سەردێر

لەسەر دەستلەكاركێشانەوەی وەزیری دارایی ڕوونكردنەوە دەدرێت

خەڵك-

وەزارەتی دارایی عێراق ڕەتیدەكاتەوە وەزیری دەستلەكاركێشاوە واژۆی لەسەر چەند نووسراوێك كردبێت بۆ فرۆشتنی موڵكی گشتی و دیاریكردنی پڕۆژە لە پارەی قەرزی گشتی.

وەزارەتی دارایی عێراق لە ڕاگەیەندراوێكدا ئاماژەی بەوەكردووە، هەندێك میدیا و تۆڕە كۆمەڵایەتیەكان ئەو دەنگۆیەی بڵاویانكردۆتەوە لەسەر ئەوەی گوایە عەلی عەلاوی بەمدواییە واژۆی لەسەر ژمارەیەك نووسراو كردووە، كە پەیوەندیدارن بە پەسەندكردنی فرۆشتنی موڵكی گشتی و دیاریكردنی پڕۆژە لە پارەی قەرزی گشتی، بەڵام ئەو دەنگۆیانە هیچ بنەمایەكیان نییە.

ڕاشیگەیاندووە، بڵاوكردنەوەی ئەو دەنگۆیانە لەم كاتەدا، ئاماژە و مەبەستی نەخوازراوی تێدایە و ئامانج لێی زیانگەیاندنە بەوەی عەلی عەلاوی بە شێوەیەكی پیشەیی كاری كردووە.

ڕۆژی سێ‌ شەممە 16ی ئابی 2022، عەلی عەلاوی، وەزیری پێشووی دارایی عێراق دەستی لەكاركێشایەوە و لەلایەن مستەفا كازمی، سەرۆك وەزیرانەوە پەسەند كرا و ئیحسان عەبدولجەبار، وەزیری نەوت بە وەكالەت پۆستەكەی پێ‌ سپێردرا.