ئەوروپا.. زیاتر لە 100 ملیۆن كەس ڤاكسینی كۆرۆنایان وەرگرتووە
خەڵك سەرۆكی كۆمسیۆنی یەكێتیی ئەوروپا ئاشكرایدەكات، زیاتر…
زیاترسەردێر
-
خەڵك ئەندازیارێكی خۆراك ڕایدەگەیەنێت، گۆشتی فرێش لە بەراددا تەنها بۆ ماوەی ۷۲ كاتژمێر هەڵدەگیرێت و لە و ماوەیەشدا پێویستە بەكاربهێنرێت، دەشڵێت،"تەنها بەهۆی نا تەندروستی ئەو كەل و پەل و ئامێرانەی بەكاردێت بۆ گۆشتەكە یان بوونی مێش و حەشەرات و مشك لە شوێنی هەڵگرتندا گۆشتی سوور خراپ دەبێت ". لەشكر حەمید ، ئەندازیارێكی خۆراك بە (خەڵك) ی ڕاگەیاند، هۆكارەكانی خراپبوونی گۆشتی سوور زۆرن و یەكێك لەو هۆكارانە پێویستە پێش ئەنجامدانی كرداری سەر بڕین پشكنینی پزیشكی بۆ بكرێت، ڕەنگە گیانلەبەرەكە نەخۆش بێت و ڕاستەوخۆ لە دوای سەڕبڕین لەڕێگەی بەكارهێنانی گۆشتەكەیەوە بۆ مرۆڤ دەگوازرێتەوە. وتیشی ،" لەكاتی لێكردنەوەی پێستەكەی و دەركردنی ناو سكەكەیدا گۆشتەكە پیس ببێت بە ئاو پاك نابێتەوە، بۆیە پێویستە بە وردی ڕەچاوی جیاكردنەوەكە بكرێت، هەروەها بۆ گواستنەوەی گۆشت و بەربوومەكانی فێنككەرەوە بەڕاد بەكاربهێنرێت بەتایبەت لە كەشە گەرمەكاندا، چونكە پلەی گەرمی بەرز هۆكارە بۆ زوو خراپبوونی گۆشتەكە". ڕاشیگەیاند، بەهۆی نا تەندروستی ئەو كەل و پەل و ئامێرانەی بەكاردێت بۆ گۆشتەكە یان بوونی مێش و حەشەرات و مشك لە شوێنی هەڵگرتندا . ئاماژەی بۆ ئەوەشكرد، بەهۆی نەبوونی مەرجی تەندروستی لە دوكانی گۆشتفرۆشەكان و دانانی گۆشت لەپلەی گەرمی بەرزدا هۆكارێكی دیكەی خراپبوونی گۆشتە، بۆیە پێویستە گۆشتی فرێش لە بەراددا تەنها بۆ ماوەی ۷۲ كاتژمێر هەڵبگیرێت و لە و ماوەیەشدا پێویستە بەكاربهێنرێت .
-
خەڵك شارەزایەكی كەش و هەوا ئاماڕ و ژمارەی قوربانییەكان بە ڕوودانی لافاوی وڵاتانی جیهان لەم مانگەدا تا ئەمڕۆ بڵاودەكاتەوە و ڕایدەگەیەنێت ، وڵاتی ئەڵمانیا زۆرترین قوربانی هەبووە و 150 هاووڵاتیش وونبوون . ئاراس جەبار ، شارەزای كەش و هەوا لە هەرێمی كوردستان بە (خەڵك) ی ڕاگەیاند، لەماوەی ئەم مانگەدا بەهۆی گۆڕانكاری لە كەش و هەوا زۆرێك لە وڵاتان توشی لافاو بوون و بەو هۆیەوە ژمارەیەك قوربانی لێكەتەوەتەوە . وتیشی ،"یەكێك لەو وڵاتانەی زۆرترین قوربانی هەبووە بەهۆی لافاوی ئەم مانگەوە وڵاتی ئەڵمانیا بووە، كە 180 گیان لەدەستدان و 150 ونبوون تۆماركراوە و دوای ئە ووڵاتی هیندیستان دێت ، كە 125 گیان لەدەستدان و 40 وونبوون تۆماركراوە". ئاشكراشیكرد، ئەمە جگە لە ئاماری چەند وڵاتێكی دیكە، هەیە كە تیایدا لافاوی گەورە ڕوویداوە و قوربانی زۆری لێكەوتۆتەوە . ئەو وڵاتانەی بەهۆی لافاوەوە زیانیان بەركەوتووە: وڵاتی چین :- ژمارەی گیان لە دەستدان ٥٦ كەس ، ژمارەی ونبوو ٨ كەس. وڵاتی بەلجیكا :- ژمارەی گیان لەدەستدان ٣١ كەس ، ژمارەی ونبوو ٧٠ كەس. وڵاتی عومان :- ژمارەی گیان لەدەستدان ٧ كەس ، ژمارەی ونبوو ١ كەس . وڵاتی توركیا :- ژمارەی گیان لەدەستدان ٦ كەس . وڵاتی سعودیە :- ژمارەی گیان لە دەستدان ٣ كەس.
-
خەڵك سبەینێ لە دە شوێنی جیاوازی شاری سلێمانیدا مەفرەزە ھاوبەشەكانی دەزگا ئەمنییەكان پڕۆسەی دەست بەسەراگرتنی ئۆتۆمبێلی تابلۆ ڕەش و بێ سەرەتا و جام ڕەش دەست پێدەكەت. سەركەوت ئەحمەد، وتەبێژی پۆلیسی سلێمانی رایگەیاند، سبەینێ یەكشەممە مەفرەزەكان ھاوبەشدەبن لە نێوان ئاسایش و پۆلیس و پۆلیسی ھاتوچۆ و لیوای پاراستنی سلێمانی و لە دە شوێنی شار مەفرەزە دادەنێن ھیچ كەس و ئۆتۆمبێلێكیش چاوپۆشی لێ ناكرێت بەتایبەت ئەو ئۆتۆمبێلانەی پار ساڵ داخڵی ھەرێم كراون. لە لایەكی دیكەوە، عەقید سەعدوڵڵا عەزیز، بەڕێوەبەری هاتووچۆی ناوشاری سلێمانی رایگەیاندووە، "ئەو ئۆتۆمبێلانەی سەرەتایان نییە ژمێردراون نەك تۆمار كرابن، ئەوەش وایكرد نرخیان هەندێك بەرز ببێتەوە، زیاتر لە 19 هەزار ئۆتۆمبێلی بێسەرەتا لە هەرێمی كوردستان هەن، لەناو سلێمانی نزیكەی 3 هەزار ئۆتۆمبێل هەن، لە هەولێر نزیكەی 1500 ئۆتۆمبێل و لە دهۆك نزیكەی 2 هەزار ئۆتۆمبێل و لە هەڵەبجە 700 و لە گەرمیان 900 و لە سۆران 9 هەزار و لە راپەڕین 2600 ئۆتۆمبێلن." بەڕێوەبەری هاتووچۆی ناوشاری سلێمانی ئاماژەی بەوە دا، ئەو ئۆتۆمبێلانە بە قاچاخ هاتون، لەنێو كۆنتێنەری كەلوپەلی دیكەدا داخڵكراون. لە چەند رۆژی رابردویشدا چەند كەسێك لەسەر قاچاخ لە سنورەكان دەستگیر كراون، لە ماوەی رابردودا حكومەت كە ئەو ئۆتۆمبێلانەی ژمارد، مەبەستی بو بەپێی جۆر و توندوتۆڵییش جیایان بكاتەوە. ئەو پێی باشە ئەو ئۆتۆمبێلانە تۆمار بكرێن، وەك هاتوچۆی سلێمانییش ئەو رایەی خۆیان داوەتە وەزارەتی ناوخۆ.
-
خەڵك سەرۆكوەزیرانی عیراق، مستەفا كازمی رایگەیاند كە گەندەڵی و خراپ بەڕێوەبردن، وڵاتیان بە رەوشی ئێستا گەیاندووە. نووسینگەی ڕاگەیاندنی سەرۆكوەزیرانی عیراق لە راگەیاندراوێكدا ئاماژەی بەوەداوە كە ئەمڕۆ شەممە، مستەفا كازمی چاوی بە كەسوكاری قوربانییانی تەقینەوەكەی شاری سەدر كەوتووە. بەپێی راگەیەنراوەكە لە میانی دیدارەكەدا، سەرۆكوەزیرانی عیراق سەرەخۆشی خۆی ئاراستەی كەسوكاری قوربانییانی تەقینەوەكەی شاری سەدر كردووە و رایگەیاندووە، وەزارەتی تەندروستیی ڕاسپاردووە بۆئەوەی توانا و ھەوڵەكانی لە پێناو چارەسەركردنی بریندارانی تەقینەوەكە بخاتەگەڕ و وتی: "ھێزە ئەمنییەكان ھەوڵەكانیان لە پێناو دەستگیركردنی ئەو كەسانەی كە تێوەگلاون لە ئەنجامدانی تەقینەوەكە خستووەتەگە". مستەفا كازمی وتیشی: "هەوڵی تۆڵەسەندنەوە نادەین، بەڵكو هەوڵی بەدیهێنانی دادپەروەریی دەدەین و ئەركی خۆمان بەرامبەر ھەموو عیراقییەكان، جێبەجێ دەكەین". ڕاشیگەیاندووە "بەجددی كار دەكەین بۆ بەرەنگاربوونەوەی ئەو ھەموو كەسانەی كە ھەوڵی پەكخستنی كارەكانی دەوڵەت دەدەن و گەندەڵی و خراپ بەڕێوەبردن، وڵاتیان بە رەوشی ئێستا گەیاندووە." رۆژی دووشەممەی رابردوو، تەقینەوەیەكی خۆكوژی بازاڕێكی میللی لە شاری سەدر رۆژھەڵاتی بەغدا كردە ئامانج و لە ئاكامدا، ٣٠ كەس كوژران و ٥٠ی دیكەیش برینداربوون. ڕێكخراوی تیرۆریستیی داعش بەرپرسیارێتی خۆی لە ئەنجامدانی تەقینەوەكە راگەیاند.
-
خەڵك وەزارەتی تەندروستی هەرێم ئاشكرای دەكات ، كە لە 24 كاتژمێری ڕابردوودا 1010 حاڵەتی تووشبوون بە كۆرۆنا تۆماركراوە و 902 كەسیش چاكبوونەتەوە و 15 حاڵەتی مردنیش هەبووە . وەزارەتی تەندروستی حكومەتی هەرێم لە ڕاگەیەنراوێكدا ئاماژەی بەوەكردووە، 6796 پشكنین ئەنجامدراوە و دەركەوتووە لە هەولێر 166 كەس و سلێمانی 122 كەس و دهۆك 722 كەس تووشی كۆرۆنا بوون. ئاشكراشی كردووە، كە 902 كەس چاكبوونەوە و 15 حاڵەتی گیان لەدەستدان تۆماركراوە، كۆی گشتی مردنیش بە كۆرۆنا گەیشتە 4675 كەس.
-
شێرکۆ کرمانج لە دوایین چاوپێکەوتنی (لێپێچینەوەی) لەگەڵ ئەندامانی کۆمیتەی کاروباری دەرەوە لە کۆنگرێس، ڤکتۆریا نۆلاند، جێگری وەزیری دەرەوەی ئەمریکا بۆ کاروباری سیاسی، گوتی ئەمریکا بەردەوام دەبێت لە پشتیوانیکردنی کوردانی سوریاو یەپەگە. هاوکات، گوتیشی ئەمریکا مکوڕە لەسەر ئەوەی کە تورکیا دەبێت دەستبەرداری موشەکی S-400 بێت کە لە ٢٠١٧ لە ڕوسیای کڕیوە. لە دوایین قسەکانی دەسەڵاتدارنی تورکیاش وادەردەکەویت کە ئەوان بە هیچ شێوەیەک دەستبەرداری موشەکە ڕوسییەکان نابن. تورکەکان دەڵێن ئەوان تەنیا ئامادەن هەندێک زانیاری لەسەر موشەکەکان بدەن بە ئەمریکییەکان‌و نەهێڵن ڕوسەکان زانیاری لەسەر فڕۆکە ئەمریکییەکان، کە تورکیا بەکاریان دێنێت، بەدەستبێنن. ئەمەش لای ئەمریکییەکان تا ئێستا قابیلی قەبوڵ نیە، بۆیەش ساڵێک زیاترە لە بەرنامەی دروستکردنی فۆڕکەی F-35 تورکیایان وەدەرنا. دیارە دەبێت ئەوە بزانین لەکاتی لێپێچینەوە لە کۆنگرێس نوێنەرانی حکومەتی ئەمریکا زیاتر جەوهەری سیاسەتی پەیڕەوکراوی ئەمریکا دەخەنەڕوو لەوەی لەکاتی قسەکردن بۆ ڕۆژنامەنوسان دەیکەن. بۆیە ئەو قسانەی ڤیکتۆریا نولاند دەبێت بە هەند وەربگیرێن. ئەوە بەو مانایە نیە کە سیاسەتی ئەمریکا ئیدی ئەوەیەو تەواو چونکە سیاسەتی ئەمریکا کۆنکریت نیە، هەمیشە لە گۆڕان دایە. بەڵام بە بنەما لەسەر هەڵسوکەوت‌و جوڵەکانی تورکیا پێناچێت کە ئەمریکا جارێکی دیکە بە ئاسانی بتوانێت تورکیا لە باوەش بگرێتەوەو ئاستی پەیوەندییەکانیان وەک جاران لێبکەنەوە، لانیکەم تا ئەردۆگان لەسەر حوکم بێت‌‌و لە پەلاهاوێژییەکانیشی بۆ ناوچەکە، لە لیبیاو لە ئازەربایجان‌و لە قوبرس‌و لە دەریای سورو لە دەریای ناوەڕاست بەردەوام بێت. بۆیە مانەوەی ئەردۆگان‌و سەرکێشییەکانی لە قازانجی کورد دایە، ئەوە ئەگەر هێرشی ڕاستەوخۆ نەکاتە سەر ڕۆژاڤا یان باشور. لەو لێپێچینەوەیەی کە لە ٢١ جولای لە کۆنگرێس کراوە، ئەندامانی هەر دوو حیزب، دیموکرات‌و کۆماری، ناڕەحەتی خۆیان لە سیاسەتەکانی تورکیاو ئەردۆگان دەربڕیوەو ڕاستەوخۆ باسی مامەڵەکردنی تورکیایان لەگەڵ سیاسەتوانە کوردەکان‌و هەدەپە کردوەو ناڕەزاییان دەربڕیوە. بەڕادەیەکیش لە سیاسەتەکانی دیکەی تورکیا نیگەرانن کە باسیان لە دانانی سزای زیاتر بەسەر تورکیادا کرد. ئەوەی تا ئێستا وای لە ئەمریکا کردوە کە تورکیا قاونەدا ترسی ئەمریکایە لە سەرەڕۆییەکانی ئێران لە ناوچەکەو زیادبوونی نفوزییەتی لە عێراق‌و سوریاو لوبنان‌و یەمەن. هاوکات هاتنی ڕوسیا بۆ ناوچەکە ئەمریکای نیگەران کردوە، ئەمەش پێگەی تورکیای بۆ ئەمریکا گرنگ هێشتۆتەوە، ئەمریکا بەو هیوایەیە کە تورکیا بەخۆیدا بچێتەوەو بگەڕێتەوە باوەشی ڕۆژائاوا. ئەو خەون‌و خەیاڵەی ئەمریکا زۆر دوورە لە واقیع. تورکیا مەترسییە لەسەر ئەمریکا نەک لەبەر ئەوەی ڕوسیا گەڕاوەتەوە ناوچەکە یان ئێران هەژموونی بەسەر ناوچەکەدا کێشاوە بەڵکو تورکیا خۆی بووە بە هەڕەشە لەسەر بەرژەوەندییەکانی ڕۆژئاوا. تورکیای سەدەی بیست‌و یەک تورکیا سەدەی بیست نیە. تورکیا ئێستا خۆی وەک زلهێزێکی ناوچەیی وێنادەکات خۆیا وەک خاوەنی ئەسڵی دڤەرەکە دەبینێ‌و پێیوایە تەنیا لەڕێگەی هێز، نەرم‌و ڕەق، زەوی‌و دەریایی، دەتوانێت بگەڕێتەوە بۆ ڕۆژگارەکانی پێشوتر. بۆیە ئەمریکاو ئەوڕوپا لەلایەک‌و تورکیا لەلایەکی دیکە زۆر سەختە ببنەوە هاوپەیمان چونکە بەرژەوەندییەکانیان‌و خەونەکانیان یەکتربڕن نەک یەکترتەواوکەر، ڕێک پێچەوانەی ڕۆژگاری جەنگی سارد.
-
خەڵك وەزارەتی كارەبای حكومەتی هەرێم ڕایدەگەیەنێت ، كارەبای پێویست بۆ ناوەندە تاقیكردنەوەكانی قوتابیان و خوێندكاران دابین دەكرێت. وەزارەتی كارەبای حكومەتی هەرێم لە ڕاگەیەنراوێكدا بڵاویكردەوە ، ئامادەكارییەكانیان تەواو كردووە و لە سبەینێوە بڕی كارەبای پێویست بۆ ناوەندەكانی تاقیكردنەوەی ئەزموونە گشتییەكان دابین دەكرێت. ئاشكراشیكردووە، وەزارەت لە پێناو سەركەووتنی بەڕێوەبردنی تاقیكردنەوە گشتییەكانی 12 ئامادەیی 2020-2021، كارەبای پێویست بۆ هۆڵەكانی تاقیكردنەوە لە كاتژمێر 8:00 بەیانی تا 11:30 دابین دەكات.
-
خەڵک گیوی موکریانی، فەرھەنگنووس و ڕۆژنامەنووسێکی دیار و بوێری کورد ناوی عەبدوڕەحمانە و کوڕی سەید عەبدولەتیف، برا گچکەی حوسێن حوزنیی موکریانی و باوکی دوکتۆر کوردستان موکریانییە. نازناوی «گیو»، کە ناوی پاڵەوانێکە، حوسێنی برای پێی بەخشیوە. ساڵی ١٩٠٣ لە بۆکان لە دایک بووە، لە تەمەنی ١١ ساڵیدا دەچێ بۆ حەلەب بۆ لای حوسێن حوزنیی برای و لەوێ و لە بەیروت دەخوێنێ و خۆی شارەزای زمانی عەرەبی و فەڕەنسی دەکات، دوایی لەگەڵ براکەی دێنەوە بەغدا و چاپخانەیەک لە حەلەبەوە دێنن و ساڵی ١٩٢٦ لە ڕەواندز دای دەمەزرێنن وگۆڤاری زاری کرمانجی و چەند نامیلکەیەکی تری پێ چاپ دەکەن. ساڵی ١٩٣٤ دەچنە ھەولێر و لەوێش چاپخانە دادەنێن و گۆڤاری ڕووناکیی پێ چاپ دەکەن. ماوەیەک دەگەڕێتەوە بۆ مەھاباد و لەوێ بە کاری وێنەگرتنەوە خەریک دەبێ و وانەی زمانی فەڕەنسیش دەڵێتەوە. بە ھۆی ئەوەی کە باسی بیر و باوەڕی کوردایەتی بۆ قوتابیانی دەکات، دەگیرێ و دەخرێتە زیندانەوە، پاش ئازادبوونی لە زیندان، ھەر لە مەھاباد ژن ئەخوازێ و دوو کچی دەبێ بە ناوەکانی خونچە و کاڵێ (کوردستان دواتر لە ھەولێر لە دایک دەبێ). جارێکی تریش زیندانی دەکرێ و ئەم جارە قازی محەممەد، کە دەستی دەڕوات، ڕزگاری دەکات و دەینێرێتەوە بۆ ڕەواندز. دوای مردنی کاکی لە ١٩٤٧دا، ئەرکی ھەڵسووڕاندنی چاپخانەی دەکەوێتە ئەستۆ، کە جگە لە بەرھەمەکانی خۆی چەندین دیوانی شاعیرانی کلاسیکی کوردیش چاپ دەکات، ناوی چاپخانەکەش دەنێ چاپخانەی کوردستان. جگە لە ڕۆژنامەوانی و زمانەوانی، دەکرێ بڵێین گیوی موکریانی وێنەگریش بووە. وێنەی زۆرێک لە شاعیران و ئەدیبانی ھاوسەردەمی خۆی، وەکو پیرەمێرد و قانع و فایەق بێکەس و زۆرێکی تر کە ئەمڕۆ لەبەردەستە کاری ئەوە. لە ١٩٧٧، بە ھۆی نەخۆشیی دڵەوە لە نەخۆشخانەی مووسڵ گیان دەسپێرێت. موکریانی وەکوو ڕۆژنامەنووسێک لە دەرچوونی چەندینگۆڤ ھاوبەشیی کردووە کە ڕۆڵێکی گەورەیان بووە لە بووژاندنەوەی ئەدەب و زمانی کوردیدا: زاری کرمانجی، کە خۆی بەڕێوەبەری و حوسێنی برای سەرنووسەری بوو. لە ١٩٢٦ەوە ھەتا ١٩٣٢، ٢٤ ژمارەی لی دەرچوو و دوایی پێھات. ڕووناکی، کە یەکەمین ژمارەی لە ١٩٣٥/١٠/٢٤ و دوا ژمارەی لە ١٩٣٦/٥/٢٦دا چاپ کراوە و ھەمووی یازدە ژمارەی لێ دەرچووە. ھەتاو، حەوتەنامەیەکی ئەدەبی بوو کە خۆی خاوەن ئیمتیاز و ھەڵسووڕێنەری بوو، لە ١٩٥٤ەوە تا ١٩٦٠ بڵاو کرایەوە و ١٨٨ ژمارە بوو. فەرھەنگەکان فەرھەنگی ڕابەر فەرھەنگێکی عەرەبی کوردییە کە نزیکەی ١٥٠٠٠ وشە دەبێ و ساڵی ١٩٥٠ لە ھەولێر لە چاپخانەکەی خۆی، چاپخانەی کوردستان چاپ بووە. فەرھەنگی کۆڵکەزێڕینە فەرھەنگێکی چەندزمانەیە (کوردی، فارسی، عەرەبی، فەڕەنسی و، ئینگلیزی) کە جاری یەکەم لە ١٩٥٥ و جاری دووەم لە ١٩٦٦ چاپ کراوە. فەرھەنگی مەھاباد فەرھەنگێکی کوردی عەرەبییە و نزیکەی ٣٠٠٠٠ وشەیە. یەکەم جار ساڵی ١٩٦١ چاپ کراوە. فەرھەنگی نۆبەرە کە عەرەبی کوردییە.
-
خەڵک - وەرزش ڕافائێل ڤارانی فەرەنسی و بەرگریکاری یانەی ڕیاڵ مەدریدی ئیسپانی، دەیەوێت لەگەڵ یانەکەی ئێستای بەردەوام بێت، شەیتانە سوورەکانیش دەیانەوێت پەلکێشی بکەن. لە ئێستادا، یانەی مانچستەر یونایتدی ئینگلیزی لەگەڵ یانەی ریاڵ مەدریدی ئیسپانی لە گفتوگۆدایە سەبارەت بە گواستنەوەی بەرگریكارە فەرەنسیەکە بۆ ریزی یانەکەی و بیکاتە دەستکەوتی گواستنەوەکانی ئەم هاوینەی، بەڵام ڤاران لەگەڵ یانەی شاهانە تا كۆتایی مانگی شەشی ساڵی 2023، گرێبەستی هەیە و تا ئێستاش ئەو یاریزانە لە پێناو نوێكردنەوەی گرێبەستەكەی لەگەڵ بەرپرسانی یانەكەی هیچ دانیشتن وگفتوگۆیەکی ئەنجام نەداوە. ڕۆژنامەی ئاسی ئیسپانی، بڵاویکردووەتەوە، ڤاران لەگەڵ، کارلۆ ئەنچیلۆتی ڕاهێنەری نوێی یانەی شاهانە قسەی کردوە و دڵنیای داوەتێ کە لە ریاڵ مەدرید دەمێنێتەوە. بەپێی ڕۆژنامەی ئاس: ڤاران هیوادارە ئیدارەی یانەکەی ڕازی بکات بۆ ڕەتکردنەوەی پێشکەشکردنی گرێبەستێكی نوێ، كە دەیەوێت موچەیەکی بەرزتری هەبێت. ڤاران ساڵی 2011 بە بڕی 10 ملیۆن یۆرۆ لە یانەی لانسی فەرەنسییەوە ڕویكردەیانەی ڕیاڵ مەدریدی ئیسپانی و یەکێکە لە بەرگریکارە دیارەکانی ئەو یانەیەو خاوەنی چەندین نازناوە.
-
خەڵك وەزارەتی تەندروستی عیراق ئاشكرای دەكات، 7653 حاڵەتی نوێی تووشبوون بە ڤایرۆسی كۆرۆنا تۆماركراوە و 8001 كەسیش چاكبوونەتەوە و 65 حاڵەتی مردنیش هەبووە . وەزارەتی تەندروستی عیراق لە بەیاننامەیەكدا ئاماژەی بەوەكردووە، كە لە 24 كاتژمێری ڕابردوودا 28 هەزار و 271 پشكنینی تایبەت بە كۆرۆنا ئەنجام دراوە و دەركەوتووە 7653 كەس تووشی ڤایرۆسی كۆرۆنا بوون و ئەنجامەكانیان پۆزەتیڤ بوون. ئاشكراشی كردووە، كە زۆرینەی تووشبووەكان لە بەغدا بوون، هەروەها لە كەركوك 287 و سلێمانی 122 و هەولێر 166 حاڵەت و دهۆك 722 حاڵەت تۆماركراوە. ڕوونیشی كردۆتەوە، كە 8001 تووشبوو بە پەتاكە چاكبوونەتەوە، كە زۆرینەیان لە بەغدا بوون و هەروەها لە سلێمانی 248 و هەولێر 108 و دهۆك 546 و كەركوك 159 كەس چاكبوونەوە. ڕاشیگەیاندووە، 65 كەس بە پەتاكە گیانیان لەدەستداوە و لە سلێمانی 5 و هەولێر 1 دهۆك 9حاڵەت تۆماركراوە بەوەش ژمارەی مردووان گەیشتۆتە 18232 كەس.