سەردێر

تەكسی دوبەی بەبێ‌ شۆفێر كەوتەكار

خەڵك-
ئەمڕۆ یە كشەممە، دەستەی ڕێگاوبان و گواستنەوە لە دوبەی دەستپێكردنی كارەكانی تاكسی بێ‌ شۆفێر (خۆ لێخوڕین)ی لە شارەكە ڕاگەیاند.

دەستەی ڕێگاوبان و گواستنەوە لە دوبەی لە ڕاگەیەندراوێكدا ئاماژەی بەوە كردووە، “كارپێكردنی ئۆتۆمبێلی بێ‌ شۆفێر دەستیپێكردووە بە پێشكەشكردنی خزمەتگوزاری تەكسی و خزمەتگوزاری حجزكردنی ئەلیكترۆنی لە دوبەی، لە چوارچێوەی ڕێككەوتنی شەراكەتی كە لە نێوان دەسەڵاتەكە و كۆمپانیای كروزی ئەمریكی واژۆ كراوە، لە ئەمڕۆوە دەست پێدەكات بۆ كارپێكردنی دوو ئۆتۆمبێلی (شۆفرلێت بۆڵت)ی كارەبایی.

دەستپێكردنی كارپێكردنی تەكسی بێ‌ شۆفێر بۆ پێشكەشكردنی خزمەتگوزاری تەكسی و خزمەتگوزاری حجزكردنی ئەلیكترۆنی لە دوبەی، لە چوارچێوەی ڕێككەوتنی هاوبەشە، كە لەنێوان دەسەڵاتی ڕێگاوبان و گواستنەوە و كۆمپانیای كروز واژۆ كراوە.

ئاماژەی بەوەشكرد، “ڕێككەوتنەكە یەكەم ڕێككەوتنە لە جۆری خۆی لە جیهاندا لە نێوان قەوارێكی حكومی و كۆمپانیایەكی پێشەنگ لە بواری گواستنەوەی بێ‌ شۆفێر، هەنگاوێكی گرنگ پێكدەهێنێت بۆ بەدیهێنانی ستراتیژی دوبەی بۆ لێخوڕینی زیرەك و بێ‌ شۆفێر”.

لە بەیاننامەكەدا ئاماژە بەوە كراوە، كە ستراتیژییەكە “ئامانجی گۆڕینی 25%ی هەموو گەشتەكانی گواستنەوە لە دوبەی بۆ گەشتەكانی خۆ لێخوڕین (بێ‌ شۆفێر) لە ڕێگەی ئامرازە جیاوازەكانی گواستنەوەوە تا ساڵی 2030”.

جێگای ئاماژەیە لە مانگی ئازاری ساڵی ڕابردوودا، دەسەڵاتی رێگاوبان و گواستنەوەی دوبەی پلانی بۆ دەستپێكردنی تاقیكردنەوەی تاكسی بێ شۆفێر ئاشكرا كرد لە چوارچێوەی هاوبەشی لەگەڵ كۆمپانیای كروز، كە لقێكی كۆمپانیای جەنەراڵ مۆتۆرزە بۆ ئۆتۆمبێلی خۆ لێخوڕین، كە دواجار ١٠ ئۆتۆمبێلی لە كاردا دەبێت.

كروز ڕەزامەندی دەربڕی لەسەر دەستپێكردنی یەكەمین خزمەتگوزاری تەكسی نێودەوڵەتی خۆ لێخوڕین لە دەرەوەی ئەمریكا لە دوبەی، ئەمەش لە گرێبەستێكدا كە شێخ حەمدان بن محەمەد، شازادەی جێنشینی دوبەی لە مانگی نیسانی ٢٠٢١ لە تۆڕی كۆمەڵایەتی تویتەر ڕایگەیاند.

شێخ حەمدان لەو كاتەدا وتی: “دوبەی یەكەم شار دەبێت لە دەرەوەی ئەمریكا، كە ئۆتۆمبێلی كروز ئۆتۆنۆم بەڕێوەببات”.

ئاماژەی بەوەشكردووە، “ئامانجمان ئەوەیە تا ساڵی ٢٠٣٠ لەسەدا ٢٥ی هەموو گەشتەكانی دوبەی بگۆڕین بۆ گەشتی خۆلێخوڕین لەڕێگەی شێوازە جیاوازەكانی گواستنەوەوە”.