سەردێر

داوای چارەسەركردنی كێشەی سەگە بێلانەكان دەكرێت

خەڵك –
سەگی بێلانە تەنگی بەزۆرێك لە هاووڵاتیان هەڵچنیوە و لایەنە پەیوەندیدارەكانیش بێ دەنگیان هەڵبژاردووە، چالاكانی مافەكانی ئاژەڵیش نە ڕێگەچارەیان پێیە نە ڕێگەش دەدەن هاووڵاتیان خۆیان چارەسەری ئەو ئاژەڵە بێلانانە بكەن.

كاسترۆ مەعروف، ئەندامی ئەنجوومەنی پارێزگای سلێمانی بە(خەڵك)ی ڕاگەیاند، بوونی ژمارەیەكی زۆر لە سەگی بێلانە لەتەواوی شار و شارۆچكەكان بۆتە گرفتێكی گەورە و لایەنە پەیوەندیدارەكانیش بێ دەنگیان لێكردووە.

وتیشی ،”هەفتەی داهاتوو بە نووسراوی فەرمی داوا لەپارێزگای سلێمانی و سەرۆكایەتی ئەنجوومەنی پارێزگای سلێمانی و ئیدارە سەربەخۆكان دەكەین، چارەسەری ئەو گرفتەی تەواوی شارەكان بكەن”.

ڕاشیگەیاند، بوونی سەگێكی زۆر لە تەواوی شار و شارۆچكەكان بۆتە كێشە بۆ هاووڵاتیان بەتایبەت منداڵان، ئەگەر ئەمە چارەسەر نەكرێت لەكاتی كردنەوەی دەرگای خوێندنگەكان، كێشەكان زیاتر دەبن .

ئەمە لەكاتێكدایە ، لەماوەی ڕابردوودا چەند هاووڵاتیەك بەهۆی گەستنی سەگی بێلانەوە گیانیان لەدەستداوە و چالاكوانانی مافەكانی ئاژەڵیش، هیچ ڕێگە چارەیەكیان نیە بۆ كۆتایی هاتن بەو گرفتەی تەنگی بەزۆرێك لە هاووڵاتیان هەڵچنیوە، تەنها لە ڕێگەی سۆشیال میدیاوە ئیدانەی هەر كارێك دەكەن، كە دەرحەق بەو ئاژەڵانە دەكرێت .