سەردێر

سەركردەیەكی داعش لە توركیا دەستگیركرا

كچێكی ئێزدی لەگەڵدا بوو

خەڵك-

دەسەڵاتدارانی توركیا، سەركردەیەكی ڕێكخراوی داعش لە ئەنقەرەی پایتەختی وڵاتەكە دەستگیردەكەن كە كچێكی منداڵی ئێزدی لەگەڵدا بووە.

بەپێی ئاژانسی (ئەنادۆڵ)ی توركی، بەڕێوەبەرایەتی ئاسایش و هەواڵگری توانی كەسێكی عیراقی دەستگیربكات كە گومانی لێدەكرا پۆستی سەركردایەتی لە ڕێكخراوی داعشدا هەبێت لە شاری موسڵ”.

 

ئاژانسەكە نوسیویەتی”هەواڵگری و تیمەكانی بنبڕكردنی تیرۆر، چاودێری گومانلێكراو (س.و)یان كردووە و بۆیان دەركەوتووە كە تائێستاش بەردەوامە لە چالاكییەكانی لە چوارچێوەی ڕێكخراوی داعش و ئەفسەری سوپای پێشووی عیراق بووە”.

 

تیمەكانی توركیا بۆیان دەركەوتووە گومانلێكراوەكە كچێكی منداڵی ئێزدی تەمەن 7 ساڵانی لەگەڵدايە كە وەك غەنیمەی جەنگ تەماشای كردووە.

 

ئەنادۆڵ دەڵێت، ئۆپەراسیۆنی دەستگیركردنەكە بە وردی لە بەرەبەیانییەكی زوودا ئەنجامدراوە، تا كچە منداڵەكە زیانی پێنەگات و توانراوە گومانلێكراوەكە لەگەڵ كەسێكی تردا دەستگیربكرێت و كچە مندالەكەش ڕادەستی بەڕێوەبەرایەتی خێزان و كار و خزمەتگوزاریی كۆمەڵایەتی بكرێت لە ئەنقەرە.