سەردێر

سزادانی چالاکوانەکانی بادینان ناڕەزایەتی لێکەوتەوە

خەڵک – بەشی هەواڵ

ئەمڕۆ چوار شەممە بەشێک لەچالاکوانان ناڕەزایەتییان لەبەرامبەر سزادانی پێنج چالاکوان و ڕۆژنامەنوس بەشەش ساڵ زیندانی دەربڕی.

 

لەبەردەم دادگای سلێمانی بەشێک لەچالاکوانان گردبوونەوەیەکیان ئەنجامدا و تێیدا داوایان کرد،  پێداچوونەوە بەسزادانی هەریەکە لەو پێنج چالاکوان و ڕۆژنامەنوسە بکرێتەوە، بۆئەوەی ئازادبکرێن، چونکە پێیانوایە سزادانەکەیان دادپەروەرانە نییە.

 

دوێنێ لەدادگای هەولێر پینج چالاکوان و ڕۆژنامەنوس بەشەش ساڵ زیندانی سزادران، ئەمەش ناڕەزایەتی لەناو چین و توێژە جیاوازەکانی هەرێمی کوردستان لێکەوتەوە.

 

ئومێد پاڵانی پارێزەر لەشاری هەولێر ڕایگەیاند، ئەو کەسانە بەپێی بەپێی ماددە ( ١ ) ی  یاسای  ژمارە (٢١)ی ساڵی ٢٠٠٣  پێ سزادران، کە دەقی ماددەکە بەم جۆرەى خوارەوەی:

 

“ماددەى ١٥٦ لەیاسای سزاکانی عیراقی ژمارە ١١١ی ساڵی ١٩٦٩ی هەموارکراو لەکاردەخرێ و ئەمەی خوارەوە لەهەرێمی کوردستانی عیراقدا جێگەیدەگرێتەوە: (هەرکەسێک بەدەستی ئەنقەست بەهەرشێوەیەک دەبێ، ببێ لەکارێکدا تێوەگلێ بەمەبەستی زیاندان لەئاسایش و سەقامگیری و سەروەریی دامودەزگاکانی هەرێمی کوردستانی عیراق و ببێتە هۆی کەوتنەوەى ئەو زیانە، بەبەندکردنی هەتا هەتا یان یان بەبەندکردنی کاتی سزادەدرێن)”.

 

پارێزەر ئاسۆ هاشم کە پارێزەری ئەو چالاکوان و ڕۆژنامەنوسانەبوو، پێیوایە، داواكاری گشتی بێلایەن نەبوو، بگرە دەوری زۆرخراپ و مەترسیداری گێڕا.

 

لەتۆڕەکۆمەڵایەتییەکانەوە نیگەرانی زۆر کەوتۆتەوە، بەهۆی ئەوەی پێیانوایە ئەم سزادانە چاوترساندنی ئازادیخوازانە.

لەبەرامبەر ئەم ڕایەدا بەشێکی دیکە پێیانوایە ئەم چالاکوانانە زیانیان بەئاسایش و ئارامی و سەقامگیری گەیاندووە، بۆیە سزادراون.

ئەمڕۆش ئەنجومەنی دادوەری هەرێم وەڵامی ناڕەزایەتییەکانی دایەوە و پێداگیری کرد لەوەی، بڕیارەکە لەسەر بنەمای دادگەری بووە و  پڕۆسه‌ی دادگاییكردنه‌كه‌ش به‌ شێوه‌یه‌كی ئاشكرا و شه‌فاف و به‌ ئاماده‌بوونی ژماره‌یه‌كی زۆر له‌ په‌رله‌مانتاران و نوێنه‌ری كۆنسولی وڵاتان و پارێزه‌رانی كه‌یسه‌كه‌ و نوێنه‌ری رێكخراوه‌كانی مافی مرۆڤ و رۆژنامه‌نووس و ده‌زگاكانی راگه‌یاندن به‌ڕێوه‌چووه.

 

ئەنجومەنی دادوەری ڕاشیگەیاند، ڕێكاری یاسایی هه‌یه‌ بۆ تانه‌ لێدان له‌و بڕیاره‌و بێگومان پارێزه‌رانی كه‌یسه‌كه‌ تانه‌ پیشكه‌ش به‌ دادگای پێداچوونه‌وه‌ ده‌كه‌ن، ئیتر پێویست به‌و هه‌موو لێدوان و ده‌ستێوه‌ردانه‌ له‌ كاروباری ده‌سه‌ڵاتی دادوه‌ری نه‌ده‌كرد.

 

نزیکی شەش مانگە ئەو ڕۆژنامەنوس و چالاکوانانە ڕاگیرابوون، بۆیە دوێنێ دادگاییەکە بە سه‌رۆكایه‌تی سه‌رۆكی یه‌ده‌گی دادگای تاوانی هه‌ولێر/2 به‌ڕێوه‌چوو.