سەردێر

خەڵك؛ ڕاستی و دروستی بڕیاری قەدەغەی هاتووچۆ لە هەرێم بڵاودەكاتەوە

خەڵك-

بەپێی نووسراوێك، كە واژوی وەزیری ناوخۆی حكومەتی هەرێمی كوردستان لەسەرە، قەدەغەی هاتوچۆ و پیادە لە تەواوی پارێزگاكانی هەرێم لە كاتژمێر 8ی شەو بۆ 6ی بەیانی و تەنها ڕێگا بە هاتوچۆی ئۆتۆمبێلی هێزە ئەمنییەكان و تیمە تەندروستییەكان و ئۆتۆمبێلی ئەمبۆڵانس ئەوانەی لە ئەركی فەرمیدان.
بەپێی بڕیارەكە، كاتژمێر 8ی ئەمشەو بڕیارەكە جێبەجێ دەكرێت.

دوو سەرچاوەی بەرپرس لە وەزارەتی ناوخۆی حكومەتی هەرێم و پارێزگای هەولێر بۆ (خەڵك) پشتڕاستیان كردەوە، كە ئەو نووسراوەی بە ناوی وەزیری ناوخۆوە بڵاوكراوەتەوە ڕاستە، بەڵام هێشتا واژۆی كۆتایی نەكراوە و نەبووە بە بڕیاری فەرمی.

سەرچاوەكان وتیشیان، “ئەو نووسراوە وەكو پێشنیار دەخرێتە بەردەم لیژنەی باڵای ڕووبەڕووبووونەوەی كۆرۆنا و ئەگەر دەنگی پێ‌ بدرێت ئەوا دەبێتە بڕیاری فەرمی و ئەگەری گۆڕانكاریش هەیە تیایدا”.

ئەمەش لەكاتێكدایە، بڕیارە 10ی ئەم مانگە لیژنەی باڵای ڕووبەڕووبوونەوەی كۆرۆنا كۆببێتەوە و بەپێی زانیارییەكان، دەرگای قوتابخانەكانیش ناكرێنەوە.

No description available.