سەردێر

پزیشكێكی كورد داهێنانی بۆ چارەسەری نەخۆشییەكی كۆم دۆزییەوە

خەڵك-
پزیشكێكی كورد لەسەر ئاستی عێراق خەڵاتكرا بەهۆی دۆزینەوەی داهێنانێك بۆ چارەسەری نەخۆشی كۆمی خزاو.

د. سیروان حەمەشەریف، پزیشكی پسپۆڕی هەناوی و مامۆستای زانكۆ ڕایگەیاند، وەك یەكێك لە داهێنەرەكانی چارەسەری كۆمی خزاو خەڵاتكراین، كە داهێنانێكی نوێمان دۆزیوەتەوە بۆیەكەمجار.

كۆنگرەیەكی زانستی تایبەت بە داهێنەرەكان لە عێراق لە شاری سلێمانی بە سپۆنسەری سەرۆكایەتی زانكۆ و كۆلێجی پزیشكی ئەنجام درا، كە 3 ڕۆژ دەخایەنێت و تێیدا داهێنەرەكان لەهەموو عێراقەوە لە پسپۆری جیاواز بەشدار بوون، كە 121 داهێنەر بوون لە بواری پزیشكی و ئەندازیاری و كشتوكاڵ و بواری جیاوازتردا.

د. سیروان وتی، “كۆمەڵەی داهێنەرانی عێراق لەوەزارەتی پلاندانان، كە دانیان بەم كۆمەڵەیە ناوە ئێمەش خۆشبەختانە یەكێك بووین لەو 121 داهێنەرە، كە توانیومانە رێگەیەكی نوێ بدۆزینەوە بۆ یەكەمجار، كە بریتیە لە نەشتەرگەری كۆمی داخزاو بەرێگەی تایبەتی خۆمان بۆیەكەمجار لە كوردستان و عێراق و جیهان ئێمە كردومانە”.

وتیشی، “ڕێگەكەمان بەرەئی خۆمان باشترین جورە بە بەڵگەی شاهێدیدانی خەڵكی و خۆشبەختانە توانیمانە لە جۆرناڵێكی زانستی بەریتانی بڵاوی بكەینەوە، كە سەلمێنەری گرنگی داهێنانەكەیە”.

ئاماژەی بەوەشكرد، لە كۆگرەكەدا وانەیەكمان پێشكەش كرد لەسەر گرنگترین داهینانەكانی سەدەی 19 و 20 لە جیهاندا و گرنگترین داهێنانەكانی بواری پزیشكی لەو دوو سەدایەدا.