سەردێر

بەریتانیا هەوڵی دەركردنی بڕیارێك دژی بەكارهێنانی چەكی كیمیایی لەلایەن توركیاوە لە هەرێمی كوردستان دەدات

خەڵك-

بەپێی زانیارییەكان بڕیارە نێوەڕاستی ئەم هەفتەیە شاندێكی بەریتانی بچنە رێكخراوی قەدەغەی بەكارهێنانی چەكی كیمیایی لەلاهای هۆڵەندا بۆ فشاردانان لەسەر رێكخراوەكە بۆ دەركردنی بڕیارێك دژی بەكارهێنانی چەكی كیمیایی لەلایەن سووپای توركیاوە لە هەرێمی كوردستان.

ستیڤن سوینی لە شاندەكەدایە و راپۆرتێكی دەربارەی بەكارهێنانی چەكی كیمیایی ئامادەكردووە و نمونەی لە گوندنشینان وەرگرتووە و ساڵێك لە ناوچەكەدا كاریكردووە.

ئەمڕۆش ناوەندی چاپەمەنی و راگەیاندنی هێزەكانی پاراستنی گەل هەپەگە باڵی سەربازی پارتی كرێكارانی كوردستان پەكەكە ئاماژە بەوە دەكات شەڕ زۆر بە قورسی بەڕێوەدەچێت، سووپای دەوڵەتی توركیا هێرش دەكات و 21 جار چەكی كیمیایی بەكارهێناوە، بەڵام لەزۆرینەی هێرشەكاندا تێكشكێندراون و ناچار بە كشانەوە كراون.

لە 17ی نیسانی 2022وەوە سووپای توركیا ئۆپەراسیۆنێكی فراوانی بۆ سەر ناوچەكانی هەرێمەكانی پاراستنی مەدیای ژێر دەستی پەكەكە دەستپێكردووە و شەڕی قورس هەیە.