سەردێر

محەمەد بن زاید بووە سێهەم سەرۆكی ئیمارات

خەڵك-

ئەمڕۆ شەممە محەمەد بن زاید دوای كۆچی دوایی سەرۆكی وڵات دوێنێ هەینی، بە سەرۆكی ئیمارات هەڵبژێردرا كە دەبێتە سێهەم سەرۆكی ئەم دەوڵەتە لە دوای سەربەخۆبوونیەوە.

بەپێی راگەیەندراوێك محەمەد بن زاید بەپێی مادەی 51ی دەستوور بە سەرۆكی ئیمارات هەڵبژێردرا.

لای خۆیەوە محەمەد بن زاید بەخشینی متمانەی سەرۆكایەتی وڵاتەكەی بەزر نرخاند.

شێخ محەمەد بن زاید كوڕی سێهەمی دامەزرێنەری دەوڵەتی ئیمارات شێخ زاید بن سوڵتان ئالنەهیانە.

محەمەد بن زاید ساڵی 1961 لەدایكبووە و دەرچووی ئەكادیمیای ساندهیرستی سەربازی شاهانەیە ساڵی 1979 و خوێندوویەتی لە بواری فڕۆكەوانی و تانك و چەند بواری دیكەی سەربازی.

محەمەد بن زاید ساڵی 1993 بووە بە سوپاسالاری سووپای ئیمارات.

ساڵی 2004 بووە بە جێگری جێنشینی ئیمارات.

هەمان ساڵ پۆستی سەرۆكی ئەنجوومەنی جێبەجێكاری فەرماندەیی گشتی هێزە چەكدارەكانی ئیماراتی پێدراوە.

ئیمارات ئێستا بە یەكێك لە دەوڵەتانی پێشكەوتووی جیهان دادەندرێت و، ئیمارات چەندین پلەی پێشەنگی وەرگرتووە و بەهێزترین و گەشەدارترین ئابووری هەیە لە خۆرئاوای ئاسیادا.

دەوڵەتی ئیمارات هەڵكەوتووی سەر كەنداوی عەرەبیی و باشووری خۆرئاوای كیشوەری ئاسیایە.

ئیمارات ساڵی 1971 سەربەخۆیی راگەیاندووە كە پێشتر بە بیابانی عومان ناوی براوە.

ئیمارت حەوتەم دەوڵەتی جیهانە لەڕووی بوونی نەوتی یەدەگەوە.

سیستمی سیاسی ئیمارات بەپێی دەستووری وڵاتە كە لە 1971 نووسراوەتەوە.

سەرۆك لەلایەن ئەنجومەنێكی فیدراڵیەوە بۆ ماوەی 5 ساڵ هەڵدەبژێردرێت كە ئەنجومەنەكە لە حاكمی 7 هەرێمە فیدراڵییەكەی ئیمارات پێكهاتوون.

دانیشتوانی ئیمارات نزیكەی شەش ملیۆن كەسە، بەپێی ئاماری 2014، بەڵام بەپێی ئامارێكی پێشتر دانیشتووانەكەی 8 ملیۆن كەسبوون، كە نزیكەی ملیۆنێكی هاووڵاتی ئیماراتی و ئەوانەی دیكەی كەسانی بیانی بوون كە مافی مانەوەیان پێدراوە لەم دەوڵەتەدا.

لەڕووی رەگەزیەوە دانیشتووانی ئیمارات پێكدێن لە 19% ئیماراتی، 23% عەرەب و ئێرانی، 50% باشووری ئاسیا و 8% شوێنی دیكەن.

هەرێمەكانی ئیمارات پێكدێن لە ئەبووزەبی، دوبەی، شاریقە، رەئس خەیمە، فەجیرە، ئوم قیەوین، عەجمان.

ئیمارات دەوڵەمەندترین دەوڵەتی عەرەبییە و داهاتی تاك تێیدا زۆر بەرزە، ئیمارات دەوڵەتێكی نەوتییە، بەڵام كەمتر پشتی بەداهاتی نەوت بەستووە، پشتی بە داهاتی دیكەی پیشەسازی و جۆری دیكە بەستووە.

دوبەی بە نێوەندی بارزگانی و دارایی ئیمارات و كەنداو دادەندرێت، نێوەندێكی گرینگی ئابووری جیهانییە، هێزی كاری زۆری ئاسیایی لە هیندستان و پاكستان و ئێران و بەنگلادیش و فلیپین و چینی تێدایە لەگەڵ میسری و سووریایی و لووبنانی و عەرەبی دیكە لەگەڵ كەمێكی ئەمریكایی و ئەوروپایی.

 





هەلبژاردە

گرنگترینەکان