سەردێر

ڕەوتەكەی حەكیم باسی ڕێكەوتنی نێوان چوارچێوی هەماهەنگی و ڕەوتی سەدر دەكات

خەڵك-
فەهد جبوری، ئەندامی ڕەوتی حیكمەی نیشتمانی كە لەلایەن عەممار حەكیمەوە سەرۆكایەتی دەكرێت، ڕەتیدەكاتەوە تائێستا ڕێكەوتن لەنێوان ڕەوتی سەدر و چوارچێوەی هەماهەنگی كرابێت.

جبوری، لە لێدوانێكی ڕۆژنامەوانیدا ڕایگەیاند”سەبارەت بە دانیشتنەكەی سبەینێ‌ چوار شەممە، تا ئەم ساتە (كاتی ئامادەكردنی ئەم هەواڵە)، نە چوارچێوەی هەماهەنگی و نە ڕەوتی سەدر و نە هاوپەیمانی سێقۆڵی، نەگەیشتوونەتە ڕێكەوتنێك بۆ دەرچوون لەم چەقبەستنەی دروستبووە”.

بە وتەی ئەو ئەندامەی ڕەوتی حیكمە”ناكۆكییەكان لەنێوان هەندێك لە هێزە سیاسییە هاوپەیمانەكان و هەندێك لە هێزە سیاسییەكاندا ماونەتەوە و چارەسەرنەكراون”.

فەهد جبوری دەڵێت”سەبارەت بە سازدانی دانیشتنەكەی سبەینێ‌، پشت بەوە دەبەسترێت، لایەنی كوردی لەسەر كەسێتییەك ڕێبكەوێت، دەستپێشخەرییەكیش لەو بارەیەوە لەلایەن سەدرییەكانەوە هەبوو بۆ لێكنزیككردنەوەی ڕابۆچوونەكانی نێوان پارتی و یەكێتی، لەسەر كەسێتییەك بۆ سەرۆك كۆمار، بەڵام دووچاری شكست بوو، بەو هۆیەی یەكێتی سوربوو لەسەر بەرهەم ساڵح وەك كاندید بۆ پۆستەكە”.

جبوری پێیوایە”دانیشتنی چوار شەممە، هاوشێوەی دانیشتنی شەممە دەبێت و باسەكە لەو بارەیەوە تەواوبووە كە تائاستێك زامنكراوە، بە تایبەت لەگەڵ زیادبوونی ژمارەی لایەنگرانی چوارچێوەی هەماهەنگی”.