سەردێر

قوباد تاڵەبانی: سلێمانی باشترینە لە كەرتی تەندروستیدا

خەڵك-
جێگری سەرۆك وەزیرانی هەرێمی كوردستان ڕایدەگەیەنێت، كە سەرباری 8 ساڵ قەیران، بەڵام سلێمانی باشترینە لە كەرتی تەندروستیدا و دەشڵێت: “كار و پڕۆژەی گەورەترمان بەدەستەوەیە”.

قوباد تاڵەبانی، جێگری سەرۆك وەزیرانی هەرێم لەدوای كردنەوەی دوو نەخۆشخانەی (كۆئەندامی هەرس و جگەری فێركاری) و (دكتۆر جەمال ئەحمەد رەشیدی تایبەت بە منداڵان) لە هەژماری خۆی لە فەیسبووك پەیامێكی سەبارەت بە دۆخی تەندروستی سلێمانی بڵاوكردەوە.

قوباد تاڵەبانی لە پەیامەكەیدا ئاماژەی بەوەكرد، سەرباری هەموو كەموكوڕییەكان و ٨ ساڵ قەیرانی دارایی، كەرتی تەندروستی پارێزگای سلێمانی بە هەوڵ و هیمەتی بەڕێوەبەران و پزیشكان و كارمەندەكانی باشترینە لەسەر ئاستی كوردستان و عێراقدا و لەپێناو باشتركردنی خزمەتگوزاریی تەندروستی بە خۆشحاڵییەوە ئەمڕۆ ئەو دوو نەخۆشخانەیەمان كردەوە.

ڕاشیگەیاند، بە وردی ئاگاداری كەموكورتییەكانی كەرتی تەندروستین، كار و پڕۆژەی گەورەترمان بە دەستەوەیە و بە پشتبەستن و بە هاوكاری پزیشك و كارمەندە بە تواناكانمان بەرەو ئامانجەكانمان هەنگاو دەنێین.