سەردێر

گەنجێكی كورد داهێنانێكی ناوازە بۆ ئاو و كارەبا دەكات

خەڵك-

گەنجێكی هەڵەبجە، كە دەرچووی بەشی فیزیایە لە زانكۆی هەڵەبجە ئامێرێكی ناوازە بە زمانی كوردی دروست دەكات، كە لە چوار بەش پێكدێت، بەشێكی لە ماڵەوە و سێ‌ بەشەكەی تری لە ئامێرێكی بچووكدان، كە لە لەسەر تانكی ئاو و بۆری ئاو و سویچ پلاك دەبەسترێن.

ئەو گەنجە هەڵەبجەییە ناوی (ئالان محێدین حسێن)ە و بە (ئالان قەرەداغی) ناسراوە، خاوەنی چەند كتێبێكی زانستییە و ئامێرێكی دروست كردووە بە زمانی شیرینی كوردی چەند كارێك دەكات و ناوی لێ‌ ناوە (ئاسان ژیان)، كە چەند ئامێرێكە لەناو یەك ئامێردا.

وەك ئالان ئاماژەی پێ‌ كردووە، ماوەی دوو ساڵ و پێنج مانگە لە بیرۆكەوە تا ئێستا خەریكی ئەم پڕۆژەیەیە و ئەمڕۆ تەواو بووە و تایبەتمەندییەكانی ئەوەیە، كە لە چوار بەش پێكهاتووە، ئەوەی وێنەكە، كە بەشە سەرەكیەكەیە لە ماڵەوە دائەنرێت، سێ بەشەكەی تریش سێ ئامێری بچووكن، یەكیان لەسەر تانكی سەربان دائەنرێت، یەكیان لەسەر بۆری ئاوی ڕەیسی ئەبەسترێت، ئەوی تریش ئەدرێ لە سویچ پلاكێك.

دەشڵێت: “بۆ دروستكردنی پڕۆژەكە زیاتر لە 400 تەلەفۆن تاقیكراوەتەوە، زمانی بەكارهاتووە زمانی سی-یە و تەنها بۆ ئەم پڕۆژە زیاتر لە 921 دێڕ كۆدم نووسیووە”.

تایبەتمەندییەكانی ئامێرەكە:
لەڕێگەی ئامێری ماڵەكەت، ئەتوانیت بە كۆنترۆڵی تەلەفیزیۆن (دوگمە ڕەنگا و ڕەنگەكان) ئیش بە ئامێرەكە بكەیت و قوفڵی بۆری ئاو بكەیت و سویچ پلاكەكان كۆنتڕۆڵ بكەیت، لەڕێگەی گڵۆپە شینەكان چركە بە چركە ئاستی ئاوی تانكی سەربانت پێ ئەڵێ بە وایەرلێس.

ئەتوانیت لە هەرشوێنێكی ناو عێراق بیت، تەلەفۆن بۆ ئامێرەكە ئەكەیت، بە زمانی كوردی وەڵامت ئەداتەوە و دیسان ئەتوانی بە تەلەفۆن هەموو بارودۆخی ناو ماڵەكەت بزانی وەك (ئێستا ئاو هەیە یان نا، قوفڵی تانكی سەربان كراوەتەوە یان نا، تانكیەكە چەنێ ئاوی تیایە، بیرەكە یان ماتۆڕی ئاوەكە ئیش ئەكات یان نا) لەگەڵ ئەوەشدا ئەتوانی هەر بە تەلەفۆن هەموو ئەوانە هەڵكەیت و بیانكوژێنیتەوە.

ئەتوانیت ژمارە مۆبایلەكەتی لەسەر خەزن بكەی، هەركات ئاو هەبوو خۆی تەلەفۆنت بۆ دەكات لەگەڵ چەند ئیشێكی تریش.