سەردێر

“عێراق ناتوانێت سەروەری ناوچەی سەوز بپارێزێت، چ جای بگاتە ناوچە سنوورییەكان”

خەڵك-

بەرپرسی فەرمانگەی پەیوەندییەكانی دەرەوە ڕایدەگەیەنێت، هۆكاری گرژی نێوان پەكەكە و پێشمەرگە بۆ ئەوە دەگەڕێتەوە پێشمەرگە ویستوییانە بگەڕێنەوە بۆ ئەو ناوچانەی كە پێشتر چۆڵیان كردبوو.

سەفین دزەیی بەرپرسی فەرمانگەی پەیوەندییەكانی دەرەوەی حكومەتی هەرێمی كوردستان بە دەنگی ئەمریكای ڕاگەیاند، پێشمەرگە هەوڵیداوە بەهیچ شێوەیەك ڕووبەڕوونەوە نەبێت، بەڵام لە چەندین حاڵەت بووە كە پەكەكە تەقەی لە پێشمەرگە كردووە و ڕێگاكانی مین ڕێژ كردووە و دەستدرێژی كردووەتەسەر ئەفسەری ئاسایش، ئەوەش بووەتەهۆی ناڕەزایی و حكومەت و پێشمەرگە بەهیچ شێوەیەك لەگەڵ شەڕ و پێكدادان نەبوون، بەڵام لە هەمانكاتیش ئەو دەستدرێژیانە قبوڵ ناكەن.

دەربارەی دەنگۆی مەترسی هەڵگیرسانی (شەڕی كورد و كورد) ناوبراو ئاشكرایكرد، هێزی پێشمەرگە موكەلەفە لەوەی گیان و سەروماڵی خەڵك بپارێزێت، كە هەموو دەڤەرەكە دەگرێتەوە، بەڵام بەمانای ئەوە نایەت هێزی پێشمەرگە بیەوێت بچێت شەڕی هیچ لایەنێك بكات، خۆمان شەڕ و ئاژاوە و ماڵوێرانیمان بینیووە بەسە ئیتر خەڵكی كوردستان بێزاربوون.

وتیشی”حكومەت و پێشمەرگە بەهیچ شێوەیەك لایەنگری شەڕ و پێكدادان و گرژی نیین، بەڵام دەبێت پەكەكەش دان بەخۆیدا بنێت و بەخۆدا بچێتەوە خۆی بە خاوەن ماڵ نەزانێت، چونكە خاوەن ماڵ نییە، بەڵكو پەكەكە لە باكورەوە هاتووەتە ئێرە و دەیەوێت ئیدارە و ئیرادەی خۆی فەرز بكات لەسەر هەرێمی كوردستان، لە ناوچەی قەندیل كۆمەڵێك گوند لەو ناوچانە هەیە لێناگەڕێت خزمەتگوزاریان پێبگات، پەكەكە ئیدارەی خۆی فەرز كردووە، دادگا و زیندانی خۆی داناوە و ئایدیۆلۆژیای پەكەكە لەوێ لە قوتابخانەكان بڵاودەكاتەوە ئەوانە بە ڕاستی قابیلی قبوڵ نییە.

ئاشكراشیكرد، بەداخەوە خەڵكی مەدەنی زیانمەندی یەكەمن چ لەدەست پەكەكە چ لەدەست ئەو لەشكركێشیانەی لە توركیاوە دەكرێت لەسەر ناوچەكە.

سەبارەت بە هەڵوێستی حكومەتی هێراق دزەیی ڕایگەیاند، زۆر باسكراوە و هەموو لایەكیش زۆر پەرۆشن، بەڵام نابێت ئەوەشمان لەبیر بچێت بەداخەوە ئەو قسەیە دەكەم، حكومەتی عێراقی ناتوانێت سەروەری ناوچەی سەوز بپارێزێت لە بەغدا چ جای بگات بە ناوچە سنوورییەكان، ڕێككەوتنێكمان هەیە لەگەڵ بەغداد لەسەر مەسەلەی شەنگال هەتا ئێستا یەك هەنگاو نەچونەتە پێش بەپێچەوانەوە چەندین هەنگاو چوونەتە دواوە.