سەردێر

ناڕەزایی و فشاری هاووڵاتیان لە تۆڕە كۆمەڵایەتییەكان یاسای توندوتیژی خێزانی ڕاگرت

خەڵك-
سەرەڕای پشتیوانی بەشێك لە پەرلەمانتاران و حزبەكان بۆ هەمواری یاسای توندوتیژی خێزانی، بەڵام ناڕەزایی و فشاری هاووڵاتیان لە تۆڕە كۆمەڵایەتییەكانەوە حزبەكانی لە پشتیوانی هەموارەكە پەشیمان كردەوە و كارەكەی بە پەرلەمان ڕاگرت.

لە هەفتەی ڕابردوودا بڵاوبوونەوەی چەند بڕگەیەكی هەمواری یاسای توندوتیژی خێزانی، كە لەلایەن ژمارەیەك لە پەرلەمانتارانی بەشێك لە فراكسیۆنەكانەوە پێشكەش كرابوو، ناڕەزایی توندی هاووڵاتیان و چالاكوانان و كەسایەتییە ئاینی و كۆمەڵایەتییەكانی لێكەوتەوە و لە تۆڕە كۆمەڵایەتییەكان گفتوگۆی چڕی لەسەر كرا و ڕەخنەی توند لە پەرلەمان گیرا لەسەر گفتوگۆكردن لەسەر “شتی لاوەكی و پشتگوێ‌ خستنی قەیرانەكانی هاووڵاتیان”.

ڕاستەوخۆ دوای ئەو ناڕەزایەتییانە، بەشێكی زۆری ئەو فراكسیۆنانەی پشتیوانی هەمواری یاساكەیان دەكرد پەشیمان بوونەوە و لەلایەن ژمارەیەك پارێزەر و مامۆستای ئاینییەوە كەمپینێك دژی پڕۆژە یاساكە ڕاگەیەنرا و هەروەها سەرۆكی پەرلەمان ڕایگەیاند، كە پەرلەمان پابەندە بە بەها و بنەما سەرەكییەكانی شەریعەتی ئیسلامی.

پارێزەرێك: دوای فشارەکان پڕۆژە یاساکە ڕاگیرا
پارێزەر ئاسۆ هاشم، سەبارەت بە كەمپینی “نا بۆتێپەڕاندنی یاسای بەرەنگاربوونەوەی تووندوتیژی خێزانی” بۆ (خەڵك) ڕایگەیاند، لە سۆنگەی هەستكردنمان بە بەرپرسیارێتی ژمارەیەك لە پارێزەران و زانایانی ئایینی دوای وردبوونەوە لە پڕۆژە یاساكە، كە بە مەترسییەكی زۆر گەورەمان زانی لەسەر كۆمەڵگە و هەڵوەشاندنەوەی خێزان، بڕیارماندا ئەم كەمپینە ڕابگەیەنین بۆ ڕەتكردنەوەی پڕۆژە یاساكە.

وتیشی، “خەڵكێكی زۆر ئەكادیمی و نووسەر و ڕۆشنبیر و ئەوانەی پەیوەندیدارن بەو دۆسیەیە هاتنە پێش و دواتر بەهۆی دەنگدانەوەی فراوانی كەمپینەكە لە تۆڕە كۆمەڵایەتییەكان و تێگەیشتنی خەڵك لە مەترسی پڕۆژە یاساكە، یەكێتی زانایانیش ڕوونكردنەوەیان بڵاوكردەوە و بەپێچەوانەی شەریعەتی ئیسلام وەسفیان كرد”.

ئاشكراشی كرد، لە ئێستادا بەخۆشحاڵییەوە فراكسیۆنەكانیش دژی وەستاونەتەوە و زانیاریمان هەیە، كە بڕیار دراوە گفتوگۆ لەسەر ئەو پڕۆژە یاسایە نەكرێتەوە و ڕاگیراوە.

یەكێتی و پارتی هەڵوێستیان ڕاگەیاند
هەرچەندە فراكسیۆنەكانی یەكێتی و پارتی لە پەرلەمانی كوردستان چەند پەرلەمانتارێكیان واژۆیان لەسەر هەمواری پڕۆژە یاساكە كردبوو، بەڵام هەریەكە لەو دوو فراكسیۆنە لە ڕاگەیەنراوێكدا دژایەتی خۆیان بۆ هەمواری یاساكە ڕاگەیاند و جەختیان كردەوە بە “پابەندبوون بە بنەماكانی شەریعەتی ئیسلام”.

پێشەوا هەورامانی، وتەبێژی فراکسیۆنی پارتی لەپەرلەمانی کوردستان ڕوونکردنەوەیەکی لەسەر هەمواری پڕۆژە یاسای (بەرەنگاربوونەوەی توندوتیژی دژی خێزان و ئافرەت) بڵاوکردەوە و وتی: “سەرۆکی فراکسیۆن لەناو هۆڵی پەرلەمان هەڵوێستی پارتی ڕاگەیاند، کە هیچ پڕۆژە و یاسایەک تێناپەڕێت لە ڕێی پەرلەمانەوە کە دژی بنەماکانی ئاینی پیرۆزی ئیسلام بێت”.

هەورامانی ئاماژەی بەوەشکرد، “لێرەوە دووبارە ڕایدەگەیەنین پارتی و مێژووی پارتی پڕە لەهەڵوێست لەبەرگری لە هەموو ئاینەکان و ئاینی ئیسلام، کە ئاینی زۆرینەی خەڵکی هەرێمی کوردستانە و لەسەر ڕێچکە و ڕێبازی سەرکردەی ڕۆحیمان بارزانی نەمر لانادەین و دڵنیایی دەدەین ڕێگا نادەین یەک وشەش بە پاڵپشتی ئێمە تێپەڕببێت کەهەستی موسڵمانان بریندار بکات”.

هەر لەو بارەیەوە، فراكسیۆنی یەكێتی لە پەرلەمانی كوردستان لە ڕاگەیەنراوێكدا ئاماژەی بەوەكردووە، پێشنیازە یاساكە لە بنەڕەتدا خاڵی هاوبەش و هاوڕایی تەواوی فراكسیۆنەكانی پەرلەمانی كوردستان بووە و دەشڵێت: “خەبات دەكەین لە پێناو پاراستنی شیرازەی خێزان و تەواوی كۆمەڵگای كوردی”.

فراكسیۆنی یەكێتی ئاماژەی بەوەشكردووە، بەلای ئێمەوە هیچ شەرەفێك لە ژن كوشتندا نیە. توند و تیژی دژی ژنان، تاوانن و دژی داب و نەریت و كەلتوری كوردەواری رەسەنن و دەشڵێت: “جەخت لەسەر پشتیوانیكردن لەسەر وتە و هەڵوێستی فەرمی سەرۆكی پەرلەمان لەسەر پابەندبوونی دامەزراوەكە بە بەها و بنەما سەرەكییەكانی شەریعەتی ئیسلامی دەكەینەوە”.