سەردێر

یەكگرتوو: پرسی نەتەوەیی كاسپی زۆری بەسەرەوە كراوەو لەڕێڕەوی خۆی ترازێنراوە

خەڵك-

ئەمینداری گشتی یەكگرتوو ڕایدەگەیەنێت، لەسایەی فەرمانڕەوایی حزبەكانی دەسەڵات دۆخی دارایی هەرێم تادێت خراپتر دەبێت.
نووسینگەی ڕاگەیاندنی ئەمینداری گشتی یەكگرتووی ئیسلامی لە ڕاگەیەنراوێكدا ئاماژە بۆ ئەوە دەكات، دوانیوەڕۆی ئەمڕۆ پێنج شەممە سەلاحەدین محەممەد سەردانی دەڤەری ڕاپەڕینی كردو لە دوو كۆبوونەوەی جیاوازدا لەگەڵ ڕێكخستنەكانی ڕانیەو قەڵادزێ ڕایگەیاند، نەهجی یەكگرتوو مرۆڤی پەیامدارو چاكەكار دروست دەكات، بۆیە پێویستە مامەڵەو كاركردنی یەكگرتووەكان بەو جۆرەبێت كە چاكەكاربن و پارێزەری شوناسی ئیسلامی و ڕەسەنی كوردەواری بن.

وتیشی”ئەمڕۆ لە هەمووكات زیاتر نەهجی یەكگرتوو پێویستە بۆ كۆمەڵگەی كوردەواری كە بەداخەوە هەندێك دەیانەوێت شوناسی دروستی ئەم میلەتە بشێوێنن، بۆیە ئەركی یەكگرتوو و یەكگرتووەكانە پارێزگاری لەم ڕەسەنایەتیە بكەن”.

ئاماژەی بەوەشكرد، پرسی نەتەوەیی كاسپی زۆری بەسەرەوە كراوەو لەڕێڕەوی دروستی خۆی ترازێنراوە، بەداخەوە ئەو ممارەسە نەگونجاوەی لەم هەرێمە پیادەكراوە بووەتەهۆی ئەوەی هەستی نیشتیمانی لەلای تاك نەمێنێت، هەروەها لەگەڵ ئەوەی لەپرسە نیشتیمانی و حكومڕانیەكانیش سەركەوتوو نەبوون، ئاسانكاریش دەكەن بۆ بەلاڕێدابردنی گەنجان و كۆمەڵگەو ترازاندن لەڕەوشتە بەرزەكان.

ڕوونیشیكردەوە، لە سایەی فەرمانڕەوایی حزبەكانی دەسەڵات دۆخی دارایی هەرێم تادێت خراپتر دەبێت و نرخی نەوت 40 دۆلار بو دواتر بەرزبوەوە بۆ سەروی 100 دۆلار كەچی دۆخی دارایی هەرێم خراپتربوو باشترنەبوو، ئەوەش كارەساتەو هۆكارەكەی نەبوونی دادپەروەرییەو بەرپرسانی هەرێم لێی بەرپرسن.