سەردێر

لە سلێمانی بڕیارێك بۆ خانووە كەلەپورییەكان دەركرا

خەڵك-

قائیمقامی سلێمانی ڕایدەگەیەنێت، خانووە كەلەپورییەكان سامانێكی نەتەوەیین و پارێزگاری كردن لێیان ئەركی كەسانی دڵسۆز و خەمخۆری شارە.

خانووە كەلەپورییەكانی گەرەكە دێرینەكانی شاری سلێمانی، كە مێژووی دروستبوونیان دەگەرێتەوە بۆ سەدەی ١٩، ڕووبەڕووی مەترسی لە ناوچوون دەبنەوە و قائیمقامی سلێمانیش دەڵێت: “هەریەك لەو خانوانە خاوەنی چەندین سەرگوزشتەی سیاسی و ئەدەبی و كلتوری شاری سلێمانی بوون و پارێزگاریكردن لێیان ئەركی كەسانی دڵسۆز و خەمخۆری شارەكەیە”.

ئاوات محەمەد، قائیمقامی سلێمانی ڕایگەیاند، “خانووە كەلەپورییەكانی شاری سلێمانی بایەخێكی گەورەی سیاسی، مێژووی، تەلارسازی، ئەدەبی كلتوری، كۆمەڵایەتی و گەشتیاری هەیە، لەبەرئەوەی ئەو خانوانە مێژوویەكی دێرینیان هەیە و تەمەنیان زیاتر لە ١٠٠ ساڵە و لە ئێستادا بەهۆی كاریگەرییە سروشتی و مرۆییەكانەوە لە بەردەم مەترسی لە ناوچووندان، ئیمەش وەكو قائیمقامیەتی سلێمانی هەموو تواناكانی خۆمان دەخەینە گەر بۆ مانەوە و پارێزگاریكردن لێیان، لەبەرئەوەی هەر یەك لەو خانوانە گوزارشتن لە مێژووی بەرجەستەی دێرینی شاری سلێمانی و هەڵگری چەندین سەرگوزشتەی جۆراوجۆری شارن و بە لەناوچونیان بەشێك لە مێژووی سلێمانی لەناو دەچن”.

جەختیشیكردەوە، پێویستە لە ئێستاو داهاتوودا كار بۆ نۆژەنكردنەوەیان بكرێت و بكرێنە ناوەندێكی گەشتیاری و كەلەپوری بۆ گەشتیارانی ناوخۆیی و بیانی.

لای خۆشییەوە رێباز مەحمود، سەرۆكی لیژنەی شوێنەوار لە قائیمقامیەتی سلێمانی ڕایگەیاند، “بە بریاری قائیمقامی سلێمانی لیژنەكەیان دیاریكراوە تایبەت بە شوێنە كۆن و خانووە كەلەپوریەكانی گەڕەكە كۆنەكانی سلێمانی تاوەكو لە رێگەی ڕێنماییەكانی ( (TOR، شارەوانی سلێمانی، بەرێوەبەرایەتی شوێنەواری سلێمانیەوە پارێزگاری لە گەرەكە دێرینەكانی (سەرشەقام، جولەكان، دەرگەزێن، مەڵكەندی، سابونكەران، شێخان، قەزازەكان) بكەین و لەمەترسی لەناوچوون بیانپارێزین، لەبەرئەوەی ئەو خانوانە مۆركێكی تەواو كەلەپوریان هەیە”.

ئاماژەی بەوەشكرد، لیژنەكەیان كار دەكات بۆ پاراستنی كۆڵان و خانوو و ئەو شوێنەوارانەی، كە دەكەونە سنوری ئەو 7 گەڕەكەوە.

سەرۆكی لیژنەكە ئەوەشی خستەروو، لەماوەی ٦ مانگی ڕابردوودا لیژنەكەیان ٣٧٦ سەردانی ئەنجامداوە و بەهۆی پابەندنەبوون بە رێنماییەكانەوە، پسوڵەی سەرپێچیان بۆ ٨ شوێن كردووە، ٢٨ شوێنیشیان ئاگاداركردۆتەوە، كە پابەندی یاسا و ڕێنماییەكان بێت، و لەكۆی هەموو سەردانەكانیشدا تەنها یەك شوێن داخراوە و ٢ خاوەن موڵكیش ڕووبەڕووی دادگا كراونەتەوە.

ئەم كارە پاڵپشت بە یاسای بەرێوەبردن و پاراستنی شوێنەوار و كەلەپور ژمارە (٥ی ساڵی ٢٠٢١) ئەنجام دەدرێت، كە لە پەڕلەمانی كوردستان دەرچووە، تێیدا هاتووە “ئەو خانوانەی موڵكی خەڵكییە و شوێنەوار قەدەغەی مامەڵە پێوەكردنیان خستۆتە سەر نابێت بێ پرسی بەرێوەبەرایەتییە پەیوەندیدارەكان دەستكاری بكرێن، یاخود زیانیان پێبگەیەنرێت، لەكاتی نۆژەنكردنەوەدا دەبێت رەچاوی لایەنی شوێنەوار و كەلەپوری بكرێت و لەژێر چاودێری و ڕێنمایی دامودەزگا پەیوەندیدارەكاندا ئەنجام بدرێت”، هەر بە پێی ئەم یاسایە هەموو شوێنەوار و كەلەپورەكان موڵكی دەوڵەتن و دەبێت بپارێزرێن.