سەردێر

وەزیری پەروەردە لەسەر تاقیكردنەوەی 12ی ئامادەیی ڕوونكردنەوە دەدات

خەڵك-ئارام سەردار
وەزیری پەروەردە ڕایدەگەیەنێت، پرسیارەكانی تاقیكردنەوەی پەروەردەی ئیسلامی پۆلی ١٢ پرسیاری وزرای نین، بەڵكو پرسیاری وەرزی دووەمە لە خوێندنگەیەك، ئەو مامۆستایە هەڵەی نەكردوە، پرسیاری هێناوەتەوە لەكتێبێك نزیكەی 10 ساڵە هەیە و دەخوێندرێت، بۆ تاقیكردنەوەكانی وزاریش جەخت دەكاتەوە كەوا كۆمەڵێك ڕێكاریش تریش دەگیرێتەبەر بۆ نەهێشتن و كەمكردنەوەی حاڵەتەكانی گزیكردن.

ئالان حەمە سەعید، وەزیری پەروەردە لەكۆنفڕانسێكی ڕۆژنامەوانیدا لەبارەی پرسیارەكانی پەروەردەی ئیسلامی، كەلەكۆی ١٥ پرسیار ١٠ پرسیار لەبارەی ئایینی ئێزیدی بوو ڕایگەیاند، هەركەسێك ئەو بابەتە پەیوەست دەكات بەپرسی سیاسی كەیفی خۆیەتی من ناچمەوە ناو ئەو وەڵامە، بەڵام پرسیارەكانی تاقیكردنەوەی پۆلی ١٢ پرسیاری وزرای نین، لەسەر ئاستی وەزارەت و پەروەردە گشتیەكانیش دانەنراون.

دەشڵێت: “مامۆستایەك لەسنووری ڕانیە تاقیكردنەوەی وەرزی دووەمی كردوە لەبابەتی پەروەردەی ئیسلامی و ئاییناسی، كە ١٥ بەندە كەبەشێكی ئاییناسیە، بەڵام ئێمە ڕێگانادەین پەروەردە وەك دامەزراوەیەكی مەدەنی و و پەروەردەیی ببێتە جێگای بێڕێزیكردن بەرامبەر هیچ ئایین و پێكهاتەیەكی نەتەوەیی، لەسەر ئەوەش كارناكەین دیدگا و بۆچوونێك بەسەر ئێمە بسەپێنن، بەڵكو ئێمە بەرگری لەئایین دەكەین وەك دامەزراوەیەكی بەرپرسیار.

ئەوەشی خستەڕوو، ئەو مامۆستایە هەڵەی نەكردوە، پرسیاری هێناوەتەوە لەكتێبێك نزیكەی 10 ساڵە هەیە و دەخوێندرێت، بۆیە ئێمە وەڵامی كەس نادەینەوە، چونكە لەپرسیارەكان هیچ بێڕێزیەكی تێدا نیە.

وەزیری پەروەردە ڕەتیشی دەكاتەوە بەوەی پرسیارەكانی وزرای دزەی پێكرابێت، بەكارهێنانی ئامێرە تەكنەلۆژیەكانیش هەر لێرە نیە، بەڵكو بەهۆی ئەو ڕێكارانەی ئەنجاممان داوە ساڵی ڕابردوو زیاتر لە٢٥٠ خوێندكار بەگزی تاقیكردنەوەكانیان لەسەر هەژماركراوە و بۆیان نەبووە لەخولی دووەمیش تاقیكردنەوە بكەن، ژمارەیەك كەسیش دراون بەدادگا بەهۆی بازرگانی كردن بەم بابەتە، كۆمەڵێك ڕێكاریش تریش دەگیرێتەبەر بۆ نەهێشتن و كەمكردنەوەی حاڵەتەكانی گزیكردن.