سەردێر

ئەمڕۆ ساڵوەگەڕی داگیركردنی شەنگالە لەلایەن تیرۆرستانی داعشەوە

خەڵك-

رۆژی 3 ی ئابی 2014 تیرۆرستانی گرووپی دەوڵەتی ئیسلامی لە عێراق و شام “داعش” دوای داگیركردنی موسڵ و تكریت و ناوچەكانی دیكەی نێوەڕاستی عێراق روویان لە باشووری كوردستان كرد و شارۆچكەی شەنگالی ئێزدینشینیان داگیركرد.

دوای هێرشی تیرۆرستانی دەوڵەتی ئیسلامی هێزە سەربازی و ئەمنییەكانی عێراق و هەرێمی كوردستان كشانەوە و هێرشی تیرۆرستان بەردەوام بوو تا مەخموور و گوێر و دوایی هاتنەسەر هێڵی رۆژئاواییەكان هێرشەكانی داعش راگیردران.

بەپێی چەند ئامارێك تیرۆرستانی داعش چەندین تاوانی دڕندانەیان بەرامبەر هاووڵاتیانی شەنگال ئەنجامداوە.

بەپێی ئامارەكان زیاد لە 430 هەزار هاووڵاتی سنوورەكە ئاوارە بوون و 140 هەزار كەس لە شاخی شەنگال بێ نان و ئاو بوون بۆ ماوەی نزیكەی دوو هەفتە، لەوانە نزیكەی 230 هەزار كەس ئاوارەی هەرێمی كوردستان بوون و توركیا و سووریا بوون و نزیكەی 600 كەس لە برسان و تینواندا گیانیان لەدەستدا.

تیرۆرستانی دەوڵەتی ئیسلامی لە هێرشەكەیاندا 1800 كەسیان كوشتووە كە 400 كەسیان تەنها لە گوندی گوڵەجۆ بوون لە پرۆسەیەكی كۆمەڵكوژیدا.

هاوكات زیاد لە سێ هەزار كەس كە زۆرینەی ژن و كچ و منداڵ بوون رفێندران و 500 كەسیش بێ سەروشوێن بوون كە تا ئێستاش چارەنووسی نزیكەی 250 كەس دیارنییە.

بەپێی چەند راپۆرتێك لە چوارچێوەی تاوانەكانی داعش دژ بە شەنگال و ئێزدی و كریستیانی و مەسیحییەكان، دزێوترین تاوان جێبەجێكرا، ئەویش تاوانی فرۆشتن و كڕینی ئافرەتان بوو، كە لەلایەن دەستەی “بیت المال”ی “داعش” سەرپەرشتی دەكرا، دوای ئەوەی ئافرەكانیان دەست بەسەر كرد یان دەیان رفاند، بەم شێوەیە نرخیان لە سەردادەنان بۆ كڕین و فرۆشتن:

ژنێكی پێگەیشتوو تەمەنی لە نێوان “30 بۆ 40” ساڵ بێت “ئێزدی و مەسیحی” نرخەكەی “75” هەزار دینارە.

دووەم: ژنێكی پێگەیشتوو تەمەنی لە نێوان “20 بۆ 30” ساڵ “ئێزدی و مەسیحی ” نرخەكەی “200” هەزار دینارە.

سێیەم: بۆ مێیینەیەكی پێگەیشتوو تەمەنی لە نێوان “10 بۆ 20” ساڵ بێت “ئێزدی و مەسیحی” “150” هەزار دینارە.

چوارەم: ژنێكی پێگەیشتووی تەمەن “40 بۆ 50” ساڵ “ئێزدی و مەسیحی” نرخەكەی “50” هەزار دینارە.

پێنجەم: منداڵێكی تەمەن یەك ساڵ بۆ نۆساڵ، “ئێزی و مەسیحی” نرخەكەی “200” هەزار دینارە.

لە كۆتایی بەڵگەنامەكەدا نوسراوە، “رێگە نادرێت هیچ كەسێك لە سێ‌ دەستكەوت زیاتر بكڕێت، جگە لە بیانیەكان ئەوانەش “تورك و سووری و كەنداوییەكان”.