سەردێر

وەزارەتی خوێندنی باڵا روونكردنەوەی لەبارەی كوشتنی دوو مامۆستای زانكۆی سەڵاحەدین دا

خەڵك-
وەزارەتی خوێندنی باڵا و توێژینەوەی زانستی حكومەتی هەرێم روونكردنەوەی لەبارەی كوشتنی دوو مامۆستای زانكۆی سەڵاحەدین دا.

وەزارەتی خوێندنی باڵا و توێژینەوەی زانستی حكومەتی هەرێم لە ڕاگەیەنراوێكدا رایگەیاند، بەداخ و نیگەرانیەكەی زۆرەو سەرلەبەیانی ئەمڕۆ سێشەمە ڕێكەوتی (2022/6/28) لە ڕوداوێكی نەخوازراو و چاوەڕوان نەكراودا، لە كۆلێژی یاسای زانكۆی سەڵاحەدین – هەولێر، یەكێك لە خوێندكارەكانی بەشی یاسا بە چەك هێرش دەكاتە سەر حەرەمی زانكۆ و لە ئەنجامدا (د. كاوان ئیسماعیل) ڕاگری كۆلێژی یاسای زانكۆی سەڵاحەدین و (د. ئیدریس حەمەخان) مامۆستای كۆلێژی ئەندازیاری زانكۆی سەڵاحەدین شەهید دەبن و یەكێك لە كارمەندەكانیش بریندار دەكات.

راشیگەیاند، بۆ ئەم ڕوداوە دڵتەزێنە، وەزارەتی خوێندنی باڵا و توێژینەوەی زانستی پرسەو سەرەخۆشی ئاراستەی كەسوكارو خانەوادەی مامۆستایانی شەهید دەكات و هیوای چاكبونەوەی خێراش بۆ بریندارەكە دەخوازێت.

دەشڵێت: وەزارەتەكەمان لە كاتێكدا بە بەتوندی ئیدانەی ئەم جۆرە دەست درێژیانە دەكات، لەپێناو سەروەری یاساو پاراستنی حەرەمی زانكۆكان هەمو ڕێكارێكی یاسایی دەگرینە بەر، هیواشمان وایە هەمو مامۆستایان و خوێندكاران و كۆمیونیتی ئەكادیمی زانكۆكان پێكەوە هەماهەنگ بن بۆ ئەوەی بەرپرس بین و نەهێڵین ئەم دیارەدە دزێوانە بپەڕنەوە ناو حەرەمی زانكۆكانمان و پەرەبسێنێت.