سەردێر

خوێندنی باڵا پۆستی سەرۆكی ژمارەیەك زانكۆ ڕادەگەیەنێت

خەڵك-
وەزارەتی خوێندنی باڵا، پۆستی سەرۆكی ژمارەیەك زانكۆ ڕادەگەیەنێت و دەڵێت، هەر كەسێك ئارەزوی هەیە و مەرجەكانی تێدایە دەتوانێت لە ماوەی دیاریكراودا (C.V) پێشكەش بكات، تا ناوی لە لیستی پێشكەشكاراندا تۆمار بكرێت.

بەپێی ڕاگەیەندراوێك كە ئەمڕۆ دوو شەممە لەلایەن وەزارەتی خوێندنی باڵا و توێژینەوەی زانستی بڵاوكرایەوە”لە چوارچێوەی ڕێنماییەكاندا پۆستی سەرۆكی (6) زانكۆ و سەرۆكی ئەنجومەنی باڵای كوردستان بۆ پسپۆڕییە پزیشكییەكان ڕادەگەنن، هەر كەسێكیش ئارەزوی هەیە و مەرجەكانی تێدایە دەتوانێت لە ماوەی دیاریكراودا (C.V) و داواكارییەكەی پێشكەش بكات، تا ناوی لە لیستی پێشكەشكاراندا تۆمار بكرێت”.

هەر لە ڕاگەیەندراوەكەدا هاتووە”پۆستەكان لە – سەرۆكی زانكۆی سەڵاحەددین – هەولێر، – سەرۆكی زانكۆی سۆران، سەرۆكی زانكۆی هەولێری پزیشكی، – سەرۆكی زانكۆی دهۆك، سەرۆكی زانكۆی پۆلیتەكنیكی دهۆك، ەرۆكی زانكۆی زاخۆ، سەرۆكی ئەنجومەنی باڵای كوردستان بۆ پسپۆڕییە پزیشكیەكان، پێكدێن”.

مەرجەكانیش وەك لە ڕاگەیەندراوەكەدا دیاریی كراون، بریتین لە”پۆستی سەرۆكی زانكۆ پێویستە هەڵگری بڕوانامەی دكتۆرا بێت، نازناوی زانستی لە پرۆفیسۆری یاریدەدەر كەمتر نەبێت، خزمەتی زانكۆیی لە (10) ساڵ كەمتر نەبێت، بۆ پۆستی سەرۆكی ئەنجومەنی باڵای كوردستان بۆ پسپۆڕییە پزیشكییەكان، دەبێت هەڵگری بڕوانامەی بۆرد یان دكتۆرا یان هاوتاكەی بێت لەیەكێك لە بوارە پسپۆڕیە پزیشكییەكان، نازناوی زانستی لە پرۆفیسۆر كەمتر نەبێت”.

ئەو بەڕێزەی كە داواكاری پێشكەش دەكات باشترە دیدو بۆچون و بەرنامەی كاری خۆی پێشكەش بكات بۆ بەرەو پێش بردنی زانكۆكەی بۆ ئەو چوار ساڵەی كە پۆستەكەی بەردەوام دەبێت، زانینی زمانی ئینگلیزی و شارەزایی لەبەكارهێنانی تەكنۆلۆجیای بواری خوێندن و فێركردن كارایی بڵاوكردنەوەی توێژینەوەی زانستی هەلی زیاتر بۆ پێشكەشكار دەڕەخسێنیت”.

وەزارەتی خوێندنی باڵا و توێژینەوەی زانستی دەڵێت”دواین كات بۆ پێشكەشكردنی (C.V) و پوختەی ڕاژە كۆتایی دەوامی ڕێكەوتی 2021/3/16 ڕۆژی (سێشەمە) دەبێت.و پێویستە پوختەی ڕاژەی لەلایەن بەرپرسی یەكەمی فەرمانگەكەیەوە واژوو كرابێت، هەر بەڕێزێكیش ئارەزوی هەیەو مەرجەكانی پێشكەشكردنی هەیە، دەتوانی (C.V) و پوختەی ڕاژەی ڕاستەوخۆ بۆ بەڕێوەبەرایەتی بەدواداچوونی پۆستەكان لە دیوانی وەزارەت لە ڕێگەی ئەم ئیمیلە ([email protected]) بنێرێت”.