سۆمۆ لەبارەی وەرگرتنی نەوتی هەرێمەوە ڕاگەیەنراوێكی بڵاوكردەوە
خەڵك- كۆمپانیای بەبازاڕكردنی نەوتی عیراق (سۆمۆ) ڕەتیدەكاتەوە…
زیاترسەردێر
-
خەڵك- نەخۆشخانەی پێشمەرگە لە هەولێر بە تەواوی كرایەوە و ئامادەیە بۆ پێشوازیكردن لە نەخۆشانی پێشمەرگە و چارەسەركردنیان لە بەشەكانی ئێسك و شكان و هەناو و پێست و قوڕگ و لوت و گوێ و دەمارو بڕبڕەی پشت، هەروەها بەشەكانی تیشك و تاقیگەو دەرمانخانەش لە هەموو ڕۆژەكانی هەفتە كراوەن و ئامادەن بۆ خزمەتگەیاندن بە پێشمەرگە. نەخۆشخانەی پێشمەرگە سەر بەڕێوەبەرایەتی كاروباری پزیشكی گشتی وەزارەتی پێشمەرگە ئەمڕۆ 1/3/2021 لە هەولێری پایتەختبە فەرمی كرایەوە و لە چەندین بواری چارەسەركردندا ئامادەیە بۆ پێشوازیكردن لە پێشمەرگە. دكتۆر دانا، بەڕێوەبەری نەخۆشخانەی پێشمەرگە تایبەت بۆ (سەنتەری میدیا) رایگەیاندووە، لە ئەمڕۆ وە ئامادەین بۆ پێشوازیكردن و چارەسەركردنی پێشمەرگە و وەك قۆناغی دەستپێك لە بەشەكانی ئێسك و شكان و هەناو و پێست و قوڕگ و لوت و گوێ و دەمارو بڕبڕەی پشت و گورچیلەو میزەڕۆ و لە رێگەی پزیشكی گشتی و تیمێكی تەندروستی لێهاتوەوە بینین و پشكنین و چارەسەرییەكان ئەنجامدەدەرێن. بەڕێوەبەری نەخۆشخانەی پێشمەرگە لە هەولێر، روونیشكردەوە كە، بەشەكانی نەخۆشخانەكە دابەشكراون بەسەر رۆژانی هەفتەدا بەمشێوەیە: یەك شەممە: دەمارو بڕبڕەی پشت / قوڕگ و لوت و گوێ. دوو شەممە : دەمارو بڕبڕەی پشت / ئێسك و شكان/ پێست. سێ شەممە: گورچیلەو میزەڕۆ. چوارشەممە: پێست. پێنج شەممە: هەناو / گورچیلەو میزەڕۆ/ ئێسك و شكان. هاوكات بەشەكانی تیشك، دەرمانخانەو تاقیگە لە هەموو رۆژانی هەفتەدا كراوەن و ئامادەن بۆ خزمەتگەیاندن بە پێشمەرگە. دكتۆر دانا ئەوەشی خستەڕوو كە، وەك قۆناغی سەرەتا لە ئێستادا تەنها دەتوانن پێشوازی لە خودی پێشمەرگە بەبێ جیاوازی لە سەرتاسەری كوردستان بكەن بۆ چارەسەركردنیان، ئەوەشی وت كە، وەك هەنگاوی یەكەم هەر ئەفسەرو پێشمەرگەیەك كە بیەوێت سەردانی نەخۆشخانەكەمان بكات بۆ چارەسەری پێویستە لە یەكەكەی خۆیەوە نوسراو ئاراستەی بەڕێوەبەرایەتی كاروباری پزیشكی گشتی وەزارەت بكات و لەوێوە دەنێردرێت بۆ نەخۆشخانەی پێشمەرگە، بەڵام لە داهاتوویەكی نزیكدا فۆرمی تایبەت دروست دەكەین و ئەوكات لە یەكەكانەوە فۆرمەكە پڕ دەكرێنەوە و ئەفسەران و پێشمەرگەكان دەتوانن راستەوخۆ سەردانی نەخۆشخانەكەی خۆیان بكەن. ئەمە لەكاتێكدایە ، نەخۆشخانەی پێشمەرگە لە هەولێر، لەلایەن حكومەت و سوپای ئەڵمانیاوە وەك دیارییەكی تایبەت بۆ پێشمەرگە دروستكراوە و پێشكەشی وەزارەتی پێشمەرگەیان كردووە، لەسەر رووبەرێكی فراوان و بە شێوازێكی سەردەمیانە بنیاتنراوەو پلان هەیە پەرەیپێبدرێ و لە داهاتوودا ببێتە ناوەندێكی پزیشكی سەربازی و خزمەتی فراوانترو زیاتر بە پیشمەرگەی كوردستان بكات. لەرووی ئاسانكاری باشتر بۆ زانینی شوێن و گەیشتنی پێشمەرگەكان بە نەخۆشخانەكه بە تایبەتی بۆ ئەوانەی لە دەرەوەی هەولێرو ناوچە دوورەكانن، بەڕێوەبەری نەخۆشخانەی پێشمەرگە رایگەیاند، نەخۆشخانەی پێشمەرگە دەكەوێتە پشت گوندی كۆری لە باكوری سەنتەری شاری هەولێری پایتەخت.
-
خەڵك- نوێنەری بەڕێوەبەرایەتی تەندروستی لە لیژنەهاوبەشەكانی قائیمقامیەتی سلێمانی ڕایدەگەیەنێت ، بەهۆی هەبوونی نەوجەوان لە شوێنەكەیدا، قائیمقامیەتی سلێمانی هۆڵی بلیاردی پشوو-ی لە شەقامی سالم داخست . سەفین فەتاح ، نوێنەری بەڕێوەبەرایەتی تەندروستی لە لیژنە هاوبەشەكانی قائیمقامیەتی سلێمانی ئەمڕۆ دووشەممە 1-3-2021 رایگەیاندووە، بەهۆی هەبوونی (15) نەوجەوان لە شوێنەكەیاندا و رێگرینەكردن لە هاتووچۆكردنیان و پابەندنەبوون بەمەرجەكانی كاركردن، لەلایەن لیژنەكانی قائیمقامیەتەوە هۆڵی بلیاردی پشوو لە شەقامی سالم داخرا. وتیشی:"بەپێی یاسا، هەر نەوجەوانێك هاتووچۆی هۆڵەكانی بلیارد، كۆفی شۆپی كێشانی نێرگەلە، كافتریا، شوێنەكانی فرۆشتن و پێشكەشكردنی خواردنەوە كحولییەكان، بكات و لەلایەن خاوەنەكانیانەوە رێگری لێنەكرێت، لەلایەن لیژنەهاوبەشەكانەوە دادەخرێن و خاوەنەكانیشیان ڕووبەڕووی رێكاری یاسایی توند دەكرێنەوە".
-
خەڵك- سكرتێری حزبی سۆسیالیست دیموكراتی كوردستان داوادەكات، وەك گوشارخستنە سەر بەغدا"ئاوی سەدەكان بگرێتەوە، و ئاوارەكان دەربكرێن كورد لەپرۆسەی سیاسی پاشەكشە بكات و كارتی ریفراندۆمیش بەرامبەر بەغدا بەكاربهێندرێت"، ڕەتیشیدەكاتەوە هەرێم و عیراق ڕێبكەون. لەدوای بەشداریی لە یادی كۆچی دوایی قادری حاجی عەلی ئەندامی دامەزرێنەری بزوتنەوەی گۆڕان و سیاسەتمەداری كورد، محەمەد حاجی مەحمود سكرتێری حزبی سۆسیالیست ڕایگەیاند" دەبێت هەرێمی كوردستان بەر لەهەرشتێك ماڵی خۆی رێكبخاتەوە، ئەگەر ماڵی خۆی رێكخست هەموولایەك ئامادەیە رێكەوتنی لەگەڵ بكات، لەئێستاشدا هەرێم و بەغدا قەت رێكناكەون ئەوشتانەی دەكرێن بۆ شەش مانگ تا ساڵێكە، ئەوەی ئێمە دەمانەوێت ئەوان نایكەن و ئەوەی ئەوانیش دەیانەوێت ئێمە نایكەین، چونكە بارودۆخیان لە ئێمە خراپترە و هەمو ئەو شتانەی دەكرێن ئارامكەرەوە و ئازاربەخشی كاتین، ئەگەرنا هەرگیز رێكناكەون". بە وتەی محەمەدی حاجی مەحمود"بەر لەڕێكەوتن دەبێت ماڵی كوردی یەكبخرێت، داهاتەكان رێكبخرێنەوە، هێزە سیاسییەكان پێكەوە كۆببنەوە و كاربكەن و بەرنامە بۆ هەڵبژاردنەكان بكەن، ئێمە ئەگەر هاوپەیمانی هەبێ دەرگامان كراوەیە، ئەگەر نەبوو بەتەنها بەشداری دەكەین، هاوپەیمانیش لە كەركوك بەئاسانی ناكرێت، رەنگە هەندێك حزب پێكەوە بیكەن، بەڵام هەموی پێكەوە هاوپەیمانێتی دروستناكەن". هەر لەبارەی پەیوەندییەكانی تێوان هەرێم و بەغدا، سكرتێری حزبی سۆسیالیست دیموكراتی كوردستان دەڵێت"بەغدا لەگەڵ ئێمە رێكناكەوێت، كارتی بەهێزمان هەیە و دەتوانین بەكاریبهێنن، ئەوانیش، كشانەوە لە پرۆسەی سیاسی عێراق، گرتنەوەی ئاوی سەدەكان و دەركردنی ئاوارەكانە، كارتی ریفراندۆمیش یەكێكی دیكەیە لە كارتەكانی فشار بەرامبەر بەغدا".
-
خەڵك-ئارام سەردار وتەبێژی حكومەتی هەرێمی كوردستان ڕایدەگەیەنێت، پێشنیار هەبوو قوتابخانەكان و زانكۆكان دابخرێن، بەڵام بەو هۆیەی تووشبوون لەو ناوەندانەدا نەگیشتنە ئاستێكی مەترسیدار، پرۆسەی خوێندن بەردەوام دەبێت. جوتیار عادل، وتەبێژی حكومەتی هەرێمی كوردستان لەكۆنفڕانسێكی ڕۆژنامەوانیدا ڕایگەیاند"لەكۆبوونەوەی لیژنەی باڵای ڕووبەڕووبونەوەی كۆڕۆنا بڕیاردرا یەكێك لەوانە تووندكردنی ڕێكارەكان و پابەندكردنی دامودەزگاكانی حكومەت و هاوڵاتیان تاوەكو پابەندی ڕێنمایی تەندروستی ببن، چونكە ژمارەی تووشبوان لەزیادبووندان، پێشنیاریش هەبوو قوتابخانەكان و زانكۆكان دابخرێن، بەڵام بەڕەچاوكردنی بەرژەوەندی خوێندكاران و كەس و كاریان بەتایبان ئێستا تووشبوون بەكۆڕۆنا لەناوەندەكانی خوێندن نەگەیشتۆتە ئاستێكی مەترسیدار پڕۆسەی خوێندن بەردەوام دەبێت". بە وتەی جوتیار عادل"ڕێكاری خۆپارێزی توندتر دەگیرێتەبەر و هاتووچۆش لەنێوان شارەكانی هەرێم ئاسایی دەبێت، تاوەكو 10ی ئادار ئەو بڕیارانە جێبەجێدەكرێن و جارێكی تر لیژنەی باڵا كۆدەبێتەوە، هەڵسەنگاندن بۆ دۆخەكە دەكرێتەوە". دەشڵێت"بەستنی دەمامك لەشوێنە گشتیەكان جێبەجێ دەكرێت، شوێنە گشتیەكانیش لەكاتژمێر 12 بۆ 6ی بەیانی دادەخرێن، دۆخەكە مەترسیدارە و دەبێ پابەندبن، بەپێچەوانەوە ناچارین ڕێگای تر بگرینە بەر و ڕێكاری تووندتر جێبەجێ بكەین، لەچەند كاتژمێری داهاتوو ڤاكسین دەگاتە هەرێمی كوردستان و ئەوكات وەزارەتی تەندروستی بڕیار دەدات بۆ دیاری كردنی ئەوكەسانەی ڤاكسینەكەیان سەرەتا بۆ بەكاردێت". ئەوەشی خستەڕوو"هاتووچۆ لەڕۆژانی پێنچ شەممە و هەینی و شەممە لەنێوان هەرێم و پارێزگاكانی عیراق دادەخرێت، ڕۆژەكانی تری عیراق خۆی قەدەغەی هاتووچۆی ڕاگەیاندوە. لە 20% كۆی ڤاكسین كە بۆ عیراق دێت بۆ هەرێمی كوردستان دەستنیشانكراوە".
-
خەڵك - لیژنەی سەرپەرشتیاری پڕۆژەی تۆڕی زیرەكی كارەبا لە سلێمانی ئاگاداری دانیشتوانی گەڕەكەكانی كوردستی و كەنەسوورە دەكات، كە سبەینێ بەهۆی بەستنی پێوەری زیرەكەوە بێ كارەبا دەبن . لیژنەی سەرپەرشتیاری پڕۆژەی تۆڕی زیرەكی كارەبا لە سلێمانی لە ڕاگەیەنراوێكدا ئاماژەی بەوەكردووە، ئاگاداری دانیشتوانی گەڕەكی كوردستی و كەنەسورە دەكەینەوە، كە دەكەونە سەر هەردوو فیدەری (۲۱۸) و (۲۲٠) سبەینێ سێشە‌ممە (2/3/2021) پێوەری زیرەكیان بۆ دەبەسرێت. ئەوەشخراوەتەڕوو، كە ئەو گەڕەكانە لە كاتژمێر (8ی بەیانی بۆ 3ی پاش نیوەڕۆ) كارەبای نیشتمانی و مۆلیدەیان نابێت، واتە مۆلیدەی ئەهلی سەر ئەو فیدەرە نابێت كاربكەن، ئەوەش لەپێناو سەلامەتی گیانی تیمەكانی كارەبا و هاووڵاتیان خۆیان". جەختیشی كردۆتەوە ، كە جگە لە ستافی تایبەتی هۆبەكانی چاكسازیی كارەبا و كۆمپانیا، هیچ كەس بۆی نیە دەستكاری پێوەرەكان بكات بەپێچەوانەوە توشی لێپرسینەوەی یاسایی دەبێت. ئاماژەبۆ ئەوەشكراوە، كە دوای بەستنی پێوەرەكە و لەكاتی بوونی هەر كێشەیەك دەتوانن پەیوەندی بەم ژمارە تەلەفونەوە بكەن 07701394642.
-
-خەڵك پەرلەمانی عیراق، پرسە بۆ كۆچی دوایی پەرلەمانتارێكی كورد دادەنێت و مستەفا كازمی سەرۆك وەزیرانیش سەردانی پرسەكە دەكات و سەرخۆشی خۆی لە پەرلەمان و كوسوكاریی كۆچكردوو دەكات. بەپێی چەند وێنەیەك كە لەلایەن میدیاكانی عیراقەوە بڵاوكرایەوە، سەرۆكایەتی پەرلەمانی عیراق لە بەغدا پرسەی بۆ كۆچی دوایی ئارام ناجی بالەتەیی پەرلەمانتاری پارتی دیموكراتی كوردستان داناوە و لە پرسەكەشدا محەمەد حەلبوسی سەرۆكی پەرلەمان پێشوازیی لە خەڵك دەكات و مستەفا كازمی سەرۆك وەزیرانیش سەردانیان دەكات و سەرخۆشی لە پەرلەمان و كەسوكاریی كۆچكردوو دەكات. ئارام ناجی باڵەتەیی، وتەبێژی فراكسیۆنی پارتی لە پەرلەمانی عیراق، دوای ماوەیەكی زۆر لە تووشبوونی بە ڤایرۆسی كۆرۆنا، لە 17ی شوبانی ڕابردوو لە یەكێك لە نەخۆشخانەكانی دهۆك كۆچی دوایی كرد. ئارام ناجی محەمەد ساڵح ناسراو بە ئارام باڵەتەیی لە 30- 10- 1979 لە پارێزگای دهۆك لە دایكبووە و خەڵكی گوندی بالەتەیە و خێزاندارە و باوكی كچ و كوڕێكە.
-
خەڵك- بەڕێوەبەرایەتی ئاوی سلێمانی ڕایدەگەیەنێت، ئەنجومەنی وەزیران ڕەزامەندی دا بە درێژكردنەوەی ماوەی لێخۆشبوون لەسەر قەرزی پارەی ئاو بە ڕێژەی لە%15 تا بەرواری 31ی3ی2021 بۆ هاوبەشانی ئاو. بەڕێوەبەرایەتی ئاوی سلێمانی لە ڕاگەیەنراوێكدا بڵاویكردەوە، بە فەرمانی ژمارە 2531 ی سەرۆكایەتی دیوانی ئەنجومەنی وەزیران، ڕەزامەندی درا بە درێژكردنەوەی ماوەی لێخۆشبوون لەسەر قەرزی پارەی ئاو بەڕێژەی لە%15 تا بەرواری 31ی3ی2021 بۆ هاوبەشانی ئاو. لەماوەی ڕابردوودا بۆ چەند جارێك لە لایەن ئەنجومەنی وەزیرانەوە ، ماوەی گەڕانەوەی قەرزی پارەی ئاو بە لێخۆشبوونی ڕێژەی %15 درێژكرایەوە . ئەمە لەكاتێكدایە ، لە سنوری پارێزگای سلێمانی زیاتر لە نیو ملیۆن هاوبەشی ئاو هەیە و هەر دوو مانگ جارێك كە پسووڵە دەڕواتەوە بۆ هاوبەشەكانی ئاو تەنیا لە %60ی پارەی ئاو دەدات.
-
خەڵك- بە تۆمەتی گەندەڵی و بەكارهێنانی دەسەڵاتەكانی، سەپاندنی سزای سێ ساڵ زیندانی بەسەر نیكۆلا ساركۆزی سەرۆكی پێشووی وڵاتەكەدا ڕادەگەیەنرێت. ئەمڕۆ دوو شەممە، دادوەریی فەرەنسا سەپاندنی سزای سێ ساڵ زیندانی بەسەر نیكۆلا ساركۆزی سەرۆكی پێشووی وڵاتەكەدا ڕاگەیاند و هۆكارەكەی بۆ تۆمەتەكانی تایبەت بە گەندەڵی و بەكارهێنانی دەسەڵاتەكانی لەماوەی سەرۆكایەتیدا گێڕایەوە. بەپێی یاساكانی فەرەنسا، ئەو سزایەی لەلایەن دادوەریی وڵاتەكەوە بەسەر ساركۆزیدا سەپێنرا، تەنیا ساڵێكى جێبەجێ دەكرێت. دەوترێت، ساركۆزی تۆمەتبارە بە یارمەیتدانی دادوەرێك، تا پۆستێكی باڵا لە مۆناكۆ وەربگرێت، لەبەرانبەر دەستەبەركردنی زانیاریی تایبەت بە لێكۆلبَینەوەكان لە پرسی پارەداركردنی هەڵمەتەكانی هەڵبژاردن، بەڵام بەهۆی یاساكانی وڵاتەكە، سەرۆكی پێشووی فەرەنسا كە ئامادەی دانیشتنی دادوەیی بوو "دانیشتنی گوێگرتن"، تەنیا یەك ساڵ زیندانی بەسەردا جێبەجێ دەكرێت.
-
خەڵك- لە كۆبونەوەی لیژنەی باڵای ڕووبەڕووبوونەوەی كۆرۆنا لە هەرێم بڕیاردراوە، كە دەوامی خوێندن لە ناوەندەكانی خوێندن بەردەوام بێت ، قەدەغەی هاتووچۆش لە هەرێمی كوردستان ڕانەگەیەنرێت. ئەمڕۆ دووشەممە 1ی ئازاری 2021 لە شاری هەولێر لیژنەی باڵای ڕووبەڕووبوونەوەی كۆرۆنا كۆبوەوە و بە پێی زانیارییەكانی "خەڵك" لە كۆبونەوەكەدا بڕیاردرا دەوامی خوێندن لە ناوەندەكانی خوێندن بەردەوام بێت، بەڵام ڕێكارەكانی خۆپارێزی لەناو قوتابخانە و خوێندنگەكان توندتر بكرێن. هەر بە پێی زانیارییەكان لە كۆبونەكەدا بڕیاری ئەوە دراوە، كە لە بازگەكانی نێوان هەرێمی كوردستان و شارەكانی ناوەڕاست و باشووری عێراق پشكنینی كۆرۆنا بنرێت و بەبێ پشكنین رێگەی هاتن بە هیچ كەسێك نەدرێت. زانیارییەكان باس لەوەش دەكەن، كە هیچ بڕیارێك نەدراوە بەمەبەستی قەدەغەی هاتووچۆ لە نێوان شارەكانی هەرێم و ناو شارەكان ، لەگەڵ ئەوەشدا رێكارەكان توندتر دەكرێن، بەڵام بەستنی ماسك دەكرێتە ناچاری و هەركەسێك پابەند نەبێت، رووبەڕووی سزا دەبێتەوە.
-
خەڵك هاوسەرۆكی یەكێتیی نیشتمانیی كوردستان ڕایدەگەیەنێت، ئومێدێكی زۆرمان هەیە ئەم پێنج شەممە هەرێم و بەغدا بگەنە رێككەوتن و انشاالله ڕێكە دەكەون . لاهور شێخ جەنگی، هاوسەرۆكی یەكێتی نیشتمانی كوردستان دوای بەشداریكردنی لە ڕێوڕەسمێك بۆ یادی قادر حاجی عەلی، كە لە تەلاری هونەری سلێمانی بەڕێوەچوو بە لەبارەی رێككەوتنی هەرێم و بەغدا بە ڕۆژنامەنوسانی راگەیاند، ئومێدێكی زۆر هەیە ئەم پێنجشەممەیە هەرێم و بەغدا بگەنە رێككەوتن. لە وەڵامی پەیامنێران كە ئایا ئەگەر نەگەنە ڕێكەوتن هەڵوێستی یەكێتی چی دەبێت هاوسەرۆكی یەكێتی ئاشكراشیكرد، ئیشەڵڵا رێكدەكەوین، دەبێت بگەینە رێككەوتن.