سەردێر

پسپۆڕێك: بومەلەرزە لە عیراقدا زۆر دەبێت

باسی گۆڕانكارییەكی مەترسیدار دەكات

خەڵك-
عادل موختار، ڕوێژكار و پسپۆڕی كشتوكاڵی پێیوایە، ڕێژەی بومەلەرزە لە عیراق زۆر دەبێت بەهۆی قەتیسبوونی گەرما و گۆڕانكاریی كەشوهەواوە.

ئەمڕۆ چوار شەممە، عادل موختار لە لێدوانێكی ڕۆژنامەوانیدا ڕایگەیاند”لەم ماوەیەی دواییدا بومەلەرزە لە عیراق زیاتر بوو، بەهۆی ئەو ڕەوشە نائاساییەی وڵاتی پێدا تێدەپەڕێت”.

بە وتەی ئەو پسپۆڕە”دابەزینی ئاستی ئاوی دەریاچەی ساوە و ئاوی ژێرزەوی و دابەزینی عەمباری ستراتیژی ئاو بەراورد بە ساڵی ڕابردوو، و كەمبوونەوەی ڕووبەرە چێنراوەكان و بەرزبوونەوەی پلەی گەرما، لەگەڵ هەڵاوی سوتانی غاز لە بیرە نەوتەكان، هەموو ئەم فاكتەرانە دەبنە مایەی تێكچوونی گوشارەكان لە كەشوهەوادا”.

عادل موختار پێیوایە”ژمارەی بومەلەرزە لە عیراقدا ڕوو لە زیادبوون دەكات، لە دوای شەپۆلە گەورەكانی خۆڵبارینی وەك شەپۆلی ئەفریقایی و شەپۆلی هیندی كە بەمزوانە ڕوو لە وڵات دەكەن”.