سەردێر

بایكۆتی مامۆستایانی و فەرمانبەرانی 4 زانكۆ دڕێژكرایەوە

خەڵك-

نوێنەرانی ناڕازی زانكۆكانی (سلێمانی، چەرموو، هەڵەبجە و ڕاپەڕین) بڕیاریاندا بە درێژكردنەوەی ماوەی بایكۆتی مامۆستایان و فەرمانبەران بۆ 25ی ئەم مانگە و جەختیشدەكاتەوە، دوای ئەو وادەیە جارێكی دیكە كۆدەبنەوە.

ستافی ناڕازی زانكۆی سلێمانی لە ڕاگەیەنراوێكدا ئاماژەی بەوەكردووە، وەكو نوێنەرانی، ئەنجومەنی ناڕازی سەربەخۆی مامۆستایان و فەرمانبەرانی وەزارەتی خوێندنی باڵا كۆبوونەوەیەكی ئۆنلاین ڕێكخرا و بەكۆی دەنگی سەرجەم نوێنەرانی زانكۆكای (سلێمانی، چەرموو، هەڵەبجە و ڕاپەڕین) بڕیاردرا ئەم هەفتەیەش تا 25ی ئایار درێژەپێدەری بایكۆتی هۆڵەكانی خوێندن و ناڕەزایەتی و خۆپیشاندانەكان دەبێت.

جەختیشی كردۆتەوە، لە سبەینێوە، یەك شەممە بەرواری ٢٢/ ٥/ ٢٠٢٢، چالاكییەكانمان لە بەردەم هەردوو كەمپی كۆن و نوێ بەردەوام دەبن.

مامۆستایان، فەرمانبەران، خوێندكاران…
سڵاوی خواتان لێبێت.
بابەت / بەردەوامیی ناڕەزایەتی و بایكۆت
وەكو نوێنەرانی، ئەنجومەنی ناڕازی سەربەخۆی مامۆستایان و فەرمانبەرانی وەزارەتی خوێندنی باڵا لەسنوری ئیدارەی سلێمانی و ستافی ناڕازی زانكۆی سلێمانی، بەشداری كۆبوونەوەی ئۆنلاینی ئەنجومەنی هاوبەشی مامۆستایان و فەرمانبەرانی ناڕازی زانكۆكانی سنوری ئیدارەی سلێمانیمان كرد. ئەویش بۆ گفتگۆكردن و بڕیاردان لەبارەی چالاكییەكانی داهاتوو و پێشهاتەكان.
بەڕێزان بەكۆی دەنگی سەرجەم نوێنەرانی زانكۆكان: سلێمانی، چەرموو، هەڵەبجە و ڕاپەڕین، بڕیاردرا: ئەم هەفتەیەش، لە بەرواری ۲۱/٥/٢٠٢٢ ڕۆژی شەممە ، درێژەپێدەری بایكۆتی هۆڵەكانی خوێندن و ناڕەزایەتی و خۆپیشاندانەكان دەبێت، تـــاوەكو بەرواری ۲٥/ ٥/ ٢٠٢٢.
بەپێی وەڵامی لایەنە پەیوەندیدارەكان بۆ ئەو داواكارییانەی لە ماوەكانی رابردوودا ئاراستەیان كراون، پاش ئەو بەروارە جارێكی تر كۆدەبینەوەو بڕیارێكی نوێی هاوبەش دەردەكەین.
لەبەرئەوە بۆ گەڕاندنەوەی شكۆ بۆ كۆمەڵگە و لەژێر درووشمی: پێكەوە بەهێزترین و پێكەوە دەتوانین گۆڕانكاری دروست بكەین، داوا لەمامۆستایان، فەرمانبەران و خوێندكارانی بەڕێز دەكەین بەشداری ناڕەزایەتیەكان و چالاكییە مەدەنییەكانی رۆژانی داهاتوو بكەن.
لە سبەینێوە، یەك شەممە بەرواری ٢٢/ ٥/ ٢٠٢٢، چالاكییەكانمان لە بەردەم هەردوو كەمپی كۆن و نوێ بەردەوام دەبن.
ستافی ناڕازی زانكۆی سلێمانی