سەردێر

سەدر چی دەوێت؟

پرسیاری چوارچێوەی هەماهەنگییە

خەڵك-
چوارچێوەی هەماهەنگی ڕایدەگەیەنێت، تا ئەم ساتە ئەو داواكارییانەی موقتەدا سەدر لایەنگرانی بۆ هێناوەتە سەر شەقام نەزانراون.


ڕەفیق ساڵحی، پەرلەمانتاری چوارچێوەی هەماهەنگی لەلێدوانێكی ڕۆژنامەوانیدا ڕایگەیاند:”تا ئەم ساتە نازانین داواكارییەكانی موقتەدا سەدر ڕابەری ڕەوتی سەدر چین كە لەپێناویاندا لایەنگرانی بۆ هێناوەتە سەر شەقام، ئەو داواكارییانە پێویستە بەشێوەیەكی فەرمی ڕابگەیەنرێن”.

بە وتەی ساڵحی”ئەو داواكارییانەی سەدر دەیەوێت بیانهێنێتەدی پێویستە لە كۆبوونەوەی لەگەڵ هێزە سیاسییەكان بخرێنەڕوو، هەر بڕیارێك بدرێت پێویستە بە هاوبەشی هەموو هێزە سیاسییەكان بێت، نەك بەپێی ئەو مەرج و داواكارییانەی لەڕێی بەكارهێنانی شەقامەوە دەسەپێنرێن، بۆیە پێویستە سەدر ئەو داواكارییانەی دەیەوێت ڕايانبگەیەنێت، بۆ مەبەستی گفتووگۆكردن لەسەرییان لەنێوان هەموو هاوبەشەكان لە پرۆسەی سیاسی”.

لەم ماوەیەی دواییدا ناكۆییە سیاسییەكان بەشێوەیەكی نائاسایی سەریانهەڵدا، بە تایبەت لەنێوان چوارچێوەی هەماهەنگی و ڕەوتی سەدر، ئەمەش بە بۆچوونی چاودێران، هێندەی تر وڵاتی لە ڕۆخی داڕمان نزیككردۆتەوە.