەشی بەردەوام ڕوو لەداشكاندن بووە چ قەبارەی خستنەڕوو بۆ بازاڕ قەبارەی پێویست بووە كە پارێزگاكەمان پێویستی پێیەتی، لەدوای ئەوەوە بڕیاری كە دەرچووە كە ئەم ڕەسیدەی كە بازرگانەكان سوتەمەنی پێ داخل دەكەن چووەتەوە وەزارەتی سامانە سروشتیەكان.

وتیشی”هۆكارەكان بۆ بەرزبوونەوەی نرخی بەنزین زۆرن، بەڵام هەركەسێك دەستپێشخەری هەیە بۆئەوەی نرخی بەنزین دابەزێنێت بەمەرجێك كواڵتیەكەی بپارێزێت و بەڕێگەی ڕێگەپێدراوی خۆی بیگەیەنێتە هاووڵاتیان سوپاسی دەكەین و دەستخۆشی لێدەكەین، ئەوەی لە ڕابردووشدا بووە ئێمە سوپاسی ئەو بەڕێزانە دەكەین كە ئەو دەستپێشخەریەیان كردووە، داوای ئێمە لەوان تەنها ئەوەیە كە كوالێتیەكەی وەكو هەموو بەنزینێكی تر دەبێت بەپێی مەرجەكانی وەزارەتی سامانە سروشتیەكان بێت كە مەرجی ڕێگەپێدراوە لە عێراقدا، دووەمشیان باشتروایە لە بەنزینخانەدا ئەم خزمەتگوزارییە پێشكەش بكرێت بۆئەوەی لەڕووی ئاگركەوتنەوە و سەلامەتی و پاراستنی گیانی شۆفێرەكان و سەرنشینان و ئەو شوێنەشی كارەكەی لێدەكرێت پارێزراو بێت.”

ڕوونیشیكردەوە، نەوەی نوێ لە دابینكردنی بەنزین بە نرخی هەرزانتر كاری كوالێتی بۆ كراوە و لەڕووی شوێنەكەشەوە لەگەڵ چ بەنزینخانەیەك ڕێكدەكەون ئێمە هانی بەنزینخانەكانمان داوە كە هاوكار و هەماهەنگیان بن، بەلای ئێمەوە گرنگە ئەگەر لیترێك بەنزینیش بووە بە نرخێكی گونجاو بگات بەدەستی هاوڵاتییان، بۆیە ئێمە بەهیچ جۆرێك ڕێگر نابین لەمەسەلەی نرخدا، ئەوەی بەلای ئێمەوە گرنگە كوالێتی و سەلامەتیە، باقیەكەی تری دەكەوێتە سەر ئەو لایەنەی دابینی دەكات پێویست دەكات لە شوێنێك ئەم خزمەتگوزارییە پێشكەش بكات كە دواجار خوانەكردە گرفتی لێنەكەوێتەوە.