سەردێر

سەدر و پەڕلەمانتارە دەستلەكاركێشاوەكانی فڕاكسیۆنەكەی دەچن بۆ حەج

سەدر بۆ بارزانی و حەلبوسی: چاوەڕێی سوپرایز و گۆڕانكاریی لەناكاوبن

خەڵك-
پەڕلەمانتارە دەستلەكاركێشاوەكانی فراكسیۆنی سەدر بەهاوڕێیەتی موقتەدا سەدر بۆ ئەنجامدانی فەریزەی حەج سەردانی سعودییە دەكەن.

چەند میدیایەكی عێراقیی كە پشتیان بەلێدوانی چەند سەرچاوەیەكی ئاگاداری گروپەكەی موقتەدا سەدر بەستووە، بڵاویان كردووەتەوە، پەڕلەمانتارە دەستلەكاركێشاوەكانی فراكسیۆنی سەدر بەهاوڕێیەتی موقتەدا سەدر بۆ ئەنجامدانی فەریزەی حەج سەردانی سعودییە دەكەن.

ئاماژە بە ئەوەشكراوە، فراكسیۆنی سەدرو ڕێبەری فراكسیۆنەكە لەسعودیە چەند كۆبوونەوەیەكی نهێنیی لەگەڵ بەرپرسانی ئەو وڵاتە ئەنجامدەدەن كە هاوكات دەبێت لەگەڵ كۆبوونەوەكانی كۆمەڵەی وڵاتانی ئەنجومەنی هاریكاری كەنداو لە15ی مانگی داهاتوودا، ئەویش بەبەشداریی جۆ بایدن سەرۆكی ئەمریكاو ئامادەبوونی مستەفا كازمی سەرۆك وەزیرانی عێراق.

ئەو گەشتەی سەدر جێگەی گومانی ڕكابەرەكانییەتی، بەتایبەت كە ئەوە ئاشكرابووە، ناوبراو داوای لەهاوپەیمانەكانی (بارزانی ‌و حەلبوسی) كردووە تاوەكو كاتی گەڕانەوەی ئەو لەئەنجامدانی فەریزەی حەج، لەهاوپەیمانێتییەكەیان بەردەوامبن ‌و هەڵینەوەشێننەوە.

باس لە ئەوەشكراوە، لەماوەی چەند ڕۆژی ڕابردوودا سەدر بەتەلەفۆن قسەی لەگەڵ هەریەك لەمەسعود بارزانی‌و محەمەد حەلبوسیدا كردووەو تێیدا پێیڕاگەیاندوون، لەدوای 10ی مانگی تەممووزەوە چاوەڕێی سوپرایز و گۆڕانكاریی لەناكاوبن.

ئەندامانی پەڕلەمانی عێراق لە فراكسیۆنی سەدر دەستیان لەكار كێشاوەتەوە، بڕیارە ڕۆژی پێنجشەممە 23\6\2022 پەڕلەمانی عێراق كۆببێتەوە، بەپێی زانیارییەكان كۆبوونەوەكە بۆ دانانی شوێنگرەوەی ئەو ئەندامانەی فراكسیۆنی سەدر دەبێت كە دەستیان لەكار كێشاوەتەوە.