سەردێر

نرخی نەوت 90 دۆلاری تێپەڕاند

خەڵك-
بەهۆی ئاڵۆزییەكانی نێوان ئەمریكا و ڕوسیا و بارودۆخی ئۆكرانیا و بڵاوكردنەوەی هێزی ئەمریكی لە بەشێكی وڵاتانی ئەوروپا و خۆئامادەكردنی سەركردەكانی ئەوروپا بۆ هەر ئەگەرێكی سەربازی و بڕینی وزەی ڕوسی لێیان، نرخی نەوت بەشێوەیەكی بەرچاو بە بەراورد بە 8 ساڵی ڕابردوو بەرزبووەوە و هەر بەرمیلێك 90 دۆلاری تێپەڕاند.

بەپێی ڕاپۆرتی ئاژانسی (فیكس نیوز تودەی) ئەمڕۆ چوار شەممە نرخی نەوتی خاو لەگەڵ كردنەوەی بازاڕی ئەمریكی ڕووی لە بەرزبوونەوە كرد و بەجۆرێك لە 8 ساڵی ڕابردوودا ئەمە بە بەرزترین نرخ دادەنرێت، كە گەیشتۆتە سەرووی 90 دۆلار بۆ هەر بەرمیلێك.

هەر بەپێی ڕاپۆرتەكە، بەرزبوونەوەی نرخی نەوت بەهۆی هەڵكشانی مەترسییەكانی تایبەت بە قەیرانی ئۆكرانیایە، هەروەها ئەو دۆخە نالەبارە جیۆسیاسیەی لە ناوچەی ڕۆژهەلاتی ناوەڕاست هەیە.

بەپێی ڕاپۆرتی پەیمانگای نەوتی ئەمریكی، یەدەگی خاوی ئەمریكا، كە گەورەترین بەكارهێنەری نەوتە لە جیهاندا كەمی كردووە.

بەپێی ڕاپۆرتەكە، نرخی بەرمیلێك نەوتی خاوی برێنت بەڕێژەی 2.25% زیادی كردووە لەو كاتەی گەیشتبووە 89 دۆلار و 82 سەنت و لە ئێستادا چۆتە سەرووی 90 دۆلار و ئەوەش بە بەرزترین نرخ دادەنرێت لەدوای مانگی 10ی ساڵی 2014ەوە و هەروەها نرخی نەوتی خاوی ئەمریكی بەڕێژەی 2.3% بەرزبۆتەوە و گەیشتۆتە 87 دۆلار و 12 سەنت.

ئەمە لەكاتێكدایە، كە سەبارەت بە دۆخی ئۆكرانیا، جۆ بایدن، سەرۆكی ئەمریكا دوێنێ‌ سێ‌ شەممە هەڕەشەی لە ڕوسیا كرد و ڕایگەیاند، كە سزای تایبەتی بەسەر ڤلادیمیر پۆتن، سەرۆكی ڕوسیا دەسەپێن ئەگەر ئۆكرانیا كۆنتڕۆڵ بكات.

بەپێی ڕاپۆرتی ئاژانسی (روسیا الیوم)، سەركردەكانی ڕۆژئاوا و ئەوروپا ئامادەكاری سەربازییان كردووە و پلانیان داناوە بۆ پاراستنی ئەوروپا لە هەر ئەگەرێكی بڕینی وزەی ڕوسی لە ولاتەكانیان و لە ئێستاشدا ئەمریكا 8 هەزار و 500 سەربازی لە حاڵەتی ئامادەباشی داناوە و لە ئەوروپادا بڵاویكردوونەتەوە بۆ هەر ئەگەرێكی توندبوونی ناكۆكییەكان لەگەڵ ڕوسیا.

ئەم ڕووداوانە هاوكاتن لەگەڵ گرژبوونی دۆخی ڕۆژهەڵاتی ناوەڕاست و بەرپرسانی ئەمریكا و ئیمارات بە (شەرقولئەوسەت)یان ڕاگەیاندووە، چەكدارە حوسییەكانی یەمەن-ی سەر بە ئێران ڕۆژی دوو شەممە هێرشی مووشەكیان كردۆتە سەر ئیمارات و بنكەیەكی سەربازی ئەمریكایان بە ئامانج گرتووە، بەلام لەلایەن بنكەی بەرگری پاتریۆتی ئەمریكییەوە نێكشكێنراون.