سەردێر

یەكێتی ئەوروپا باسی تێچووی ئاوەدانكردنەوەی ئۆكراینا دەكات لە پاش جەنگ

زیاتر لە تریلیۆنێك دۆلاری دەوێت

خەڵك-
ئۆكراینا پێویستی بە (1.1 تریلیۆن دۆلار) یارمەتی دەرەكی هەیە، لەپێناو چاككردنەوەی ئەو زیانانەی پێگەیشتووە بەهۆی جەنگی داگیركاریی ڕوسیا بۆ وڵاتەكە.

ڤێرنەر هویر، سەرۆكی بانكی وەبەرهێنانی ئەوروپایی كە لقی قەرزەكان لە یەكێتی ئەوروپا بەڕێوەدەبات ڕایگەیاند:”كاتێك تەماشای ئاستی وێرانكاریی ئۆكراینام كرد، قسەم لەسەر تریلیۆنێك كرد، چونكە چەندان ژمارەم لە فەزای گشتی بەدی كرد كەبە تەواوەتی ناواقیعی بوون و لەگەڵ ئاستی وێرانكارییەكاندا یەكانگیرنەبوون”.

هویر لە كۆنفرانسێكی ڕۆنامەوانی لە فرانكفۆرت وتی:”دەبێت ئەوروپا ڕۆڵی گەورەتر ببینێت لەو هەوڵەدا”.
ڕوسیا و ئۆكراینا گەورەترین ئابوری ئەوروپان، لەئێستاشدا بەهۆی جەنگەوە گەورەترین قەیرانی خۆراك و وزەیان لە جیهان و ئەوروپادا دروستكردووە.

باسكردن لە تێچووی نۆژەنكردنەوەی ئۆكراینا لە پاش جەنگ، لەكاتێكدایە كە وابڕیارە سەركردەكانی یەكێتیی ئەوروپا لە پێنج شەممە و هەینی داهاتوو لە برلاۆكسل كۆببنەوە، بۆ تاوتوێكردنی پلانی ئاوەدانكردنەوەی ئۆكراینا و هەوڵی بوون بە ئەندامی كێیڤ لە یەكێتی ئەوروپا.

كۆمسیۆنی ئەوروپا بۆ یەكەمجار لە ناوەڕاستی مانگی ئایاری ڕابردوو، دوایین هاوكاریی پێشنیار كرد، لەپێناو پڕكردنەوەی بەشێك لە پێداویستییە داراییەكانی ئۆكراینا بە نزیكەی 5 ملیار یۆرۆی مانگانە.
دەكرێت بانكی وەبەرهێنانی ئەوروپایی، ڕۆڵی مەركەزی ببینێت لە ڕەوانەكردنی ئەو یارمەتییە داراییەی یەكێتی ئەوروپا پێشكەشی دەكات بۆ ئەو وڵاتەی جەنگ لەبەریەكی هەڵوەشاندووە.
هویر دەڵێت، لەئێستادا هەوڵ دەدات پابەندبوونەكانی بانكی وەبەرهێنانی ئەوروپا بگێڕێتەوە و بە بڕی ملیارێك تا ملیارێك و 500 ملیۆن یورۆ بۆ هەوڵەكانی ئاوەدانكردنەوەی ئۆكراینا تەرخان بكات، لەو بارەیەوە ئاماژەی بە دەستەبەركردنی ڕەزامەندی كردبوو لەم هەفتەیەدا.

لە 24ی شوباتی ڕابردووەوە، ڕوسیا دەستی بە ئۆپەراسیۆنی سەربازی كرد لە ئۆكراینا، بیانووشی بۆ ئەم كارە، “دامەزراندنی كارگەی دروستكردنی چەكی بایۆلۆجی و هەوڵەكانی كێیڤ بوو بۆ لەناوبردنی زمان و كەمینەی ڕوس لە وڵاتەكە، وێڕای نزیكبوونەوەی هەڕەشە و مەترسییە سەربازییەكانی خۆرئاوا لە شوراكانی مۆسكۆ” كە بەلای بەرپرسانی كرملینەوە “مایەی قبوڵكردن نەبوون”.

لەئێستادا شەڕوپێكدادانەكان لە باشووری خۆرهەڵاتی ئۆكراینا و بە تایبەت لە ناوچەكانی لۆگانسك و دۆنێتسك قەتیس بوون كە بەلای دەسەڵاتدارانی ڕوسیاوە بە دوو ناوچەی گرنگ دادەنرێن بۆ یەكلایی كردنەوەی گرەوی جەنگەكە.

ئەمریكا و یەكێتی ئەوروپا، هەر لە سەرەتای دەستپێكردنی جەنگەوە، بە چەك و تەقەمەنی و یارمەتی دارایی، هاوكاریی دەسەڵاتدارانی كێیڤ دەكەن، ئەمەش نیگەرانی لای ڕوسەكان دروستكردووە كە بۆ چەندان جار ئاماژەیان بە مەترسی فراوانبوونی ڕووبەری جەنگ و پەنابردنە بەر بەكارهێنانی چەكە نائاساییەكان كرد.