سەردێر

كێشەی زەویوزار بووەتە كێشەیەكی ترسناك

خەڵك-

عەبدولستار مەجید سەرۆكی لیژنەی كشتوكاڵ لە پەرلەمانی كوردستان بە دەنگی ئەمەریكای ڕاگەیاند ” كێشەی زەوی و زار بووەتە یەكێك لە كێشە گەورە و ترسناكەكان لە هەرێمی كوردستان ئەمەش بۆ دوو هۆكار دەگەڕێتەوە”.

روونیكردەوە، كێشە لە یاساكاندا هەیە پێویستە هەندێك یاسا كە پەیوەندیدارە بە كشتوكاڵ و زەوی وزار و جوتیارەوە بەشێوەیەك هەموار بكرێت كەلەگەڵ بارودۆخ و ژینگە و ئاستی ڕۆشنبیری و كۆمەڵایەتی هەرێمی كوردستان و كۆمەڵگەی كوردەواری بگونجێت. پێویستی بە دەركردنی هەندێك یاسای نوێش هەیە ئەو یاسایانەی كە هەن بەداخەوە بەشێكی زۆری یاسا كۆنەكانی ساڵانی سی و پەنجا و شەستەكانی تێدایە بەبێ دەستكاری و هەمواركردنەوەیان.

سەرۆكی لیژنەی كشتوكاڵ ئـەم جۆرە كێشانە بۆ كەمتەرخەمی و فەرامۆشكردن و بێ خەمی حكومەت دەگێڕێتەوە و دەڵێت ” بۆ نموونە یەكە ئیداریەكان، حكومەت و وەزارەتی كشتوكاڵ زۆرچاك دەزانن لە فڵان گوند یان هەندێك كێشە هەیە بە دەمیەوە ناچن كە زوو چارەسەریان بكەن و لێپرسینەوە و بەدواداچوونیان بۆ بكەن، دەبینی لە ناكاو كێشەكە گەورە دەبێت و قوربانیەكی زۆری لێدەكەوێتەوە.”

لای خۆیەوە كوێستان ئەحمەد قایمقامی قەزای خەبات دەربارەی شەڕەكەی ئێوارەی دوێنێی سنوورەكە، بە دەنگی ئـەمەریكای ڕاگەیاند” كێشە و شەڕ لە نێوان دوو برا دروست دەبێت كە سەردانی گوندەكەیان دەكەن، دەبێتە هۆی ئەوەی كە پێنج كەس بكوژرێن و دوو كەسیش برینداربن، لایەنێك باوكێك و سێ كوڕ كوژراون و لایەنێكی تریش كوڕێك كوژراوە و ژمارەی كورژراەكان بووەتە پێنج كەس.”

بەپێی زانیارییەكان نیوەڕۆی ئەمڕۆش لەسنووری قەزای خەبات شەڕ روویداوەتەوە، بەڵام زانیاری لەبارەی قوربانیەوە نییە.