سەردێر

هۆشداری دروست بوونی لافاو لە چەند شار و ناوچەیەك دەدرێت

خەڵك-
بەپێی ڕاپۆرتە كەشناسییەكان، لە كۆتایی ئەم هەفتەیەدا شەپۆلێكی لێزمە باران ناوچەكانی هەرێمی كوردستان دەگرێتەوە و شارەزایەكی كەشناسی هۆشداری دروست بوونی لافاو لە چەند ناوچەیەك دەدات.

محەمەد كەمال، شارەزای كەشناسی لە (خەڵك)ەوە داوایەك ئاڕاستەی لایەنە پەیوەندیدارەكان و بەرپرسی ئیداره و پارێزگاكان دەكات و دەڵێت: “داواكارم تەواوی ئامادەكارییەكان بكەن بۆ ئەوەی ڕێگری لەهاتنی لافاو بكەن لە سەنتەری شارەكان و چاككردن و خاوێن كردنەوەی ئاوەڕۆی سەنتەری شارەكان و دروستكردنی بەربەست بۆ ئەو شوێنانەی مەترسی لافاویان لەسەرە”.

ڕاشیگەیاند، ئەم داواكارییەم تەنها بۆ هاتنی شەپۆلێكی بارانبارین نیە یان بڵێین شەپۆلی داهاتوو بەڵكو تا كۆتایی ساڵەكەیە و لەهەر شەپۆلێكدا ئەگەری دروستبونی گەواڵە هەوری بەهێزی بارانبارین هەیە بەتایبەتیش سنووری پارێزگای هەولێر.

ئاماژەی بەوەشكرد، ئەم داواكاری و هۆشدارییەم بەپێی لێكدانەوە و پێشبینیەكانمە تا كۆتایی ساڵ و هیوادارم بەهەندی وەرگرن بۆ ئەوەی هەموولایەك پارێزراو بن و شەوان بەترسەوە هاووڵاتیان نەخەون.

بەپێی ڕاپۆرتی شارەزایانی كەشناسی، لە ماوەی ئەمساڵدا چەند شەپۆلێكی بەهێزی باران بارین ناوچەكانی هەرێمی كوردستان دەگرێتەوە و مەترسی وشكەساڵی بەتەواوی دەڕەوێنێتەوە.

لای خۆشیەوە، سیروان ساڵح، شارەزای كەشناسی ئاماژەی بەوەكردووە، شەپۆلێكی بەهێزی بارانبارین هەرێمی كوردستان و ناوچەكانی گەرمیان دەگرێتەوه، كە لە ماوەی دوو ساڵی ڕابردوودا ئەمە یەكەمین شەپۆلی بەهێزه بەرەو ناوچەكە بەڕێوەیە.