سەردێر

پۆتین و جۆنسۆن لەنێوان پیاوەتی و ناپیاویدا

سەرۆكی ڕوسیا وەڵامی سەرۆك وەزیرانی بەریتانیا دەداتەوە

خەڵك-
ڤلادێمير پۆتین سەرۆكی ڕوسیا، قسەكانی بۆریس جۆنسۆن سەرۆك وەزیرانی بەریتانیا ڕەتدەكاتەوە كە وتبووی “گەر ژن بوایە پەلاماری ئۆكراینای نەدەدا”.

ئەمڕۆ پێنج شەممە، پۆتین لە كۆنفرانسێكی ڕۆژنامەوانی لە میانی سەردانێكی بۆ توركمانستان، ئاماژەی بە بڕیارێكی مارگرێت تاچەر سەرۆك وەزیرانی پێشووتری بەریتانیا كرد، لەبارەی ڕەوانەكردنی هێز بۆ دوورگەكانی فۆكڵاند، كە بە وتەی بۆتین “قسەكانی جۆنسۆن پوچەڵدەكاتەوە”.

دوێنێ‌ چوار شەممە، جۆنسۆن بڕیارەكەی پۆتینی دژ بە ئۆكراینا كە لەلایەن مۆسكۆوە بە “ئۆپەراسیۆنی سەربازی تایبەت” ناودەبرێت، بە “نمونەیەكی زەقی نێرینەی ژەهراوی” لەقەڵەمدا و گاڵتەی بە هەڵوێستی پیاوانەی پۆتین كرد.

لەو بارەیەوە پۆتین بە ڕۆژنامەوانانی ڕاگەیاند”تەنیا دەمەوێت ڕووداوەكانی مێژووی هاوچەرخ وەبیربێنمەوە، كاتێك مارگرێت تاچەر بڕیاریدا ئۆپەراسیۆنی سەربازی لەدژی ئەرجەنتین بۆ دورگەكانی فۆكڵاند ئەنجام بدات، ژنێك بڕیاری ئەنجامدانی كاری سەربازی دەركرد”.

ئەمەش بە وتەی پۆتین”ئاماژەكردنێكی وردی سەرۆك وەزیرانی بەریتانیا نییە، بۆ ئەو ڕووداوانەی لەمڕۆدا ڕوودەدەن”.

سەرۆكی ڕوسیا بەردەوام بوو لە ڕەخنەگرتن لە جموجۆڵەكانی بەریتانیای 40 ساڵ لەمەوبەر، وەك وەڵامدانەوەیەكی سەربازی بۆ هەوڵەكانی ئەرجەنتین كە دەیویست دەست بەسەر ئەو دوورگانەدا بگرێت كە چڕی دانیشتوانیان كەمبوون و لەلایەن بەریتانیاوە لە باشووری ئۆقیانوسی ئەتڵەسی بەڕێوەدەبران.

پۆتین بە تەوسەوە پرسی “دوورگەكانی فۆكڵاند لە كوێ‌ و بەریتانیا لە كوێ‌؟، كردەوەكانی تاچەر چاوچنۆكی و تەماحی ئیمپریالیستی بوون و سەپاندنی خواست و تەئكیدكردنەوە بوون لەسەر پێگەی ئیمپراتۆریی”.

مۆسكۆ بەردەوام ڕەخنە لە دووبارەبوونەوەی دەستوەردانە خۆرئاواییەكان دەگرێت لە وڵانانی وەك یوگسلاڤیای پێشوو و ئەفغانستان و عیراق، وەك نمونەیەكیش دەیانهێنێتەوە بۆ ئیمپریالیستی خۆرئاوایی.