سەردێر

عێراق بڕێكی زۆر گەنم بۆ ئاردی بەشەخۆراك دەداتە سلێمانی

خەڵك-
ئەندامێكی ئەنجوومەنی پارێزگای سلێمانی ئاشكرای دەكات، كە بڕێكی زۆری گەنم لە عێراقەوە گەیشتۆتە سلێمانی و دەكرێتە ئارد و لە بەشەخۆراكی مانگانە دابەش دەكرێت.

كاسترۆ مەعروف، ئەنجامی ئەنجوومەنی پارێزگای سلێمانی بۆ (خەڵك) ڕایگەیاند، لیژنەكەمان لەڕێگای سەرۆكایەتی ئەنجوومەنی پارێزگاوە لە3ی مانگدا نووسراوی ئاڕاستەی بەڕێوەبەرایەتی دروستكراوی دانەوێڵەی پارێزگای سلێمانی كردبوو تاوەكو لەڕێگای بەڕێزیانەوە نووسراو ئاڕاستەی وەزارەتی بازرگانی بكرێت بۆ ناردنی بەشە گەنمی تەواو بۆ تەواوی كارگەكانی ئارد.

ڕاشیگەیاند، خۆشبەختانە بەهەوڵ و كۆشكی هەموو لایەك و نووسراوی سەرۆكی ئەنجوومەن و بەڕێوەبەرایەتی دروستكراوی دانەوێڵەی سلێمانی، بەشە گەنمی تەواو گەیشتۆتە كارگەكانی ئارد و لە ئێستادا ئامادە دەكرێت بۆ دابەشكردنی بەسەر هاووڵاتیان لەماوەیەكی زۆر نزیكدا.

بەپێی ئەو نووسراوەی، كە ئاڕاستەی وەزارەتی بازرگانی عێراق كراوە، لە كۆی 23 هەزار تەن گەنمی پشكی سلێمانی، تەنها 5 هەزار تەن گەنم درابووە سلێمانی و ئەوەش كێشەی بۆ دواكەوتنی دابەشكردنی ئارد دروست كردبوو، بەڵام وەك كاسترۆ مەعروف وتی، “ئەو بەشە گەنمە بەتەواوی گەیشتۆتە سلێمانی و دەست بە دابەشكردنی ئارد دەكرێت”.