سەردێر

كەشناسێك؛ بۆ ماوەی 10 ڕۆژ گۆڕانكاری لە كەش و هەوای هەرێم ڕوودەدات

خەڵك –
شارەزایەكی بواری كەشناسی لە هەرێمی كوردستان ڕایدەگەیەنێت، تەنها سبەینێ هەینی ئەگەری بارانبارین لە بەشێك لە ناوچەكانی هەرێم هەیە، لە شەممەوە بۆ ماوەی ١٠ ڕۆژ كەشوهەوا ئاسایی دەبێت و پلەكانی گەرماش بەشێوەیەكی بەرچاو بەرزدەبنەوە.

ئاراس جەبار، شارەزای بواری كەشناسی لە هەرێمی كوردستان لە هەژماری خۆی بڵاویكردەوە، سبەینێ هەینی 11-2-2022، لەئەنجامی مانەوەی شێ لەناوچەكەدا و بەردەوامی كاریگەری لاوازی نزمە پاڵەپەستۆی دەریای ناوەراست ئاسمانی هەرێم بەزۆری لە نێوان ساماڵ و پەڵە ھەوردا دەبێت.
ڕاشیگەیاندووە ، كەش و هەوا لە زۆربەی ناوچەكان ئاسایی دەبێت و لەكاتەكانی دوای نیوەرۆدا بۆ نزیك ئێوارە لە هەندێك ناوچەی سنوری پارێزگای سلێمانی و هەولێر و هەڵەبجە و گەرمیان بەشێوەیەكی دیاری نەكراو ئەگەری چڕبوونەوەی ھەوری ناوخۆی بۆ ھەورە بروسكە و تاوە باران و تەرزە دەبێت.

ئاشكراشیكردووە، پلەكانی گەرما بە جێگیری دەمێنێتەوە، خێرایی با ئاسایی دەبێت لەكاتەكانی ڕۆژدا، لەكاتەكانی شەودا لەئەنجامی كاریگەری و دەستپێكردنی بەرزە پاڵەپەسۆیەك لەناوچە شاخاوییەكانی رۆژهەڵاتی پارێزگای سلێمانی و ڕاپەرین خێرایی با لە ئاراستەی باكوری رۆژهەڵاتەوە چالاك دەبێت بە خێرایی ١٥ ھەندێك كات تا ٢٥ كیلۆمەتر لە كاتژمێرێكدا چالاك دەبێت.

ئەو كەش ناسە پێشبینی دەكات، لە ڕۆژی شەممەی داهاتووە، ئەگەری هەیە بۆ ماوەی ١٠ ڕۆژ كەشوهەوا ئاسایی دەبێت و پلەكانی گەرمیش بەشێوەیەكی بەرچاو بەرزدەبنەوە.