سەردێر

مەلا بەختیار: یەكێتی هەتا لەناو گۆڕانكاڕییەكاندا بوو تا دەهات پێشدەكەوت

خەڵك-
ئەندامێكی ئەنجوومەنی باڵای سیاسی و بەرژەوەندییەكانی یەكێتیی نیشتمانیی كوردستان ڕایدەگەیەنێت، پیرۆزبایی لەهەموو ئەوانەی دەیانەوێ‌ ئەم حزبە، حزبی گۆڕانكاریی ‌و دیموكراسی ڕاستەقینە بێ‌ و دەشڵێت: ” یەكێتی هەتا لەناو گۆڕانكاڕییەكاندا بوو تا دەهات پێشدەكەوت”.

مەلا بەختیار لە كۆبوونەوەی لەگەڵ شاندێكی ڕێكخراوی گەنجانی ڕاپەڕین‌ ڕایگەیاند، پیرۆزبایی لەهەموو ئەوانە دەكەم دەیانەوێ‌ ئەم حزبە، حزبی گۆڕانكاڕی، دیموكراسی ڕاستەقینە، بونیاتنانی مەدەنی، دادپەروەری، بەدیهێنانی مافەكانی یەكسانی ژن و پیاو بێ‌، هەموو ئەوانەشی دەیانەوێ‌ دۆخەكە، گۆڕانكارییەكان، دیاردە كۆمەڵایەتییەكان، دیاردە سیاسی و ئابورییەكان بەباشی بخوێننەوە و بەرنامەی گۆڕانكاری دابنێن.

ڕاشیگەیاند، یەكێتی، هەتا لەناو گۆڕانكارییەكاندا بوو، تا دەهات پێشدەكەوت، ئەو كاتەشی لەگۆڕانكاری وەستا، توشی جۆرەها تەنگ‌ وچەڵەمە و كێشە بوو.

وتیشی: ئێستا كێشە زۆرە، گیروگرفت زۆرە، گەندەڵی زۆرە، دیاردەی ناپەسەند زۆرە، بەڵام هەموو ئەمانە نامۆن بە فەلسەفەی سیاسی یەكێتی! ئەم دیاردە نامۆیانە بمێنن، یەكێتی تووشی كارەساتی گەورە دەبێت، بەپێچەوانەشەوە ئەم دیاردانە نەمێنن، یەكێتی لەگەڵ گۆڕانكارییەكاندا، بەردەوام لەپێشكەوتندا دەبێ‌ و دەتوانێ‌ سەركەوتنی گەورە بەدیبهێنێ‌.