سەردێر

بەرپرسێكی ئەمریكی دەڵێت، پوتین ئامادە نییە كۆتایی بە جەنگ بهێنێت

خەڵك- ڤیان حەسەن
مانگێك زیاترە ڕووسیا بەردەوامە لە داگیركارییەكەی لە ئۆكراین، بەهۆی جەنگەكەوە زیاتر لە 3.8 ملیۆن هاووڵاتی ئۆكراینی وڵاتەكەیان جێهێشتووە و هەزاران كەس كوژراون یاخود برینداربوون، هەروەها بووەتە هۆی گۆشەگیركردنی ئابووری ڕووسیاش.

بڕیارە ئەمڕۆ گفتوگۆ ڕاستەوخۆكانی نێوان ئۆكراین و ڕووسیا لە توركیا بەڕێوە بچێت و ببێتە هۆی ڕێكەوتنێكی ئاگربەست، دمیترۆ كوڵێبا وەزیری دەرەوەی ئۆكراین دەڵێت” پرسە مرۆییەكان باسیان لێودەكرێت و بابەتی سەرەكی لە گفتوگۆكاندا گەیشتن بە ڕێكەوتنێكی ئاگربەست دەبێت.”

هاوكات دمیتری پێسكۆڤ وتەبێژی كرێملن ڕایگەیاند، تاوەكو ئێستا هیچ بەرەو پێشچوونێك ڕووینەداوە لەسەر ئەگەری كۆبوونەوەی نێوان ڤلادیمیر پوتن سەرۆكی ڕووسیا و ڤلۆدیمیر زیلینسكی سەرۆكی ئۆكراین.

بەرپرسێكی باڵای وەزارەتی دەرەوەی ئەمەریكاش كە نەیویست ناوی ئاشكرا بكرێت بە ڕۆیتەرزی ڕاگەیاند، پوتین ئامادە نیە كۆتایی بە جەنگ بهێنێت.
ئەمەش لە كاتێكدایە، دوای زیاتر لە مانگێك لە داگیركارییەكەی ڕووسیا لە ئۆكراین، ڕووسیا نەیتوانیوە هیچ كام لە شارە گەورەكانی ئۆكراین كۆنتڕۆڵ بكات، ڤیتاڵی كلیتسچكۆ سەرۆكی شارەوانی كیێڤ دەڵێت ” ئەفسانەی سوپای نەبەزێندراوی ڕووسیامان لەناوبرد، ئێمە بەرهەڵستی دوژمنكارییەكانی یەكێك لە بەهێزترین سوپاكانی جیهان دەكەین و سەركەوتوو بووین لەوەی ناچارییان بكەین ئامانجەكانیان بگۆڕن.”

وتیشی 100 كەس لە كیێڤ كوژراون و چوار منداڵیشیان تێدا بووە.