سەردێر

زانیاری نوێ لەبارەى پڕۆژەى ئۆتۆبانی بابان

بڕیارە لە ئابی ٢٠٢٣ قۆناغی یەكەمی تەواوببێت

سلێمانی – نزار جەزا

 

پڕۆژەی ئۆتۆبانی بابان بەگوژمەی ٤٠٠ ملیار دینار لەشاری سلێمانی جێبەجێدەكرێت، كە ئێستا زۆرێك لەكێشەكانی چارەسەركراون‌و كارەكانی خێراتربوون، بۆیە بڕیارە لە ئابی ٢٠٢٣ قۆناغی یەكەمی تەواوببێت.

 

بڕیارە لەسەرەتای مانگی هەشتی ئەمساڵدا بڕین و پڕكردنەوەی ٣٢ كیلۆمەتری قۆناغی یەكەمی كۆتایی پێبێت.

 

كاتێك سەردانی مەیدانی پرۆژەكەمان كرد، لەگەڵ سەرپەرشتیارانی پڕۆژەكە، دیاربوو هەلی كار بۆ نزیكی هەزار كەس دابینكراوە، لەگەڵ ئەو كەسانەشی لە دەرەوە هاوكاری دەكەن.

 

بۆ زیانلێكەوتووانی پرۆژەی ئۆتۆبانی بابان، كە زەوییەكانیان بەر شەقامەكە كەوتوون، لیژنەیەك بەپێی یاسا قەرەبوویان دەكاتەوە.

 

بەوتەی سەرپەرشتیارانی پڕۆژەكە، كۆمەڵێك پێداویستی كوالێتی بەرز بەكاردێنن، كە تا ٢٥ ساڵی دیكە پێویستییان بە نۆژەنكردنەوە نابێت.

 

قۆناغی یەكەمی پڕۆژەكە لەشارۆچكەی تاسڵوجەوە بۆ گوندی دەمركانی سنوری ناحیەی عەربەتە، كە لە ٣٢ كیلۆمەتر پێكدێت.

 

ئەم پڕۆژەیە لەبەرواری ١١/٧/٢٠٢٠ بەردی بناغەی لە شارۆچكەی تاسڵوجە دانرا، ماوەی تەواوبوونیشی هەزار و ١٠٠ ڕۆژە.

 

لە قۆناغی یەكەمدا، چوار سایدی هاتن و چوون دروستدەكرێن، بەشێوەیەك دووی سەرەكی بە پانی 21 مەتر و دووی خزمەتگوزاری بەپانی نۆ مەترن.

 

هەر لەم قۆناغەدا حەوت یەكتربڕ و پێنج ئەندەرپاس و ٦٨ ئاوبارە دروستدەكرێن.

 

ئاری عەلی ئەندازیار و سەرپەرشتیاری ١٠ كیلۆمەتری سەرەتای پڕۆژەی ئۆتۆبانی بابان دەڵێت لەسەرەتای مانگی نۆیەمی كاركردندان، تیمەكانیان بۆ چەند زۆنێك دابەشكردووە و بەشەو و ڕۆژ كاردەكەن.

 

خێرایی ڕۆشتنی ئۆتۆمبێل ١٢٠ كیلۆمەترە لەكاتژمێرێكدا، بۆیە لەهەردوو لای شەقامەكەوە بەدووری ١٠٠ مەتر لەناوەڕاستی شەقامەكەوە سیاجێك دروستدەكرێت، بۆ ئەوەی هاووڵاتییان و گیانلەبەران نەتوانن بچنە ناو شەقامەكەوە.

 

پردێكی گەورە بەدرێژی ٤٩٥ مەتر لەسەرچەمی تانجەرۆ دروستدەكرێت بە پانیی ١٠٠ مەتر بە دوو ئاڕاستەی چەپ ‌و ڕاست، بەهەردووكیان ١٨ ئۆتۆمبێل دەگرێت.

 

دوای سنوری تاسڵوجە، چوینە تانجەرۆ، لەوێ بینیمان پردی تانجەرۆ بەردەوام كاری تێدادەكرێت و هەنگاوی باشی بڕیوە، پردێك كە دەبێتە نمونەی پرۆژەیەكی پێشكەوتووی لەئاستی هەرێمی كوردستاندا.

 

لەم پردەدا كار بۆ دروستكردنی ٥٧٥ پایەڵی ١١ مەتری لەژێر زەوییدا دەكرێـت بۆ پتەوی پردەكە.

 

ئەبوبەكر تەیب بەڕێوەبەری پڕۆژەی ئۆتۆبانی بابان و لێپرسراوی بەشی پڕۆژەكان لەشارەوانی سلێمانی لەسەر ماستەرپلانی سلێمانی وردەكاری جێبەجێكردنی پڕۆژەكەی خستەڕوو، کە لەڤێدۆکەدا خراوەتەڕوو.

 

هەروەها ڕوونكردنەوەی لەبارەی بەرەوپێشوونی پڕۆژەكە و چارەسەركردنی بەربەست و زیادەڕۆییەكانی بەردەم پڕۆژەكەدا و دەڵێـت بەشێكی زۆر لەو كێشانە چارەسەركراون.

 

پڕۆژەی ئۆتۆبانی بابان یەکێکە لەپڕۆژە ستراتیژییەکانی سلێمانی، کە  بەگوژمەی ٤٠٠ ملیار دینار جێبەجێدەكرێت، كە ئێستا زۆرێك لەكێشەكانی چارەسەركراون‌و چاوەڕواندەکرێت لە ئابی ٢٠٢٣ قۆناغی یەكەمی تەواوببێت.