سەردێر

دەوڵەتی یاسا بۆ ڕەوتی سەدر: وازبهێنن

خەڵك-
سائیر موخیف جبوری، پەرلەمانتاری هاوپەیمانی دەوڵەتی یاسا داوا لە ڕەوتی سەدر دەكات، پێكهێنانی حكومەت بۆ ئەوان وازلێبهێنن و دەڵێت، لە دوای پێكهێنانی حكومەت ڕەوتی سەدر بۆی هەیە ڕێگری بكات.

جبوری لە لێدوانێكی ڕۆژنامەوانیدا ڕایگەیاند:”پێویستە ڕەوتی سەدر پێكهێنانی حكومەت بۆ ئەوان وازلێبهێنێت، تا یاسای بودجە پەسەند بكەن و ڕەوشی ئابوری باش بكەن، گەر لەو كارانەشدا دووچاری شكست بوون، دەكرێت هەنگاو بەرەو هەڵبژاردنی پێشوەختە هەڵبنێن”.

بە وتەی ئەو پەرلەمانتارەی دەوڵەتی یاسا”پێشێلكاریی دەستوری هەیە لە مەسەلەی ڕێگرییەكان و داواكارییەكانی ڕەوتی سەر، نازانین هەڵبژاردنی پێشوەختە بۆچی؟”.

موقتەدا سەدر ڕابەری ڕەوتی سەدر، هەڵوەشاندنەوەی پەرلەمان و ئەنجامدانی هەڵبژاردنی پێشوەختەی كردۆتە مەرج بۆ كۆتایی هێنان بە مانگرتنی لایەنگرانی لەنێو پەرلەماندا.