سەردێر

دەوامی وەزارەتێك بوو بە 24 كاتژمێری

خەڵك-
بەهۆی بەرزبوونەوەی پلەكانی گەرما و بەدەمەوەچوونی هاووڵاتیان، وەزارەتی كارەبای عێراق بڕیاریدا دەوام بكاتە 24 كاتژمێری.

عادل كەریم، وەزیری كارەبای عێراق لە بەیاننامەیەكدا ئاماژەی بەوەكردووە، سەرجەم فەرمانبەران و كارمەندان ئاگاداركراون بە ئامادەباشی تەواو بۆ كۆششی ئەندازیاری و هونەری و پیشەیی بۆ ڕووبەڕووبوونەوەی ئەو گەرمایەی لە چەند ڕۆژی داهاتوودا وڵات دەگرێتەوە.

ڕاشیگەیاندووە، بۆ وەڵامدانەوەی خێرای داخوازی هاووڵاتیان و چارەسەركردنی كێشەكانی كارەبا بڕیاریانداوە دەوام بكرێتە 24 كاتژمێری و بەردەوام كارمەندان لە فەرمانگە و بنكە و یەكەكان لەدەوامدابن.

ئاماژەی بەوەشكردووە، کردنەوەی هەموو کۆگاکان بۆ ئامادەکردنی ئەو کەرەستانەی، کە پێویست لە چاککردنەوە، بە لەبەرچاوگرتنی فشاری سەر ناوەندەکانی کۆنتڕۆڵکردن بە چاودێریکردن و هاوسەنگکردنی بارەکان، لە هەمان کاتدا دڵنیابوون لەوەی نەخۆشخانەکان و ناوەندە تەندروستی و پزیشکییەکان و پڕۆژەکانی ئاو و وێستگەکانی ئاوەڕۆی ئاوی قورس بەردەوام كارەبایان هەیە.

بەپێی پێشبینییە كەشناسییەكان، لە سبەینێوە 1ی ئاب شەپۆلێكی بەتینی گەرما ناوچەكانی عێراق دەگرێتەوە و پلەكانی گەرما دەگەنە سەرووی 50 پلەی سەدی لە هەندێك لە ناوچەكان.

محەمەد كەمال، شارەزای كەشناسی بۆ (خەڵك) ڕایگەیاند، بەهۆی گەشتنی بڕێك شێ و هاتنی نزمەپەستانی زەریای هیندی بۆ كوردستان و عێراق، پێشبینی دەكەین لەسبەینێ دوو شەمەوە پلەكانی گەرما ڕوو لەبەرزبونەوه بكات بەچەند قۆناغێك، كە سبەینێ بەیەك پلە ڕوو لەبەرزبونەوه دەكات و ڕۆژی سێ‌ شەممە زیاتر دەبێت.

ئاماژەی بەوەشكرد، ئەم شەپۆلی گەرمایە شەپۆلێكی بەهێزە و لە ڕۆژانی سێ شەممە و چوار شەممەی ئەم هەفتەیە لەناوچەكانی گەرمیان و كەركوك و دەورووبەری هەولێر 50 بۆ 52 پله تۆمار دەكات و لەگەڵ شێیەكشدا كەشێكی ناخۆش دروست دەبێت و ڕەنگە زۆركەسیش پێی تەنگەنەفەس بێت.