سەردێر

دەیان هاووڵاتی لە ڕۆژهەڵاتی كوردستان دەستبەسەركران

خەڵك-
لە چەند ڕۆژی ڕابردوودا هێزە ئەمنییەكانی ئێران لە شارەكانی پارێزگای ورمێ ژمارەیەكی زۆری هاووڵاتییان دەستبەسەر كردووە.

بەپێی ڕاپۆرتی ڕێكخراوی تۆڕی مافی مرۆڤی كوردستان، لە شەپۆلی نوێی دەستبەسەركردنی هاووڵاتییان و چالاكوانانی كورد، 10 هاونیشتمانیی خەڵكی شارەكانی بۆكان و مهاباد دەستبەسەركراون و بۆ شوێنی نادیار گوازراونەتەوە.

دوێنێ‌ سێشەممە 16.08.2022، هێزە ئەمنییەكانی ئێران چوونەتە گوندی لەج و هەڵیانكوتاوەتە سەر ماڵی چوار هاووڵاتی و دەستبەسەریان كردوون. هاوكات لە شاری مهابادیش دوو هاووڵاتی دیكە دەستبەسەر كراون.

رێكخراوی هەنگاو بۆ مافەكانی مرۆڤ بڵاویكردووەتەوە، لە ماوەی پێنج رۆژدا هێزەكانی ئیتڵاعاتی شاری مهاباد 17 كەسیان دەستبەسەر كردووە و بۆ شوێنی نادیار گوازراونەتەوە. لە شاری بۆكانیش چوار تاوەكو شەش هاووڵاتی دەستگیركراون. سەرەتای ئەم هەفتەیە هێزە ئەمنییەكان لە شاری شنۆش پێنج هاووڵاتی دیكەیان دەستبەسەر كردبوو ، دەوترێت بۆ زیندانی ئیدارەی ئیتڵاعات لە شاری ورمێ ڕاگوێزراون.

هێزە ئەمنییەكانی ئێران لە مانگی رابردوودا لانیكەم 56 هاوڵاتی خەڵكی رۆژهەڵاتی كوردستانیان بە تۆمەتی چالاكیی سیاسی و مەدەنی دەستبەسەر كردووە.