سەردێر

لە ڕۆژهەڵاتی كوردستان 570 پارچە شوێنەوار دەستیان بەسەردا گیرا

خەڵك

570 پارچە شوێنەوار و لیرەی مێژوویی لە گومرگی بازرگانی ماكۆ لە رۆژهەڵاتی كوردستان دەستیان بەسەردا گیرا كە قاچاخچییانی شوێنەوار لە هەوڵدابوون لەژێر ناوی كەلوپەلی نێوماڵ لە رۆژهەڵاتی كوردستان بیانبەنە دەرەوە.

روحوڵڵا لەتیفی، وتەبێژی گومرگی ئێران رایگەیاند، دەستیان بەسەر 570 پارچە شوێنەوار و لیرەدا گرتووە كە قاچخچییانی شوێنەوار لەنێو بارێكی كەلوپەلی نێوماڵدا شاردبویانەوە و لە هەوڵدابوون لە رێگەی دەروازەی بازرگانی لە سنووری شاری ماكۆ بیگوازنەوە بۆ توركیا و لەوێشەوە بیبەن بۆ كەنەدا.

لەتیفی دەشڵێت، 18 پارچە كەلوپەلی برۆنزی، 322 پارچە لیرەی زیو، 87 پارچە لیرەی مس، گوڵدان، كتێب و كەلوپەلی مێژوویی نێوماڵیان لەنێودابووە كە مێژووی دروستكردنی بەشێكیان بۆ سێ هەزار ساڵ لەمەوبەر دەگەڕێتەوە.

No description available.