سەردێر

مامۆستایان، بایكۆتی هۆڵەكانی خوێندن دەكەن

خەڵك-

ئەندامێكی ئەنجومەنی مامۆستایانی ناڕازیی ڕایدەگەیەنێت، سوورین لەسەر هەڵوێستی ڕابردوومان كە بایكۆتی هۆڵەكانی خوێندنە.

دوێنێ ئالان حەمە سەعید وەزیری پەروەردەی حكومەتی هەرێمی كوردستان لە كۆنفڕانسێكی ڕۆژنامەوانیدا ڕایگەیاند، ئەگەر لیژنەی باڵای ڕووبەڕووبوونەوەی كۆرۆنا ڕێگامان بدەن كردنەوەی دەرگای قوتابخانەكان لەو وادەیەی دیاریمان كردبوو پێشیدەخەین.

وتیشی”بڕیار بوو سەرەتای مانگی ئادار دەرگای قوتابخانەكان بكەینەوە، بەڵام ئەگەر دۆخەكە لەبار بێت 6ی مانگی داهاتوو دەرگای قوتابخانەكان دەكەینەوە”.

سەبارەت بە هەڵوێستی مامۆستایانی ناڕازی عادل حەسەن ئەندامی ئەنجومەنی مامۆستایانی ناڕازی بە (خەڵك)ی ڕاگەیاند، لە دوا بەیاننامە بە ڕوونی قسەی خۆمان كردووە، بایكۆت هەڵوێستێكی خۆڕسكانەی مامۆستایانە و ئەو بڕیارەیان داوەو ئێمەش پشتیوانی ئەو هەڵوێستەیان دەكەین.

وتیشی”بایكۆت هەڵوێستێكی خۆڕسكانەیە كە گیرفانی بەتاڵی مامۆستایان پێی كردوون”.

ئاشكراشیكرد، پڕۆسەی خوێندن لە هەرێمی كوردستان لەلایەن حكومەتەوە فەوتێنراوە و هەرچی بەرپرسیارێتییەكیش كە دروست دەبێت حكومەت لێی بەرپرسە.