سەردێر

پێشبینی هەواڵگری ئەمریكا بۆ ئامانجەكانی پۆتین

ڕوسیا چەكی ئەتۆمی بەكاردەهێنێت؟

خەڵك-
ئەڤریڵ هێنز، بەڕێوەبەری دەزگای هەواڵگری ئەمریكا ڕایدەگەیەنێت، پێشبینكردن سەبارەت بەوەی ڤلادیمێر پۆتین سەرۆكی ڕوسیا دەیەوێت چی بكات، زیاتر قورس دەبێت.

هێنز لە ئەنجومەنی پیرانی ئەمریكا ڕایگەیاند”ئامانجەكانی پۆتین توانا سەربازییەكانی ڕوسیا تێدەپەڕێنن، بەو واتایەی ڕەنگە لەچەند مانگی داهاتوودا بەشێوەیەك جموجۆڵ بكات قورس بێت پێشبینی بكرێت، ڕەنگە زیاتر ڕەوشەكە بەرەو ئاڵۆزبوون ببات”.

بە وتەی ئەو بەرپرسەكەی ئەمریكا”ئاراستەكە لەئێستادا زیاتر ڕوو لەوەیە كە ڕەنگە پۆتین ئامرازی توندتر بەكاربهێنێت، بە سەپاندنی حوكمی عورفی و سەرلەنوێ‌ ڕووكردنە بەرهەمی پیشەسازی، یان ڕێگەچارە سەربازییەكان كە ڕەنگە ڕەوشەكە بەرەو ئاڵۆزبوون ببات، بۆ دەستەبەركردنی داهاتی زیاتر لەپێناو هێنانەدی ئامانجەكانی”، بەدووریشی زانی پۆتین چەكی ئەتۆمی بەكاربهێنێت، “تەنیا لە یەك حاڵەتدا نەبێت، ئەوەش گەر ڕوسیا ڕووبەڕووی هەڕەشەی مان و نەمان بۆوە”.

بەڕێوەبەری دەزگای هەواڵگری ئەمریكا دەڵێت”سەرۆكی ڕوسیا كۆتایی بە جەنگی ئۆكراینا ناهێنێت بە تەوابوونی ئۆپەراشسیۆنەكەی دۆنباس، بەو پێیەی بەنیازە پردێكی وشكانی بۆ ناوچەی ترانسیستریا (مۆڵداڤیای جوداخواز) دروستبكات”.

ئەڤریڵ هێنز پێیوایە بەپێی هەڵسەنگاندنەكانی ئەوان”پۆتین خۆی بۆ جەنگێكی درێژخایەن ئامادەكردووە و بەنیازە لێوەی ئامانجەكانی بەدیبهێنێت كە دۆنابس تێدەپەڕێنن”.

هێنز وایدەبینێت”ڕوسیا توانا و خواستی ڕووبەڕووبوونەوەی وەهای هەیە كە ئاڵەنگارییەكان تێدەپەڕێنێت و لە توانا و خواستی نەیارانی زیاترە، بۆ ئەو مەبەستەش پشت بە پاشەكشەكردنی ویلایەتە یەكگرتووەكان و یەكێتی ئەوروپا دەبەستێت كە هاوكاتە لەگەڵ داڕمانی ڕەوشی تایبەت بە كەمی خۆراك و هەڵاوسان و نرخی وزەوە”.

ڕوسیا لە 24ی شوباتی ڕابردووەوە، ئۆپەراسیۆنێكی سەربازی فراوانی لە ئۆكراینا دەستپێكردووە، بەو هۆیەشەوە تائێستا چەندان ملیۆن هاووڵاتی ئاوارەی ناوخۆ و دەرەوەی وڵاتەكە بوون، وێڕای كوژرانی هەزاران كەس كە لەلایەن هەندێكەوە بە تاوانی جەنگ و تاوانی دژ بە مرۆڤایەتی لێكدانەوەی بۆ دەكرێت.