سەردێر

هاوپەیمانیەتییەكی نوێ لە پەڕلەمانی عێراق ڕاگەیەنرا

خەڵك-

هەردوو هاوپەیمانی تەقەدوم بە سەرۆكایەتی محەمەد حەلبوسی و عەزم بە سەرۆكایەتی خەمیس خەنجەر هاوپەیمانییەكیان بەناوی سیادە لە پەڕلەمانی عێراق پێكهێنا كە ٧١ پەرلەمانتار لەخۆدەگرێت.

هاوپەیمانییە نوێیەكە لەلایەن خەمیس خەنجەر سەرۆكایەتی دەكرێت لە ڕاگەیەنراوێكدا ئاماژە بۆ ئەوە دەكات، هاوپەیمانی سیادە ئاڵای ئێوەیە و هەرگیز دەستبەرداری دۆزە ڕەواكانتان نابێت بە هاوبەشی لەگەڵ هەموو ئەو هێزە نەتەوەییانەی كە كار دەكەن بۆ ڕزگاركردنی وڵات و خزمەتكردنی هاووڵاتییان.

ئەوەش هاتووە”ئەوان لە شەڕی دژی تیرۆردا بە هەموو شێوەیەك پشتگیری لە هێزە ئەمنییەكان بە هەموو پێكهاتەكانییەوە دەكەن و كاردەكەن بۆ ئەوەی چەك تەنها لە دەستی دەوڵەت و دەزگا فەرمییەكانیدا بێت”.

لە راگەیەندراوەكەدا ئاماژە بەوەشكراوە، هاوپەیمانییەكە كاردەكات بۆ پێشكەشكردنی پڕۆژەیەكی نیشتمانیی یەكگرتوو كە خزمەت بە بەرژەوەندی گشتی بكات.

هاوپەیمانی سیادە كە ٧١ پەرلەمانتار لە پەڕلەمانی عێراق لەخۆدەگرێت لە هەردوو هاوپەیمانی تەقەدوم بە سەرۆكایەتی محەمەد حەلبوسی (٣٧) و عەزم بە سەرۆكایەتی خەمیس خەنجەر (٣٤) پێكدێت.